60
Záyọnu a-dụ biribiri
1 Gbeshi; gbua nwịinwii;
kẹ l'iphoro nke ngu ruwaru!
Mbụ lẹ biribiri Ojejoje
gbeshiwaru nọdu ngu l'ẹhu!
2 Ledudunu;
ọchi a-gbaakwa lẹ mgboko.
Ẹge ono bẹ oke
ẹkpuru-ọchi
a-gbamikota ndu nọ lẹ mgboko.
Obenu lẹ nggụbedua;
bẹ iphoro Ojejoje a-ngashi ẹhu.
Ẹge ono;
bẹ o-gbu-nwịi-nwịi ya
e-he ngu l'ẹhu.
3 Ndu ọhodo a-wụru bya l'iphoro ngu.
Ẹge ono bẹ ndu eze a-wụru
bya anọdukwaphu l'iphoro
nchi-abọhu ngu ono.
4 Paliduduphu ẹnya
lephee mgburumgburu;
nggu aphụ ẹge ẹphe
dzukoberu l'awụ-kfuta ngu;
mbụ; ụnwu ngu unwoke
e-shi ẹke teru ẹnya alata.
Ẹge ono bẹ ẹphe e-hetsuaru ụnwu ngu
ndu k'ụnwanyi ngu l'ẹka ekulataru ngu.
5 Ọ bụ teke ono;
bẹ ịi-phụ iya;
bya egbuchafu egbuchafu.
Ọkpoma awata ngu ome
tupyongu tupyongu;
ẹhu evulaha ngu gidigidi
l'ẹke ẹswa riri ngu ẹhu.
Eeshi l'eze ẹnyimu vutaru ngu ẹku.
Ọ bụ nggu bẹ ẹku
mbakeshi a-wụ-kfuta.
6 Ikpoto ịnya-ivu a-chịko alị ngu naru.
Mbụ ụnwu ophoja
ịnya-ivu, shitsua Mídiya yẹle Efa;
jeyekpo l'iphe bụ ndu ophu
shitsua Sheba a-byakọta.
Ẹphe eguderu ngu
mkpọla-ododo; mẹ ínsẹnsu.
Ẹphe a-nọdu ara iya arara
t'e tu Ojejoje ẹpha.
7 Elu ndu Kéda l'ọ ha;
bẹ ee-rulataru ngu;
ebyila ndu Nebayọtu l'ejeeru ngu ozi.
A nata ẹphe gude gwaa mu l'ẹnya-ngwẹja mu.
Mu eworu eze-ụlo mu mee t'ọ dụ biribiri.
8 ?Bụ ndu ole bẹ awụ-phe l'ọ bụ urukpu;
mbu; l'ọ bụ ndo awụ
gbigbigbi ephe ala l'ẹkfuna iya.
9 Ishi iya abụru lẹ ndu
iku ẹnyimu bụ mu; bẹ ẹphe echeru.
Ụgbo-mini Tashishi liberu vuru ẹphe ụzo;
l'achịlata ụnwu ngu, shi ẹke teru ẹnya.
O vukwaphu mkpọla-ọcha;
mẹ mkpọla-ododo ẹphe; l'alata;
k'ọphu ọo-bụru ugvu,
aakwabẹ Ojejoje, bụ Nchileke ngu;
mbụ onye ono, bụ onye nsọ kẹ Ízurẹlu,
bụ iya meru ngu; nggu adụ biribiri.
10 Ọ bụ ndu shi eshishi
a-kpụkwa-zi ụpho-mkpuma ngu ono.
Yọ bụru ndu eze ẹphe
a-nọdu ejeru ngu ozi.
A makwarụa lẹ mu
gude ọvuma chitsua ngu.
Obenu lẹ mu e-mekocha-a
gude n-yemobu phụaru ngu imiko.
11 Ọnu-ụzo nggụbe mkpụkpu
ono a-nọdu eghekotajeru.
Ẹ ta byadụ bya agụ-chije
iya agụ-chi: eswe l'ẹnyashi;
k'ọphu unwoke e-shitsua
mbakeshi evubataru ngu ẹku.
Yọ bụru ndu eze
ẹphe a-chịjeru ẹphe abya;
12 kẹ l'iphe bụ mba;
m'ọ bụ alị-eze,
a-jịka l'ẹphe te ejeduru
ngu ozi a-bụru kpurupyata;
mbu; ndu ọphu bẹ
ee-me ẹphe achịhu.
13 Biribiri alị Lébanọnu a-byaru ngu:
mbụ l'oshi payịnu; oshi fịru;
mẹ oshi sayịpuresu,
bụkota oshi, nọ iya nụ;
bẹ ee-gude mee tẹ ẹke,
dụru mu nsọ maa mma.
Ẹge ono bẹ mu
e-mekwaphu tẹ ẹke
mu adzọje ọkpa dụ biribiri.
14 Ụnwegirima ndu ono,
akpa ngu ẹhu ono
e-mekochaa bya achịchiaru ngu ọnu l'alị.
Iphe bụ ndu ono,
ẹ-ta gụbedu ngu iphe ono
e-mekochaa bya adaaru ngu pẹe l'iku ọkpa.
Ẹphe e-mekochaa kulahaa
ngu “Mkpụkpu Ojejoje;”
“Záyọnu k'onye nsọ ndu Ízurẹlu.”
15 “A makwaru-a l'a jịkaru ngu;
nggu adụ ashị;
ọphu ọ dụdu onye eshije ngu nụ.
Obenu lẹ mu e-mekocha
mee ngu mkpụkpu,
iphe bụ ọgbo sweru esweswe
e-gude eku onwẹphe;
gude iya ete ẹswa
gbururu jeye lẹ gbururu.
16 Ịi-mị ẹku iphe bụ mbakeshi;
mẹ kẹ ndu eze.
Nggu amaru l'ọo mu,
bụ Ojejoje, bụ Ọkaribe kẹ Jékọpu,
bụru onye adzọje ngu nụ;
bya abụru onye agbatajẹ ngu nụ;
bụ Ọkaribe kẹ Jékọpu.
17 Mu a-nụ ngu mkpọla-ododo l'ọzori ope;
nụ ngu mkpọla-ọcha l'ọzori ígwè.
Mu a-nụ ngu ope l'ọzori nkụ;
nụ ngu ígwè l'ọzori mkpuma.
Nchị-ọdu-ndo;
bẹ mu e-me t'ọ bụru iya
a-nọdu achị ngu;
Odobe-ẹka-ndoo abụru onye ishi ngu.
18 Ẹ to nwedu onye anụkwadu
k'iphe-kpaa l'alị ngu ọdo;
ta anụhe k'ọ-la-l'iyi;
m'ọ bụ kpurupyata l'alị ngu
gbaa mgburumgburu.
Iphe ịi-nọdu eku ụpho-mkpuma
ngu bụ ‘Ndzọta’;
obu-edukfu mkpụkpu ngu abụru ‘Ajaja.’
19 Ẹ tọ bụhedu ẹnyanwu;
bẹ a-bụru ngu iphoro l'eswe;
ọphu ọnwa echiheduru ngu
swachaswacha l'ẹnyashi;
kẹ l'ọ bụ Ojejoje a-bụru
iphoro ngu jeye lẹ gbururu.
Yọ bụru Nchileke ngu ono
a-bụru ọdu-biribiri nke ngu.
20 Ẹnyanwu ta arịbaheduru
ngu arịba;
ọphu ọnwa 'arịbaheduru
ngu arịba; kẹ l'ọ bụ Ojejoje
a-bụru iphoro ngu jeye lẹ gbururu;
nggu agụ-buhu aphụ.
21 Ọ bụ teke ono;
bẹ ndibe ngu a-bụkotaru
ndu doberu ẹka ndoo.
Ẹphe abya enweru alị
ono jeye lẹ tutu yoyo.
Ọ kwa ẹphebedua bụ
iru oshi ono, mu dzabẹru
ono; mbụ ozi, mu gude ẹka mu jee;
t'e gude phụ ẹge mu dụ-be biribiri.
22 Ufu unu ọphu katsụa ọla alị
a-zụ; ghọ ụnwunna.
Ẹge ono bẹ ọphu katsụa
nwanshị a-ghọ eze mba.
Ọ kwa mbẹdua bụ Ojejoje.
Iphemiphe ọbule-a;
bẹ mu e-mekwa ẹgwegwa
teke oge ememe iya ruleruphu.”