28
1 Ẹke eegvutaje
mkpọla-ọcha egvuta nọ.
Ẹke aanụje iya anụnu anọdukwaphu.
2 Ọ bụ l'alị; bẹ eeshije gvuta ígwè;
bụru lẹ mkpuma;
bẹ eeshije dazeta ope.
3 Ndu egvuta iphe l'alị;
egvuje gvurua ẹke,
gbaru ọchi l'ime ime alị.
Ẹphe egvuje gvurua ẹke,
kakọta ogvu l'ime ime alị ono;
achọ mkpuma ígwè.
4 Ẹphe shi l'ẹke
madzụ bu ebubu l'eli alị;
gvua alị ono jeye l'ẹke
madzụ ta tụbua ọkpa;
nọdu l'ẹke ono,
ẹ-ta dụdu onye bu iya nụ ono atụ eregede.
5 Yọ bụru alị ono, aakọtaje nri ono
b'e jeruru je egvukashia;
yo relahaa phuraphura l'ọ bụ ọku.
6 Mkpuma, nọ l'ẹke ono bụ sáfàyà.
Udzu iya abụru nshị mkpọla-ododo.
7 Ẹ to nwedu nwẹnu,
eri anụ, phejewaru; shia ụzo ẹke ono;
ọphu udele amadụ iya ụzo.
8 Anẹgu-ẹgbudu -kua
onwiya ẹge oo-ku onwiya;
ọkpa iya ta atụdu iya;
ọphu agụ ejedu iya ọkpa nri.
9 Yọ bụru madzụ gude
ẹka iya gvukposhia
agbagbaa mkpuma ono;
gvuta ugvu l'onwiya kpube ifu.
10 Ọoswo-fushije ụzo lẹ mkpuma ono;
gude ẹnya phụkota ẹke
ọono mbụ iphe, vutsua oke ọnu aswa.
11 Ọokpaje ugbo gude gbochia nggele;
t'ẹ b'ọ tsọhe atsọtso.
Yo je ewoshikota iphe,
e shi domia edomi bya
atọgbo iya ebedere-badara.
12 Obenu; ?bụ awe bẹ
aa-phụkwanu mmamiphe.
?Bụ awe bẹ
iphe-odo-ẹnya bu.
13 Ẹ to nwekwa onye maru
ụzo, e shi achọ-vu mmamiphe;
to nwe ẹke ọono
lẹ mgboko ọwaa, madzụ bu-wa.
14 Ebo mini sụru lẹ ya ta
madụ ẹke, mmamiphe nọ.
Eze Ẹnyimu asụ l'ẹ tọ
nọkwa lẹ nk'iya.
15 Mkpọla-ododo, kakọta
ọma mma b'ẹ te
egudeghekwa zụta iya;
ọphu aatụkwanu aswa
iya eyeru mkpọla-ọcha.
16 E te egudeghekwa
mkpọla-ododo Ofi zụta iya;
te egude mkpuma ónìkùsù;
m'ọ bụ sáfàyà zụta iya.
17 Mkpọla-ododo; m'ọ bụ
mkpuma-ẹ́gírí ta atụduru iya.
Ọphu e gudedu iya
agbanweta ụnwu iphe,
e memaru emema,
e gude ọkpobe
mkpọla-ododo meshia.
18 Ẹ te jeduru okfu kẹ
mkpuma koralu;
mẹ jásụ̀pà;
kẹ l'aswa mmamiphe
kakwa aswa mkpuma rubi nshinu.
19 Ẹ te ewotadu
mmamiphe tụru yeru
mkpuma tópàzù, shi l'alị Itiyópiya.
Ọphu e gudeghedu
mkpọla-ododo, dụ-geru mma zụa iya.
20 “?Bụhunu awe;
bẹ mmamiphe shi?
?Bụ awe;
bẹ iphe-odo-ẹnya bu?
21 E domiru iya iphe, bụ
madzụ nwigbaleke-ọma;
domiaru iya jeyekpo lẹ nwẹnu, ephe l'eli.
22 Abádọnu, bụ iya bụ
Nwa-Emebyi yẹle Ọnwu atụko ekfu;
l'ẹphebedua bụkwa
tafutafu iya bẹ ẹphe anụ.
23 Ọ bụphu Nchileke;
bẹ maru ụzo iya.
Ọ bụ yẹbedua kpụu;
bẹ maru ẹke o bu;
24 kẹ l'ọ bụ iya;
bẹ ẹnya eruje l'ẹke mgboko jeberu;
bụru iya aphụkotaje
iphemiphe ọbule, nọ lẹ mkpuli igwe.
25 Ọ bụ teke o meru ike
nụ phẹrephere;
bya atụa mini atụtu dobe;
26 b'ọ tụru ekemu dobe;
l'ọo ẹge-a bẹ igwe
e-gudeje achị mini;
bya atọoru egbe-igwe ụzo.
27 Ọ bụ teke ono b'o leru
mmamiphe ẹnya;
bya emee ya;
yọ ngụru angụru;
bya adata iya;
28 bya asụ madzụ:
‘L'ọ kwa ọtsu
Nnajiufu egvu bụ mmamiphe;
osefu ẹka l'iphe dụ ẹji
abụru iphe-odo-ẹnya.’ ”