22
1 Entanni ey immehel mewan hi Apu Dios ni hi-gak et kantuy “Elaw kad baley etan ni patul di Judah et ehelen mu e kammuy:
2 Hi-gam e patul di Judah e helag lan David e patul, yadda opisyal mu niyadda tutu-ud Judah ni kaumhegep idad eheb eyan bebley, dengel yu eya inhel Apu Dios e
3 kantuy ‘Hi-gak e Dios ey mandalen dakeyun mengippahding ni meandeng niya limpiyuh. Baddangi yudda etan tuun kahe-ulan maheul ni tutu-u. Ey entan tu panliligat ida immalin nekibebley ni hi-gayu, yadda nepu-hig niyadda nebalu. Ey entan tudda patey etan endi bahul tu eyad bebley.
4 Hedin u-unnuden yudda huyyan inhel ku ey meitultuluy ni mampatul hu helag David. Hi-gada niyadda opisyal da ey mannenneng ni yadyan eheb eyan baley ni patul hu pengidlanan dan manluggan di kalesah da niya mantakkay di kebayyu da.
5 Nem hedin eleg yu u-unnuda huyyan nakka pan-ittugun ey issapatah ku e mebahbah huyyan baley ni patul. Hi-gak e Apu Dios hu nanghel nunya.’ ”
6 Kan mewan Apu Dios ey “Kayyaggud ni peteg eya baley ni patul ni Judah, henin kakinayyaggud ni Gilead niya duntug di Lebanon, nem bahbahen kulli et endi mambelley.
7 Peellik ali tutu-un mengi-lin wahay da et bukalen da et dikhalen dadda kayyaggud ni sedar ni tukud tu et itungu da.
8 Dakel ali tutu-un melebbah ni melpud edum ni bebley et kandalli ey ‘Kele an impahding Apu Dios hu hanneya eyad et-eteng kabaelan tun bebley?’
9 Hummangen alin edum et kanday ‘Tep inwalleng da etan Ap-Apu e Dios da ey eleg da u-unnuden hu nekitbalan tun hi-gada et dayawen da dios ni kinapyan tuu.’ ”
10 Hi-gayun iJudah, entan tu nannangngihi etan netey ni patul yu e hi Josiah. Ya nengngihan yun peteg ey hi Joahas e u-ungnga tun daka pan-illaw di edum ni bebley et eleg tulli law ang-anga eya bebley ni neiungngaan tu tep eleg ali law mambangngad.
11 Heninnuy hu inhel Apu Dios meippanggep nan Joahas e neihullul nan ametun hi Josiah e patul di Judah. Kantuy “Inlaw dad neidawwi et eleg law mambangngad eyad bebley tu.
12 Ey mettey alid bebley ni nengilawwan dan hi-gatu et eleg tulli law ang-angen eya bebley tu.”
Ya neipeamta meippanggep nan Jehoiakim
13 Heninnuy inhel Apu Dios ni meippanggep nan Jehoiakim: “Nanna-ud ni mekastigu hi Jehoiakim! Tuka pan-ettenga baley tu meippuun di beken ni limpiyuh ni tuka pehding ey gapuh ni sinelam tu. Tuka pangngunnu tutu-u, nem eleg tu iddawat sinangdan da.
14 Kantuy ‘Behwaten ku et-eteng ni baley ku e etta-teng ida kuwaltuh tu ey dakel habhabyen tu ey sedar hu mekapyan lekbi tu niya mepintolan ni madlang.’ ”
15 Nem kan Apu Dios ni hi-gatuy “Jehoiakim, kaw kammu nem mambalin kan kayyaggud ni patul hedin ya sedar ni keyew hu ikkapyam di baley mu et kakkayyaggud nem ya baley ni edum? Hedin hi amam e hi Josiah ey nebayag nampatulan tu ey nan-an-anla. Meandeng ey limpiyuh hu impahding tu, et humman hu, kayyaggud emin hu nambalinan emin ni impahding tu.
16 Ey meandeng hu nengipenuh tun kasuh idan newetwet, et mukun yimmaggud neitu-wan tu. Hanniman hu elaw ni tuun kamekiddagyum Apu Dios.
17 Nem hedin hi-gam ey ebuh ida panyaggudan mun muka ipapaptek. Muka pampateyadda endi bahul tu ey muka panhelheltap ida tutu-um.”
18 Huyya pay hu inhel Apu Dios meippanggep nan Jehoiakim e u-ungngan Josiah e patul di Judah: “Endilli umlemyung ni ketteyyan tu ey endi menghel ni ‘A-ayyuh humman ni patul mi. Kele an netey?’
19 Mettey alin heni kebayyun pemegga da guyud et da ibbeng di a-allaw ni eheb ni Jerusalem.”
20 Hi-gayun iJerusalem, nangih kayu tep endi law umbaddang ni hi-gayu. Elaw kayud Lebanon et kayu tumkuk diman niya elaw kayud Bashan et kayu numngih diman. Ey elaw kayuddad duntug di Moab et kayu tumkuk tep neapput ni emin ida bebley ni kebaddang yu.
21 Yan eman ni wadan emin ni hi-gayu hu kayyaggud et melinggep kayu ey inhelan dakeyu, nem eleg yu dengelen hu ehel ku. Tep henin nuntan dedan elaw yu e eleg yuwak u-unnuda neipalpun keu-ungnga yu ingganah nunya.
22 Mei-ellig ni ittayab ni dibdib ida ap-apu yu anin idan kebaddang yud gubat et mababbaingan kayu gapuh idan lawah ni impahding yu.
23 Ma-nu mannuman tep kayu kamekalinggep di baballey yun nekapyad sedar e nalpud Lebanon, nem anggehemmek kayulli tep manhelheltap kayullin henin biin man-ungnga.
24 Kan Apu Dios etan ni patul ni Judah e hi Jehoiachin e u-ungnga lan patul e hi Jehoiakim ey “Hi-gak e Dios ni wadan ingganah ey panna-ud ku e anin ni hi-gam hu pinilik ni mampattul e ka kamei-ellig di singsing ni neihuklub di kimeng ku et e-kalen dakalli
25 et pebeltan dakan etan ni muka tattakusin buhul mu e hi Nebukadnessar e patul di Babilon et yadda sindalu tu. Humman idan buhul mu ey ihik idan memettey ni hi-gam.
26 Pilliten daka, anin hi inam et palaw dakeyud bebley ni eleg yu ang-angen et matey kayudman.
27 Peteg kayullin menang-ang eyan bebley yu, nem eleg kayu law mambangngad deya.”
28 Immehellak et kangkuy “Kaw nambalin hi Jehoiachin ni henin naphik ni pulan bangan endi neminhed ni mengella? Kele hipa gaputun tu keillawwan anin idan u-ungnga tud bebley ni eleg da ang-angen?”
29 Hi-gayun bimmebley, dengel yu eya inhel Apu Dios:
30 Kantuy “Ibilang yu huyyan tuun heni endi u-ungnga tu. Anin ni hi-gatu et eleg umyaggud biyag tu. Tep endilli u-ungnga tun mampatul di Judah ni meihhullul nan David. Hi-gak e Apu Dios hu nanghel nunya.”