19
Ọnu, Jobu eyeru Bilidadu
1 Tọ dụ iya bụ; Jobu abya asụ:
2 “?Nanụ teke unu a-ha mu ọkpa ẹhu?
?Bụ teke ole;
bẹ unu e-gwebuhu mu
ujimu ọwaa, unu gude
ọnu l'egwe mu-a?
3 Ugbo olemole;
bẹ unu kọwaru mu ọnu;
ọphu iphere adụdu unu
l'ẹke unu abya mu l'ifu k'ẹhuka k'ẹhuka.
4 Ọ -bụru oswi-okfu lẹ mu shisweru ụzo;
emeswe ọbu bụnu mu b'ọ dụru.
5 Ọ -bụru l'unu arị l'unu ka mu;
bya egude iphe-ẹhuka,
byaru mu nụ etso mu okfu;
6 unu makwaru l'ọ kwa
Nchileke meru mu ẹji,
yẹbedua gbaru mu ọnya; mu eje adaa ya.
7 Mu echi mkpu l'ọ bụakwa
emegbu b'e emegbu mu;
to nwe onye eyeru mu ọnu.
Mu echi mkpu t'a gbaaru mu mkpu;
tọ dụ onye a-haru mu enge.
8 Nchileke nọ-chiwaru mu ụzo
tẹ mu be esweta;
gude ẹkpuru-ọchi gbachia mu ụzo.
9 Ọ nafụru mu ugvu,
e shi akwabẹje mu;
bya ekputa mu okpu-eze, mu shi kpuru.
10 Ẹ to nwedu ụzo, ẹ-to shidu
l'alawashi mu alawashị jeye teke mu a-gvụ.
Iphe, mu ele ẹnya iya;
bẹ oofefuje l'ọ bụ ọgvu oshi.
11 Ẹhu nwuhuwaru
Nchileke ọku l'ẹke mu nọ.
Ọ gụwaru mu yeru ndu ọhogu iya.
12 Ndu sọja iya awụ
kpọtikpoti abyakfuta mu.
Ẹphe kewaru onwẹphe;
gbaa ufu mu mgburumgburu.
13 O bufuwaru mu l'ẹke,
unwunne mu ndu ọphu nọ;
bya emee tẹ ndu mu l'ẹphe
shi dụ lẹ mma bukahu.
14 Ndu abụbu mu
zefukotawaru mu l'ẹhu.
Ndu ọ̀nyà mu phẹ
azahakọtawa mu nụ.
15 Ndu, shi abyajẹru mu ẹbyee zahashịwaru mu.
Ụnwanyi, shi ejeru mu ozi
elewa mu nụ lẹ̀ mu -laru alala.
Mu dụwa ẹphe lẹ mu -bụ onye mba ọdo.
16 Mu -kua onye ejeru mu ozi oku; tọo zadụ mu;
l'ẹke mu gudekwa ọnu mu l'arọ iya arọro.
17 Udzu ọnu mu gbe eshi nyee mu nshi.
Unwunne mu phẹ;
bẹ mu gbe dụkotawa nụ oyi l'ẹphe ha.
18 Jeye l'ụnwegirima nshịi
anọduje akpọ mu ẹbo-ẹbo l'afụ.
Ẹphe -phụa mu;
ẹphe achị mu ọchi.
19 Ndu mu l'ẹphe shi bụru
'a -phụ mini; 'e me ẹkfu;
bẹ mu dụkotawanu ashị.
Ndu mu yeru obu
nọwanu t'ọ tsụru mu.
20 Nta-a bẹ mu bụwa-a akpọ l'ọkpu.
Ọ bụwa-a ẹ́nyìrù kpụu
bụ eze, phọduru mu l'ọnu.
21 Unubẹ ndu ọ̀nyà mu;
tẹ imiko mu dụru unu;
tẹ imiko mu dụru unu;
kẹ l'ọ kwa Nchileke daru mu ẹka l'ẹhu.
22 ?Nanụhunu ẹge ọ dụ;
bẹ unu gbe achịkwa mu phụ
ẹge Nchileke achị mu.
?Ẹhu ọphu unu akpa mu te edzudua unu tọo.
23 Ọ dụ mu t'a sụ l'iphe-a, mu
ekfu-a bẹ eede edede;
mbụ t'a sụ l'e deru iya edede l'ẹkwo dobe.
24 Ọ dụ mu t'a sụ l'e gude
ígwè dee ya l'eli mkpuma;
mbụ kaa ya akaka l'eze
mkpuma t'ọ nọdu jeye lẹ gbururu.
25 Ọle mu marua lẹ
Onye Ndzọfuta mu nọ-ọ;
l'e -rua l'ikperazụ;
bẹ oo-vudo-o lẹ mgboko-a; gbaaru mu ọdzori.
26 Kẹle teke e mebyishitsuaru akpọ-ẹhu mu-a;
bẹ mu e-gudele-e ẹhu mu phụ Nchileke.
27 Ọ bụ mbẹdua gẹdegede
e-gude ẹnya mu phụ iya;
ẹ tọ bụdu onye ọdo.
Ọogushi mu ẹge ike tẹ teke ono bya.
28 Unu a-gberu; jị:
‘?Nanụ ẹge unu shi achị mu;
l'ẹke ọ kwa mbẹdua;
bẹ iphe eme mu nụ shi l'ẹka.’
29 Unu tsụnuaphu ogu-mbeke ono egvu;
unubẹdua l'onwunu;
l'ọ kwa iya; bẹ Nchileke
egudeje ekoshi
ẹhu-eghughu iya;
k'ọphu unu a-ma l'i kpe nọ-ọ.”