27
1 Yan eman ni laputun nampatulan Sedekiah e u-ungngan Josiah di Judah ey inhel Apu Dios ni hi-gak e kantuy
2 Mengapya-ak ni paku et ikketak ni katat et ibanggel ku.
3 Entanni ey inhel mewan Apu Dios ni hi-gak e e-helen kuddan bineal ni patul di Edom, yad Moab, yad Ammon, yad Tyre, niyad Sidon ni immalidya Jerusalem ni an mekihummangan nan Sedekiah e patul e kangkuy:
4 “Kan ni Ap-Apu e Kabaelan tun emin ni Dios idan helag Israel idan patul yu ey:
5 ‘Gapuh ni et-eteng ni kabaelan ku ey lintuk hu puyek, yadda tutu-u niyadda animal et dammutun iddawat kun kumpulmih ni pinhed kun pengidwatan.
6 Yan nunya ey pebeltan kudda bebley yun bega-en ku e hi Nebukadnessar e patul di Babilon. Ey pambalin kudda pay hu animal di muyung ni mansilbin hi-gatu.
7 Mansilbin emin hu tutu-ud kebebbebley ni hi-gatu, ya etan lakin u-ungnga tu niyadda inap-apu tu ingganah medettengan etan tsimpuh ni keapputan ni bebley tu et sakupen idan edum ni patul et mepappeg hu pan-ap-apuan tu.
8 Hedin wada hakey ni bebley winu pan-ap-apuan ni eleg mengu-unnud ni hi-gatu, kastiguen ku e peelik hu gubat, bisil niya degeh diman ingganah pebahbah kun Nebukadnessar humman ni bebley.
9 Entan tu deddengngel hu kae-heladdan beken ni makulug ni prophet yu anin ni hipan man-ebbig ni meippahding alin edum ni aggew meippuun di i-innep da winu meippuun di nekihummanganan dan linnawan netey winu meippuun di nengipahdingan dan magic. Emin ida ey kanday eleg kayu mansukkuh ni patul di Babilon.
10 Nem itek da. He-ulen dakeyu kumedek ni hi-gada ma-lat mailaw kayu anhan law di naka-iddawwin bebley. Ya kakulugan tu ey hedin u-unnuden yu hu kanda man bahbahen ku eya bebley yu ey degyunen dakeyun hi-gak ma-lat meendi kayu.
11 Nem yadda etan mansukkuh ni patul di Babilon et mansilbiddan hi-gatu ey pannenneng kuddad bebley da et taneman da puyek da. Hi-gak e hi Apu Dios hu nanghel nunya.’ ”
12 Impidwak ni inhel Apu Dios nan Sedekiah e patul di Judah e kangkuy “Hedin pinhed mun eleg mettey, pansukuh kan patul di Babilon. Pansilbi kan hi-gatu niyadda tutu-u tu.
13 Tep kan Apu Dios ey ‘Hedin eleg mu u-unnuda et eleg ka mansukkuh nan Nebukadnessar e patul di Babilon ey mettey kayuddan tutu-um di gubat, yad bisil niyad degeh.’ Et humman hu, pansukuh kayu kuma ma-lat eleg kayu matey.
14 Entan nisi tu ideddengel ey entan tu u-unnud ida prophet ni kamenghel ni eleg kayu mansukkuh tep he-ulen dakeyun hi-gada.
15 Hi Apu Dios mismuh hu nanghel e eleg tu baalen ida humman ni prophet nem kanday nalpun hi-gatu hu inebig dan itek. Hedin kullugen yudda man degyunen dakeyun hi-gatu eyad bebley anin idan nunman ni prophet et matey kayun emin di pengillawwan dan hi-gayu.”
16 Kangku mewan idan padi niyadda tutu-u ey “Kan Apu Dios ey ‘Entan tu kulug hu inhel idan prophet yun kanday meibbangngad ida nebalol ni usal ni Tempol tep itek da.
17 Em, entan tu kulug hu daka e-hela. Pansukuh kayu kumaddan ni patul di Babilon ma-lat tumegu kayu. Tep hedin eleg kayu mansukkuh man mekabbahbah eya bebley.
18 Tep gullat ngun makulug ni prophet ida niya makulug ni impeamtak ni hi-gada hu daka ebbiga ey mandasal ida-et ni hi-gak e Apu Dios e Kabaelan tun emin et eggak iebulut ni meillaw di Babilon ida etan natdaan ni nebalol ni usal di Tempol et yad baley nan patul.’
19-20 Yan eman ni nengal-an nan Nebukadnessar e patul di Babilon nan Jehoiachin e patul di Judah e u-ungngan Jehoiakim niyadda ap-apud Judah niyad Jerusalem ey eleg tu peki-ladda tukud, ya tangkih ni giniling, ya kaliton niyadda edum ni nebalol ni ngunut di Tempol.
21 Dengel yu huyyan inhel Apu Dios e Kabaelan tun emin ni Dios idan helag Israel meippanggep idan nunman ni natdaan ni nebalol ni ngunut di Tempol et yad baley ni patul diman Jerusalem. Kantuy,
22 ‘Meillaw di Babilon ida humman ni nebalol ni ngunut ingganah ni pengibbangngadan kuddalli mewan di deya Jerusalem. Hi-gak e Dios hu nanghel nunya.’ ”