46
Agwa ndu Bábyilọnu
1 Belu fowaru;
Nébo bẹ fuwaru kpokongu.
Mbụ lẹ ntẹkpe ẹphe ono
bụwa anụ, evu-iphe
yẹle eswi evuje iya.
Mbụ l'iphe o vu anyị
iya ntụmatu;
ẹge ono b'ọ bụru nwanụ,
ike gvụru, evu iya ivu era.
2 Agwa ọbu l'ẹphe ha fuwaru kpokongu;
mbụ chịko futsuaru gọo.
Ọphu ẹphe 'adụdu ike
dzọ onwẹphe.
Ọ bụ ẹge ono; bẹ ẹphe nọ;
e vuru ẹphe laa alị ọdo.
3 “Unu ngabẹduduru
mu phụ nchị;
unubẹ ọnu-ụlo Jékọpu;
mbụ l'ẹge unu ha phọdu
l'ọnu-ụlo Ízurẹlu;
mbụ unubẹ ndu ono,
mu shi keshinu a tsụtaru
ime unu hata ono;
mbụ mu ehekpelephu
unu keshinu a mụru unu.
4 Mbụkpo jeye unu akahụ;
mbụ jeye ẹwo efua unu l'ishi;
bẹ mu bụkpelekwaphu onye mu bụ;
mu bụkpelephu onye gude unu.
Ọ bụ mbẹdua meru unu;
bụru mu a-nọdu apa unu mini ishi-ọba.
Mu e-duta unu gude; dzọo unu ndzụ.
5 ?Bụ onye bẹ unu a-tụru mu yeru?
?Bụ onye bẹ unu a-sụ lẹ mu l'iya ha?
?Bụ onye bẹ unu a-sụ
l'ọ kwa onye dụ ẹge-a
b'ọ dụ t'a tụru yeru mu?
6 O nweru ndu evushije
mkpọla-ododo l'ẹkpa ẹphe.
Ẹphe achịkoo mkpọla-ọcha
tụa l'iphe aatụje iphe.
Ẹphe eje ebuta onye ụzu
mkpọla-ododo t'ọ bya
egude iya kpụtaru ẹphe ntẹkpe.
A -kpụebetsua ya;
ẹphe awata ọbaru iya ẹja.
7 Ẹphe apata iya dẹe l'ukuvu paru.
Ẹphe eje eworu iya gvube l'ọru iya.
Yọ bụru ẹke ono, e gvuberu
iya ono bẹ oo-gvuru.
Ọphu ọ bụdu l'oo-gbe
gbeshighe l'ẹke ono;
a -kpọ-ku iya; b'ẹ tọ zadụ.
To nwe iphe adzọ iya
l'iphe-ẹhuka iya.
8 Unubẹ ndu ono,
emeje iphe Nchileke
sụru t'e b'e meshi ono;
unu nyatakwa iphe-a.
T'ọ nọdukwa unu l'obu!
T'ọ nọdukwa unu l'ọkpoma!
9 Unu nyatakwa iphe
mehawaru nụ l'oge ọhazu.
Ọ kwa mbẹdua bụ Nchileke;
ẹ tọ dụhekwa onye ọdo.
Ọ kwa mbẹdua bụ Nchileke;
ẹ tọ dụhekwa onye ọdo,
dụ l'ọ bụ mu nọnu.
10 Mu eshije l'ọdungu;
mee t'a maru
iphe a-bụru ikperazụ iphe.
Mu shi l'ede-nwede mee
t'a maru iphe e-mekochaa mee.
Iphe mu tuburu e-me;
Yọ bụru iphe mu vu l'obu e-me.
11 Mu jeru l'ụzo ẹnyanwu-ahata
je ekua nwẹnu, erije anụ;
bya ejemihu ẹke teru ẹnya
je ekua onye e-me iphe mu tụberu.
Iphe mu kfuru bẹ mu e-me!
Iphe mu rịru arịri;
bẹ mu e-mekwa.
12 Unu ngabẹru mu nchị;
unubẹ ndu ọkpoma ono!
Mbụ unubẹ ndu ono,
nọru odobe-ẹka-ndoo
ote-ẹnya ono.
13 Teke mu a-dzọ unu
adụakwa ntse.
Ẹ to tehekwa ẹnya nshinu
teke mu a-dzọ unu.
Ẹ ta anọhedu anọno; yo rua.
Mbụ lẹ mu a-dzọ ndu bu
lẹ Ugvu Záyọnu;
woru akpabiri mu nụ ndu Ízurẹlu.”