17
Ya inhel nan Apu Dios nan David
1 Yan eman ni nanha-ad law hi David di baley tun impekapya tu ey kantun Nathan e prophet ey “Ma-nun hi-gak tep nakka manha-ad di nehammad ni baley ni nekapyan keyew ni sedar ey ya Kaban Apu Dios ey neiha-ad di neatepan ni tuldah.”
2 Ey kan Nathan ni hi-gatuy “Ipahding mu hu hipan pinhed mu et baddangan dakan Apu Dios.”
3 Nem yan nunman ni hileng ey kan Apu Dios nan Nathan ey
4 “Mu ehel nan David e bega-en ku e kammuy ‘Huyya hu inhel Apu Dios: Beken ni hi-gam hu memehwat ni Tempol ni panha-adan ku.
5 Neipalpu eman ni nengihwangan kuddan aammed yun helag Israel di Egypt ingganah nunya ey eleggak manha-ad di tempol tep nanhaha-addak di neatepan ni tuldah ey nan-etaetannak.
6 Ey yan nunman ni nekikkillawwan kun hi-gada ey endi nak nengibgaan idan eman ni pinutuk kun nengipappangngulun hi-gadan memehwat idan baley kun mekapyad keyew ni sedar.
7 Hi-gak e hi Apu Dios e Kabaelan tun emin ey ingkal dakad nebabah ni ngunum ni mampattul ni kalneroh et putuken dakan mampatul eyaddan tuuk ni helag Israel.
8 Nekikkillawwak ni hi-gam anin ni attu linawwam. Hedin immela kan an mekiggubbat idan buhul mu ey nakka memengngulu et apputen kudda. Ey pambalin dakallin kamekatbal ni ap-apun mandingngel di kebebbebley eyad puyek.
9-10 Intuduan dakeyun tuuk e helag Israel ni pambebleyan yun ingganah. Endi law mengippehelheltap ni hi-gayu eyad bebley yu. Yan inlian yudya ey ginubagubat dakeyuddan lawah ni tutu-u, nem meippalpun nunya ey endi law hanniman ni an meippahding. Hammaden kun e-helen e peapput kullin emin hu buhul yu niya iddawtan dakeyun helag yu.
11 Hedin mepappeg ali biyag mu et meikkullung kad gungat idan aammed mu ey pambalin kulli hakey ni u-ungngam ni patul et ihammad ku pan-ap-apuan tu.
12 Hi-gatulli mengapyan tempol ku. Ey ang-angek et mannananeng hu pan-ap-apuan tu.
13 Hi-gatulli u-ungngak ey hi-gak ali ametu. Pannananeng kulli impeminhed ku niya pemaddang kun hi-gatu. Beken ni henin impahding kun Saul e ingkal kud pan-ap-apuan tu et ihullul daka.
14 Hi-gatulli puttuken kun mampaptek idan edum tun helag Israel e tutu-uk niya pannananeng kullin ingganah hu pan-ap-apuan tu.’ ”
15 Et lumaw hi Nathan di kad-an David et ehelen tun emin ni hi-gatu hu inhel Apu Dios.
Ya dasal David
16 Entanni ey limmaw hi David e patul di kad-an Apu Dios et mandasal. Yimmudung e kantud dasal tuy “Ap-Apu e Dios, hi-gak niyadda pamilyah ku ey endi katteg ngu kelebbengan mid impahding mun panyaggudan mi,
17 nem deh e mu kumedek kapan-e-dumi bendisyon ku tep ya binabbal mun hi-gak. Hinammad mun inhel hu pehding mun panyaggudan idan helag kun edum ni aggew, niya heni eta-gey saad kun muka pehding ni hi-gak.
18 Et humman hu, endi law hu edum ni nak e-helen ni hi-gam. Neka-amtam hu neitu-wan ku niya muwak kalispituhan bega-en mu.
19 Hi-gam kannemnem ni mengippahding ni hanneyan panyaggudan ku e bega-en mu niya hi-gam nengipeamtan hi-gak ni eta-gey ni saad kun edum ni aggew.
20 Apu Dios, endi edum ni inamta min henin hi-gam ni Dios mi.
21 Ey endi edum ni henin hi-gamin helag Israel ni inhewang mud neihbutan mid Egypt et pambalin dakemin tuum et wada inna-nu tun mandingngel hu ngadan mud kebebbebley eyad puyek. Impahding mu hu kamengippetnga et pampa-kal mudda nampambebley ma-lat maihullul kamin tuum.
22 Em, Apu Dios, impambalin dakemin helag Israel ni tuum ni ingganah niya hi-gam hu Dios mi.
23 Et yan nunya e Apu Dios ey iddasal ku e peamnum ma-lat maipahding ni ingganah etan hinammad mun inhel ni pehding mun panyaggudan ku niya panyaggudan idan helag ku.
24 Ey peamnum humman ni inhel mu et mandingngel hu ngadan mun ingganah di kebebbebley ma-lat kan idallin tuu ey ‘Hi Apu Dios e Kabaelan tun emin hu Dios idan helag Israel.’ Et humman hu, pannananeng mu anhan hu pan-ap-apuan ku.
25 Apu Dios, netuleddak ni mengiddasal idan nunyan hi-gam tep impeamtam ni hi-gak e bega-en mu e pampatul muddalli helag ku.
26 Apu Dios, hi-gam hu Dios, hinammad mun inhel ni hi-gak ida kayyaggud ni pehding mullin panyaggudan ku.
27 Et humman hu, peamnum humman ni inhel mu et bendisyonam ni ingganah ida helag ku. Hi-gam, Apu Dios, hu nambendisyon ni hi-gada, et nanna-ud ni mannananeng humman ni bendisyon mun hi-gada.”