3
Okfu, shi Jobu l'ọnu
1 E mekochaa; Jobu awata okfu okfu; bya awata oburu mbọku, a mụru yẹbe Jobu ọnu.
2 Yọ sụ:
3 “Tẹ mbọku, a mụru yẹbe Jobu;
mẹ ẹnyashi mbọku, a sụru:
‘L'ọ kwa nwata nwoke
b'a tsụtaru ime iya;’
bụkwaru iyi.
4 Tẹ mbọku ono
gbahụkwa ọchi!
Tẹ Nchileke, bu l'igwe
zahakwaa mbọku ono.
T'iphoro ba adụkwa mbọku ono.
5 Tẹ mbọku ono
gbahụkwa tsụbalangu!
T'ọ bụkwaru urukpu
e-kpupyabe iya!
Tẹ mbọku ono gbahụkwa tsụbalangu!
6 Tẹ ikpikpirikpi ọchi nakwaa
ẹnyashi mbọku ono.
T'ẹ b'a gụkwaru mbọku ono
ye l'eswe, nọ l'afa;
ọphu a gụkwaru iya ye l'eswe, nọ l'ọnwa!
7 T'ẹnyashi mbọku ono
bụkwaru mbọku,
gba ẹka nwa!
T'ẹ b'ọ dụkwa okokooko
k'ẹhu-ọtso-ẹna,
aa-nụ mbọku ono!
8 Tẹ ndu atụje ụboku ọnu
tụkwaa mbọku ono ọnu;
mbụ ndu maru ẹge ẹphe
ee-shi kpa-tsua ẹjo agiyi.
9 Tẹ mkpọ-kpodo nchi-abọhu iya
gbahụkwa ọchi.
T'o lekwaa ẹnya lẹ
nchi abyawa abọhu;
teke e metsuaru
t'ọ bụru iya kẹ mmanu;
ọphu ọ phụkwa
gẹrigeri nchi-abọhu aphụphu lẹ phuu;
10 kẹ l'ẹ to swọ-chidu nne mu ẹpho
t'ẹ b'a mụ mu mbọku ono;
k'ọphu mu a-dalahu l'egbe iphe-ẹhuka ọwaa.
11 ?Bụnua ngụnu meru iphe,
mu ta nwụhudu nne mu l'ẹpho;
mbụ; nwụhu teke mu daru l'alị?
12 ?Bụnua ngụnu meru iphe
nne mu heru mu hefuta?
?Bụ ngụnu meru iphe o cheru mu ẹra iya;
13 kẹle nta-a bẹ mu ga azẹruru nwandoo;
nọdu lẹ mgbẹnya;
l'atụta ume nwa nggujingguji;
14 mu lẹ ndu eze; mẹ ndu ishi,
bụ ndu kpụshitsuaru onwẹphe ụlo;
yọ dabutsuaru ochobo nta-a.
15 Mbụ; mu lẹ ndu a-chị nụ,
bụ ndu shi nwegbaaru mkpọla-ododo;
dojishia mkpọla-ọcha edoji l'ụlo ẹphe.
16 Ọdo abụru;
?bụ ngụnu kparu iphe,
ẹ te lidu mu l'ọ bụ nwata-une;
mbụ l'ọ bụ nwata, ẹ te kpuhadu ẹnya;
k'ọphu iphoro?
17 L'ẹke ono; bẹ ndu iwe
a-kpabuhu madzụ ẹhu;
a haa ndu ike gvụru
t'ẹphe tụta ume.
18 L'ẹke ono; bẹ ndu mkpọro
tso lẹ ndu nọ iya nụ atụta ume.
Ẹphe ta anụhedu olu ndu
anọduje achị ẹphe l'ọ bụ ohu.
19 Ndu ha nwanshị nọ l'ẹke ono;
ndu ha nshinu anọdu iya;
ọphu ohu 'anọhedu nnajiufu iya l'ẹka.
20 ?Nanụ ẹge ọ dụ;
bẹ iphoro nọru ndu ejegbu
onwẹphe l'iphe-ẹhuka;
?l'aahajẹ ndu aphụ byaru
t'ẹphe nọdu ndzụ;
21 mbụ ndu anwụhu agụ;
to kwe abyabya;
mbụ ndu achọ anwụhu
l'ọ bụ ẹku, e domiru edomi;
22 mbụ ndu eteje ẹswa;
mee ẹmirima teke
e yeru ẹphe l'ime ili.
23 ?Bụ ngụnu kparu iphe
aa-ha onye ẹ ta madụ ẹke,
ooshi eshishi t'ọ nọdu ndzụ;
mbụ onye
Nchileke yebudowaru;
yọ kwaa l'ọ bụ onye
nọ l'ime mgbabu;
24 kẹ l'aphụ bụwa mu nri;
ude, mu atsụ adụwa l'ọ bụ
ẹke mini atsọshi.
25 Iphe, mu shi kagee ọtsuta
egvu bụ iphe, megeeru byaru mu;
iphe ono, ẹhu anmajẹ mu
anmanma l'ẹke ọ nọ ono
emekochaa mee mu.
26 Mu ta amabụa iphe bụ ẹhu-agu;
mu ta ma iphe bụ
ọnodu nggujingguji;
mu ta ma iphe bụ ọtuta ume.
Ọ bụlephu iphe-ẹhuka.”