10
1-4 Amene imalini yame, Kataisato Gotena loo tupa pitaka kuai lo wete wato mina yiake leane okonena, Goteto Kataisa lo bilipi lene wandakali tupa pitaka tika-pene ateyai lalane. Tene okonena, andipa Gotena loo tupamane katulo Kataisa lo bilipi lene wandakali utupane yuu koo okona pulupa nalolo-peya. Wuane tekeko, Goteto Kataisa lo bilipi lene wandakali tupa pitaka tika-pene ateyai lalane nembo natene ato, Isatale tane tupamane balana mana okonena pangosa ata na-piyaini. Jia. Yakama tanena tai-lene okomane Gotena loo tupa wato minuluma-kola, Goteto yakama wandakali tika-pene ateyai lolopeya nembo talaini. Wuane nembo toto, utupane-mane Gotena loo tupa kuai lo wato minu ataima lakae lo nembo talaini lo namba utupanena wisanisa atoto, yakama langeyo. Wuane tekeko, Goteto aki nembo toto, wandakali tupa tika-pene ateyai lalane lo utupane-mane nembo natalaini. Tene okonena, Goteto utupane molo-peke lapia lakae lo nembo toto, ole dindi lo nambato bala lo pote lalawane.
5 Wandakali-mane Gotena wenonga tika-pene atamakale nembo toto, Gotena loo tupa wato minalaini mana oko lapana wato, wamba Mosesato pii mindi pepanga peyoto, wandakali mindimane Gotena loo tupa pitaka kuai lo wete wato mineando, bala saka atapowa atolopeya leaipia.
6 Balato wuane leane tekeko, wandakali mindimane Kataisa lo bilipi leando, Goteto bala tika-pene ateya lolopeya-ko. Apito ati kenga poto, Kataisa atu yuunga epolo-peyape lo nimbato tipa napipe.
7 Dee, apito Kataisa bala malinga ika laya oyale, yuu pangosa wandakali omene atalaini yuu okona polo-peyape lo nimbato tipa napipe. Jia.
8 Gotena pii pepa pelene eya mindimane loto, Gotena pii layene epene okone nimbana nembo-tene okola, ambulini okola, okone-laponga yoto, nimba mandaka eya lo pepa pelene eya.
9-10 Wandakali-mane Jisasa Kataisa lo bilipi leyai-kola, Goteto wandakali utupane tika-pene ateyai lalane. Dee, wandakali-mane Jisasa bala Akali Andane oko ateya lo lapana eyai-kola, Goteto utupane molo-peke lalane. Tene okonena, Goteto Jisasa malinga ika laya yane loto, nimbato Jisasa bala Akali Andane oko ateya lo lapana eendo, Goteto nimba molo-peke lolopeya.
11-12 Akali Andane okomane andeya-kola, Juta yamepi, Gitiki yamepi, wandakali yame pitaka mindiki okonepene teke ateyai lo andalane. Wandakali utupanena minditupa-mane bala ee lo tipa puato, nimbato nanima moyape lo pote leaindo, Akali Andane oko bala utupane pitakana Akali Andane oko atoto, wandakali yame utupane towa mana waka-waka wato mina napiyane. Jia. Balato mana mindiki angu wato minuto, utupane pitaka wayumane wete moyalane. Tene okona, Gotena pii pepa pelene eya mindimane loto, bala lo bilipi lolaini wandakali utupanena mindikipi mindi yala na-olopeyai layene eya.
13 Dee, Gotena pii pepa pelene eya waka mindimane loto, wandakali-mane Akali Andane oko lo pote loto, nanima molo-peke lape lolai-kola, balato utupane pitaka molo-peke lolopeya layene eya.
14-15 Gotena pii okomane wuane leya tekeko, wandakali mindimane akali yangone mindi bala Gotena pii oko wandakali tupa lamalu peakale naleando, anu puato akali okone poto, Gotena pii oko wandakali tupa lamalu-peyape. Akali mindimane Gotena pii oko wandakali tupa lamai napeando, anu puato utupane-mane Gotena pii oko ale olo-peyaipe. Wandakali utupane-mane Gotena pii oko ale nayaindo, anu puato utupane-mane Akali Andane oko lo bilipi lolo-peyaipe. Dee, wandakali utupane-mane bala lo bilipi naleaindo, anu puato utupane-mane pote loto, Akali Andane, nimbato nanima molo-peke lape lolo-peyaipe. Wuane tekeko, akali minditupa-mane Gotena pii oko wandakali tupa lamalu palaini loto, balana pii pepa pelene eya mindimane loto, akali mindimane Gotena pii layene epene oko wandakali tupa lamalu epeya-kola, utupane-mane bala andoto, epele wete alaini layene eya.
16-17 Akali mindimane Kataisato wua peane lo wandakali tupa lamaiya-kola, wandakali tupamane balana pii okone ale wato, Kataisa lo bilipi lalaini. Wuane tekeko, wamba potopisa akali Aisayato pii mindi leane oko loto, Akali Andane, nanimato nimbana pii oko wandakali tupa lamaema-kola, apito pii okone ale wato, bilipi leape leaipia. Aisayato wuane leane okone ale wato, nanimato nembo teyama-kola, Isatale tane wandakali minditupa-mane Gotena pii layene epene okone ale wato teke, Kataisa lo bilipi naleaini nembo teyama.
18 Utupane-mane Kataisa lo bilipi naleaini nembo teyama tekeko, Gotena pii layene epene okone ale nayaini mambele, utupane-mane bilipi naleaipe lo nambato tipa napeyo. Jia. Gotena pii pepa pelene eya mindimane loto, akali minditupa-mane Gotena pii lo tawe yai-kola, wandakali palu peyai tupa pitaka-mane pii okone ale ayiake leaini layene eya. Pii okonemane wuane leya okonena, wandakali utupane pitaka-mane Gotena pii layene epene okone ale ayiake loto teke, Kataisa lo bilipi naleaini nembo teyama.
19 Dee, nambato pii waka mindi tipa puato, wua leyo: Isatale tane tupamane Gotena pii layene epene okona tene oko nembo nateaini mambele, utupane-mane Kataisa lo bilipi naleaipe. Jia. Wamba bulupane Mosesato pii Goteto Isatale tane wandakali tupa lamaiyane oko pepa peyoto, wandakali yame waka tupamane nambana mana anda napene atoto, gene nayene ateyai. Nambato utupane molo-peke lolowa-kola, Isatale tane tupamane utupane towa apiangu puato, nambato yakama molo-peke lapia lakae lo nembo tolopeyai leaipia.
20 Dee, potopisa akali Aisayato yuku naene atoto, pii mindi Goteto leane oko pepa peyoto, wandakali minditupa-mane namba apipe lo wandakali waka tupa tipa napeaini. Utupane-mane wuane lo tipa napeaini tekeko, utupane-mane namba ando meakale lo namba tane utupanenga mo pana ewa-kola, wandakali namba aiya napeaini utupane-mane namba ando meai leaipia.
21 Aisayato wandakali utupane andayo wuane leane tekeko, balato pii mindi Goteto Isatale tane wandakali tupa andayo leane oko pepa peyoto, ole dindi lo utulu otongapi, nambato Isatale tane tupa molo-peke lokale nembo toto, kii pundi pua moto, maliyo atewane tekeko, utupane yakama tuu pua atoto, nambana pii tanga lo ateaini leaipia.