18
Ya eleg mabalin ni i-ulig
1-2 Kan mewan Apu Dios nan Moses ey “Ehel muddan edum mun helag Israel huyyan ittugun kun hi-gada: Hi-gak hu Ap-Apu e Dios yu.
3 Entan tu iu-unnud di elaw idan tuud Egypt e nambebleyan yu lan nunman. Ey entan tu iu-unnud di elaw idan iKanaan ni nambebley di bebley ni pengillawwak ni hi-gayu.
4 Ipahding yu pinhed ku ey u-unnud yu tugun ku. Hi-gak hu Ap-Apu e Dios yu.
5 Hedin u-unnuden yu tugun ku, kayyaggud pambalinan ni biyag yu tep ya pengippahdingan yuddan nunman. Hi-gak hu Ap-Apu.
6 U-unnud yudda eya tugun ku: Entan tudda iulig aaggi yu. Hi-gak hu Ap-Apu e Dios yu.
7 Entan tu iulig hi ineyu tep be-ingen yu hi ameyu. Nemnem yu e hi ineyu humman.
8 Ey entan tu iulig hu ahwan ameyu, tep kebe-ingan nan ameyu.
9 Entan tu iulig hu agiyun bii, anin ni u-ungngan ameyud edum ni bii winu u-ungngan ineyud edum ni laki, anin ni eleg meetteng di baley yu.
10 Entan tu iulig hu inap-apu yun bii, tep kebe-ingan yu.
11 Entan tu iulig hu imbintan ameyu, tep agiyu humman.
12-13 Entan tu iulig hu biin agin ameyu winu agin ineyu, tep agiddan ameyun ineyu.
14 Entan tu iulig hu ahwan agin ameyu ma-lat eleg yudda baingen, tep a-ammed yudda.
15 Entan tu iulig hu inepu yun bii, tep ahwan u-ungnga yu.
16 Entan tu iulig hu ahwan agiyu ma-lat eleg yu baingen hu agiyu.
17 Entan tu iulig hu han-ina ey entan tu iulig hu inap-apu tu, tep lawah ni peteg humman.
18 Entan tu ahwa hu agin ahwa yu hedin mategu ahwa yu.
19 Entan tu iulig hu biin wada kamelpud annel tu, tep kameibbillang humman ni biin beken ni malinih.
20 Entan tu iulig hu ahwan sinakdul yu, tep meibbillang kayun beken ni malinih.
21 Entan tu iebulut ni mei-appit hu u-ungnga yun Molek, tep langlangkuyyaen yu hu ngadan ku e Dios yu. Hi-gak hu Ap-Apu.
22 Eleg mabalin ni i-ulig ni laki hu edum tun laki, tep lawah ni peteg humman.
23 Eleg mabalin ni an i-ulig ni tuu hu animal, tep meibbillang ni beken ni malinih hu tuun mengippahding nunman. Ey lawah ni peteg humman ni pehding ni hakey ni tuu.
24 Entan tu ipahding ida huyya, tep meibbillang kayun beken ni malinih. Humman impenahding idan tuun nampambebley di pengillawwak ni hi-gayu, et maibilang idan beken ni malinih. Et mukun degyunen kudda et maihullul kayu.
25 Nambalin hu bebley dan beken ni malinih tep yadda humman ni impenahding da. Et humman hu, kastiguen kudda ma-lat ma-kal idadman.
26-27 Nem hedin hi-gayu, anin idan nekibebley ni hi-gayu, ey mahapul ni paka-u-unnuden yun emin hu tugun ku, et eleg yu ipahding ida humman ni lawah ni peteg. Impenahding idan nambebley ditan ida humman ni kamengippebungnget et mambalin bebley dan beken ni malinih. Nem hedin nisin hi-gayu niyadda nekibebley ni hi-gayu, ey mahapul ni u-unnuden yu tugun ku.
28 Hedin ippahding yudda dama humman ey bellawen dakeyu etan ni bebley heni lan neipahding idan nambebley diman.
29 Hedin wadan hi-gayun helag Israel hu mengippahding idan nunya, ey eleg law meibbillang ni tuun Apu Dios.
30 U-unnud yu tugun ku ey entan tu iu-unnud di kapehding idan tuun nambebley di lawwan yun yu pambebleyan, ma-lat eleg kayu maibilang ni beken ni malinih. Hi-gak hu Ap-Apu e Dios yu.”