16
Yämagurani 16:1-15
Isrel ämawebetä ketemta yäŋapiŋkuŋ
1 Isrel äbot päke u kuduptagän Elim kome peŋpeŋ kuŋtäŋgän kome jopi kubä wäpi Sen ahäŋkuŋ. Sen uwä Elim Sinai kome u bämopiken. U Isip peŋpeŋ äbuŋo komepak 2 kepma 15 täreŋirän Sen kome u ahäŋkuŋ.
2 Kome jopi uken ahäŋpäŋä ämawebe äbot päke u Moses kenta Aronken ketemta yäŋpäŋ yäŋärahutpäŋ ŋode yäwetkuŋ;
3 Nin ŋode nadäkamäŋ; Yawetä Isip komeken itkumäŋken ugän nidäpuko uyaku! Bian Isip itkumäŋo uwä tom ketem nininken gärip terak ijiŋpäŋ nak täŋkumäŋonik yäk. Täŋpäkaŋ ektä nin kudup nakta täŋpä wawäpäŋ kaŋ kumbut yäŋ nadäŋpäŋ kome jopi ketemi nämoken ŋo yäŋnikŋat yäpmäŋ äbumän ba?
4 Ude yäŋirä nadäŋpäŋ Yawetä Moses ŋode iwetkuk; Isrel ämawebe ŋode yäwet; Kunum gänaŋ nanik ketem täŋpewa iwän ude api maŋ tamineŋ. Maŋirä kepma kubäkubä ämawebe ini-ini päŋku kepma kubä unitäŋogän kaŋ yäpmäk täŋput. Kädet ude terak täŋpäŋ-yabäŋira ämawebe u näkŋo man u buramiŋpäŋ api iwatneŋ ba nämo?
5 Täŋkaŋ kepma 1tä päŋku 5 ude täŋtäŋ kuŋtäŋgän kepma 6 ukenä kepma yarä täŋo biŋam kaŋ yäpmäk täŋput yäk.
6 Eruk ude yäwänä Moses kenta Arontä Isrel ämawebe kudup ŋode yäwetkumän; Apiŋo bipäda ŋode api kaŋpäŋ nadäneŋ; Yawetä ini Isip nanik tämagut yäpmäŋ äbuk.
7 Täŋ kwep tamimaŋä Yawe täŋo peŋyäŋek pähap, kehäromi nikek api käneŋ. U yäŋkubit-kubit man iwetkuŋo u nadätak. Bureni, nekpäŋ nämo niwetkuŋ, Yawe inipäŋ iwetkuŋ. Nekä unitäŋo man buramik ämaniyatgän.
8 Ude yäŋpäŋ Mosestä äneŋi ŋode yäwetgän täŋkuk; Yawetä yäŋkubit-kubit manjin nadäŋ tamiko unita ini tom bipäda-bipäda tamiŋkaŋ tami tamiwä ketem injinken gärip terak näneŋta api tamik täŋpek. Nadäkaŋ? Äma jopi nekken yäŋkubit-kubit yäkaŋ uwä Yawetä inita täŋ imik täkaŋ.
9 Ude yäwetpäŋ Mosestä Aron iwetkuk; Yawetä äma äbot päke ŋonitäŋo yäŋkubit-kubiri nadätak unita yäŋpewi äbä Yawe ini iŋamiken kubäkengän irut.
10 Eruk Aron Mosestä iwetkuko udegän ämawebe yäwerän äyäŋutpäŋ kome jopiken dapun täŋpäŋ kaŋkuŋ; Yawe täŋo peŋyäŋeki pähap pit kubägän gubam terak ahäŋirän.
11 Ahäŋpäŋ Yawetä Moses ŋode iwetkuk;
12 Ämawebe ŋonitäŋo yäŋkubit-kubiri uku nadäŋ yämit. Unita ŋode yäwet; Bipäda-bipäda tom api näneŋ. Täŋ tami tamiwä ketem iniken gärip terak api yäpmäŋpäŋ nak täneŋ. Ude täŋkaŋ mebäri ŋode uwä api nadäwä tumneŋ; Näk uwä Yawe Anutuni bureni.
13 Eruk bipädawä barak täpuri täpuri kome itkuŋken ugän tokŋeŋpäŋ yejämäŋpäŋ kämän patkuŋ. Täŋ tamiwä guk näburum kome itkuŋken u itkuŋ.
14 Täŋpäkaŋ guk näburum unitä keke yäŋiräwä komenita imaka kubä ketem kokok-kokok bumik unitä pat yäpmäŋ kuŋkuŋ.
15 Parirä Isrel ämawebetä yabäŋpäŋä mebäri nämo nadäŋkuŋo unita ini-tägän näwetgäwet täŋpäŋ yäŋkuŋ; U imatäken? Ude yäŋirä Mosestä yäwetkuk; U ketem, Yawetä ini intä nakta tamitak yäk.