26
Egvu Ajaja
1 O -rua mbọku ono; bẹ egvu, aa-gụ l'alị ndu Júda bụ:
Ayi nweru mkpụkpu, shihuru ike.
Nchileke bẹ gude ndzọta
tụ-phee ya mgburumgburu
l'ọ bụ ụpho-mkpuma.
2 Unu gụhaa ọnu-ọguzo
mkpụkpu ono ghebe iya ọnu.
Unu ghebe iya ọnu;
k'ọphu iphe bụ ndu, doberu ẹka ndoo;
mẹ ndu eegude ire ẹphe ẹka a-wụba.
3 Ii-kebe iya l'ọma;
mbụ onye ono, obu iya nọ l'ẹke ị nọ;
kẹ l'o tukoberu ngu ishi ono.
4 Unu chịru ụkfu kwẹe Ojejoje jeyewaru;
kẹle Ojejoje, bụ Nchileke
bụ iya bụ Agbara-Mkpuma
ono, a-nọ jeyewaru ono.
5 Ndu atụ-li onwẹphe atụ-li; b'ọ lọ-tsutaru;
mebyishia mkpụkpu,
eku onwiya ekuku;
mbụ; mee ya; yọ zẹshia l'alị;
yẹle ẹja atụko nanụ.
6 Ndu e shi akpa ẹhu;
mẹ ndu, ẹ-te nwedu ẹge
ọ haru ẹphe
egude ọkpa adzọ iya lụlalula.
7 Ụzo, ndu doberu ẹka ndoo
eshi ayịkoje ayịko.
Yọ bụru nggụbe onye ono,
obu gụru iphoro ono;
bẹ meru t'ụzo ndu ono,
doberu ẹka ndoo ono kwọo akwọkwo.
8 Nggụbe Ojejoje;
ayi emekpelekwaphu iphe ekemu ngu kfuru;
shi ẹge ono ekoshi l'ọo nggu;
bẹ ayi chịru ụkfu kwẹe.
Iphe, anọduje ehe ayi uhere;
bụ t'ayi mee t'ẹpha ngu dee ude.
9 Obu ngu adụje mu l'ẹnyashi;
o -be l'ụtsu; yọ dụ mu
t'a sụ lẹ mu phụru ngu.
Ọ bụ teke i kperu mgboko ikpe;
bẹ ndu ndiphe a-mụta
iphe, bụ odobe-ẹka-ndoo.
10 Ndu ẹjo iya ono abụjeru;
e -mekpooru nụ ẹphe
eze-iphe-ọma;
ẹphe te gbe amụtadu odobe ẹka ndoo.
Ẹphe -nọdukpoonu l'alị
ndu obu gụru iphoro;
ẹphe emele-e iphe ẹ-te
vudodu nhamụnha.
Ẹphe ta akpadu ishi lẹ Ojejoje ha nshinu.
11 Nggụbe Ojejoje; ị haliwaru ẹka.
Ọ bụ; mẹ ẹphe te gbe phụkwa iya.
T'ẹphe phụnu ẹge okfu-ẹhu
ndibe ngu evube ngu ọku l'ẹhu;
t'iphere gude ẹphe.
Tẹ ọku, ị kwakọberu
kekwaa ndu ọhogu ngu!
12 Nggụbe Ojejoje; ọ bụ nggu
e-me tẹ nchị dụ ayi ndo.
Iphemiphe ọbule, ayi dụru ike mee;
kwa nggu bẹ meru iya ayi.
13 Nggụbe Ojejoje,
bụ Nchileke ayi.
Ndu ọdo shikwa
chịhawa ayi;
obenu l'ọo nggụbedua kpụu;
bẹ ayi abaru ẹja.
14 Ndu ono nwụshihuakwaru; ẹphe ta anọhekwa.
Ẹphe bụkotaakwa maa;
ẹphe ta alụfutahe ọdo.
Ị hụ̀rù ẹphe àhụ̀hù;
mee ẹphe; ẹphe eyifu;
bya emee t'ẹ b'a anyatajẹhe ẹphe anyata ophu.
15 I mewaru ndu ndu alị ayi;
ayi aka l'igwe;
nggụbe Ojejoje.
I mewaru ndu alị ayi;
ayi aka l'igwe.
Nggu eshi ẹge ono mee;
ugvu abụru nke ngu;
nggụbe onye metsuaru
ókè-alị;
yọ kpịribekota akpịribe.
16 Nggụbe Ojejoje;
ọ kwa nggu;
bẹ ẹphe gbakfutaru teke
iphe tsụru ẹphe l'ẹhu.
Teke ịihù ẹphe àhụ̀hù;
bẹ ẹphe rakuru ngu.
17 Ọ bụ ẹge nwanyi, ime eme;
anọduje aghada;
l'echi mkpu;
bụ ẹge ayi shi dụ;
nọdu ngu l'ifu; nggụbe Ojejoje.
18 Ayi shi dụ ime; l'aswịkposhi
onwayi l'ẹke oome ayi ẹhuka.
E mekochaa; yọ dụ l'ayi mụru ìphòró;
kẹ l'ayi ta dụdu ike dzọo ndiphe;
ọphu ayi 'anụdu ẹphe ndzụ.
19 Ndibe ngu, bụ ndu
nwụshihuwaru nụ
e-mekochaa;
teta; nọdukota ndzụ ọdo.
Unubẹ ndu nọkotawa l'ili;
a-wụ-lihu;
gude ẹhu-ọtso-ẹna kpọo gerugeru.
Ii-gude iji nchi-abọhu gụhaa ụzo;
mgboko erufuta ndibe unu;
ndu ọphu shi nwụhuhawa anwụhu.
Aa-dzọ ndu Ízurẹlu
20 Ndu mu; unu tụgbua wụba l'ụlo unu je agụ-chia onwunu ụlo! Unu domia onwunu nwanshịi; jeye teke iphe eghu iya eghughu nshinu e-ghubu iya;
21 kẹ l'agha; unu lekwa-a! Ojejoje shiakwa ẹke, o bu eje alụfuta; t'ọ bya ahụ̀a ndu mgboko àhụ̀hù k'iphe dụ ẹji, ẹphe mekotaru. Mgboko l'ophu e-rufutakota ndu e gburu, nọ iya nụ; mbụ ẹ tọ dụdu ndu e gbushiru, nọ iya nụ, oo-domi edomi.