5
Egvu, Debóra mẹ Baraku agụru Nchileke
1 Ọwaa egvu, Debóra yẹle Baraku Abinowamu gụru mbọku ono:
2 Ndu bụ ndu ishi ndu Ízurẹlu
vutaru ụzo ọgu.
Ndu Ízurẹlu awụ-lihu tsoru ẹphe.
Unu jaa Ojejoje ajaja!
3 Unu nụa iphe-wa;
unubẹ ndu eze!
Unu ngabẹkwa nchị;
unubẹ ndu ishi;
Mu a-gụru Ojejoje egvu;
Mu a-gụ egvu;
gude jaa Ojejoje,
bụ Nchileke kẹ ndu Ízurẹlu ajaja!
4 Nggụbe Ojejoje;
teke ị gbalihuru l'alị Séyi;
dzọru lụfu l'ọnu-ogo
ndu Édọmu;
bẹ mgboko tehuru kfụkakfuka;
igwe erua eruru; wa mini.
5 Iphe bụ ugvu, nọnu;
jeyekpo lẹ Ugvu Sáyịnayi
nmakọtaru jijiji l'ifu nggụbe Ojejoje;
mbụ l'ifu nggụbe Ojejoje,
bụ Nchileke kẹ ndu Ízurẹlu.
6 L'oge kẹ Shamụga Anatụ;
mẹ Jeyẹlu; b'a gwọberu
oshi ọkpobe ụzo;
ndu ije epyolahaa ntubo.
7 Iphe, bụ mkpụkpu,
nọ lẹ Ízurẹlu adaburu ochobo;
jeye Debóra alụfuta;
bya abụru nne ndu Ízurẹlu.
8 Teke ẹphe hataru
agwa ọphungu;
bẹ ọgu dalahaaru l'alị
Ízurẹlu mgburumgburu.
Tọ dụ m'ọo iphe mgbochi-ọgu;
ọ dụdu bụru arwa, a phụru
ndu Ízurẹlu l'ẹka k'ọgu.
9 Obu mu nọkwa l'ẹke ndu ishi
ndu Ízurẹlu nọ; mbụ ndu
ono, chịru obu ẹphe;
wofuta onwẹphe ono.
Unu jaa Ojejoje ajaja!
10 Unu kfukwaa ya; unubẹ ndu
agba nkakfụ-ịgara ọcha;
nọdu l'eli ukpo, e gude
dozia nkakfụ-ịgara;
mẹ unubẹ ndu eje l'esu-ụzo.
11 Unu geedukwa olu-egvu
ndu ono, agụ egvu l'ẹke
eeku mini ono!
Ọ bụ l'ẹke ono;
bẹ ẹphe nọ l'agụ iphe,
vudo nhamụnha,
Ojejoje mekotaru;
mẹ l'iphe vudo nhamụnha,
ndibe iya, bụ ndu Ízurẹlu mekotaru.
Tọ dụ iya bụ; ndibe Ojejoje
awụru jeshia l'obu-edukfu
mkpụkpu ono.
12 “Gbeshi egbeshi; Debóra!
Gbeshi egbeshi; gụa egvu!
Gbeshi egbeshi; Baraku;
duru ndu ị lụtaru l'ọgu tụgbua;
nggụbe nwatibe Abinowamu!”
13 Ndu ọphu phọduru nụ
awụ-kfuta ndu ọnu eru l'okfu.
Ndibe Ojejoje awukfuta mu
t'ayi tso ndu ike nọ l'ọgu ọgu.
14 Ndu Ífuremu, bụ ndu
gbaru ọgvu l'alị Ugvu
Amalẹku awụfuta tsoru
nggụbe Bénjaminu;
nggu lẹ ndu nke ngu.
Ndu ishi sọja, shi Makiru awụfuta.
Ndu Zébulọnu, bụ ẹphe
gude mgbọro onye ishi sọja awụfuta.
15 Ndu ishi ndu Ísaka etsoru Debóra;
ẹge ono bẹ ndu kẹ Ísaka
tsokwaruphu Baraku
wụba lẹ nsụdata ugvu ono.
Obenu lẹ ndu ikfu Rúbẹnu;
bẹ ọkpoma agba iche l'iche.
16 Ndibe Rúbẹnu; ?bụ ngụnu
bẹ unu dọru l'ọdu-atụru eme?
?Bụ t'unu nụa opu,
ndu eche atụru aphụ tọo?
Ndu ikfu Rúbẹnu;
bẹ ọkpoma
agba iche l'iche.
17 Ndu Gíledu bẹ kwaru l'azụ Ẹnyimu Jọ́danu.
Unubẹ ndu Dánu;
?bụ ngụnu
kparu iphe, unu je
arịretsuaru l'ụgbo-mini.
Ndu Ásha akwaa l'iku ẹnyimu;
l'iku ọdu ụgbo-mini.
18 Ndu Zébulọnu tufaru ndzụ;
hata ọnwu.
Ẹge ono bẹ ndu Náfutali
tufakwaruphu ndzụ;
hata ọnwu;
yọ bụru ẹphe oje ọgu ono.
19 Ndu eze byaru bya alụa ọgu ono.
Ndu eze ndu Kénanu
byaru bya alụa ọgu lẹ
Ténaku; mẹ lẹ mini Megido;
ọphu ọ dụdu iphe, ẹphe
lụtaru; mbụ m'ọo shịshi.
20 Mkpọ-kpodo shi l'imigwe
bya ọgu;
Ẹphe shi l'ẹke ẹphe eshije
bya etso Sizéra ọgu.
21 Ẹnyimu Kishọnu;
mbụ ẹnyimu ndiche ono
abya ekpota ẹphe.
Obu shihuru mu ike;
tẹ mu dzọru tụgbua!
22 Igidi ọkpa ịnya Sizéra
ada l'ọ bụ egbe-igwe.
Yọo gbagbaa kẹ
kwago-kwago.
23 Ojozi-imigwe Ojejoje sụru:
“Tẹ mburọnu bụru kẹ ndu
Merọzu; kẹ l'ẹphe ta byadụ
oyetaru Ojejoje ẹka l'ọgu;
mbụ yetaru Ojejoje ẹka
lụa ndu ike dụ l'ọgu.”
24 Tẹ Jeyẹlu, bụ nyee
Heba kẹ Kenu bụkwaru
onye aa-kage ọgoru ọnu
l'iphe bụ ụnwanyi.
T'ọ bụru iya bẹ ugvu
a-kage etsotso l'iphe,
bụ ụnwanyi, bu l'ụlo-ẹ́kwà.
25 Sizéra raru ọra mini;
yọ nụ iya mini ẹra-eswi.
Yo metaru iya manụ
ẹra-eswi, e yeru l'iphe,
gbaru ndu oke amadụ.
26 Ọ dzụ-liru ụlo-ẹ́kwà;
bya egude ẹka-ụtara
palia ọngu ndu ozi;
kpọbe iya Sizéra l'ishi-nchị;
kpọo ya ishi yọgiriyogiri.
27 Yọ bụru iya gwọkfungu l'iku ọkpa;
daa; daburu l'ẹke ono.
Ọ bụ l'iku ọkpa iya
b'ọ gwọshihuru.
Yọ bụru l'ẹke ono,
ọ gwọshihuru ono
b'ọ nọdu nwụhu.
28 “Nne Sizéra eshi lẹ windo
pyofu ẹnya; nọdu l'azụ
windo ono l'ara; sụ:
‘?Bụ ngụnu kparu iphe,
ụgbo-ịnya iya
ta latadu keshinu ono?
?Bụ ngụnu meru iphe,
ẹ ta anụdu ụkporo, ọkpa
ụgbo-ịnya iya eme keshinu ono?’
29 Ndu ọphu kagee ọmaru iphe
l'ụnwanyi, ejeru iya ozi azụru yeru iya.
Yẹbedua ekfukwaphu eyeru onwiya.”
30 Ẹphe asụ iya: ?Tọ bụdu
ọkwata; bẹ ẹphe akwa;
l'ekekwaphu ọphu ẹphe lụtaru.
Unwoke; bẹ ụnwu-mgbọko
a-gba nanụ nanụ;
m'ọ bụ ẹbo ẹbo.
Sizéra eketatsua uwe,
a dzụru; dengashia ya edengashi;
ụnwanyi ono e-yeje.
31 “Tẹ ndu ọhogu nggụbe
Ojejoje bụkwaru kpurupyata.
Ọlobu; tẹ ndu yeru ngu obu
dụkwa l'ọ bụ ẹnyanwu-ahata;
l'echi taataa teke ọ hafụtaru.”
Yọ bụru iya bụ lẹ nchị adụ ndoo l'alị ono ụkporo afa ẹbo.