19
Eekfu l'aa-dzọta Jerúsalemu
(Azá 37:1-37)
1 Hezekáya anụlephu iphe ono; woru uwe iya lajashịa; chịta uwe-aphụ yee; yọ bụru iya oje l'eze-ụlo Nchileke.
2 Yọ bya ezia Ẹliyakimu, bụ onye ishi l'ufu-eze; mẹ Shebuna, bụ o-de-ẹkwo; mẹ ndu bụ ishi lẹ ndu achịjeru Nchileke ẹja; t'ẹphe jekfu onye nkfuchiru Nchileke, bụ Azáya Emọzu. Ẹphe atụko l'ẹphe ha yee uwe-aphụ jeshia.
3 Ẹphe erua; je asụ iya: “Ọwaa iphe Hezekáya kfuru. Ọ sụru: ‘Lẹ ntanụ ọwaa bụkwa mbọku oke iphe-ẹhuka; bụru mbọku, aahụ̀ ayi àhụ̀hù; bya abụru mbọku iphe-iphere. Ayi dụkwa l'ọ bụ nwanyi ime eme; tọ dụ ike nyịa mgbụ; mụa nwa iya.
4 ?Onye maru; Ojejoje, bụ Nchileke ngu -nụru iphe ono, Rabushake kfuru ono; mbụ onye ono, nnajiufu iya, bụ eze ndu Asiriya yeru t'ọ bya ekfutoshia Nchileke ono, nọ ndzụ ono; k'ọphu bụ lẹ Ojejoje a-baru iya m̀bà l'okfu ono, yẹbe Ojejoje, bụ Nchileke ngu nụru ono. Bụnu iya bụ t'i kfuru nụ Nchileke l'okfu ẹhu ndu ọphu wafụru nụ.’ ”
5 Tọ dụ iya bụ; ndu ono, eze, bụ Hezekáya ziru ono abya byakfuta Azáya.
6 Azáya asụ ẹphe: “Unu kfuru ọga unu lẹ Ojejoje sụru: ‘T'ẹ b'ọ tsụkwa egvu lẹ k'iphe ono, ọ nụru ono; mbụ okfu ono, ndu ozi eze ndu Asiriya gude bya ekfutoshia yẹbe Ojejoje ono.
7 Ngabẹkwa nchị; l'o nweru ume, ya e-ye iya l'ẹhu; k'ọphu bụ: ọ -nụa kekfukekfu; yọ gbalaa; lashia alị iya. L'alị iya ono bẹ ya e-me t'e gude ogu-mbeke gbua ya.’ ”
8 Rabushake abya anụa l'eze ndu Asiriya lụfuwaru lẹ Lakíshi; tsụ-phu azụ jekfushia eze ono l'ẹke o jeru ndu Libina ọgu.
9 Ya ndono; Senákeribu, bụ eze ndu Asiriya abya anata ozi lẹ Tirihaka, bụ eze ndu Itiyópiya abyaru iya ọgu; zifu ndu ozi iya t'ẹphe je kẹ Hezekáya:
10 “Iphe, unu e-kfuru Hezekáya, bụ eze ndu Júda bụ: ‘T'ẹ b'o kwekwa tẹ Nchileke iya, bụ onye ono, ọ dakoberu ono duphua ya; l'ẹke ookfu lẹ Jerúsalemu taa ladu l'ẹka yẹbe eze ndu Asiriya.’
11 Ọphu doru ẹnya bụ l'ị nụhawaru iphe ndu eze ndu Asiriya mehawaru ndu alị ọdo; mbụ l'o kpochafuru ẹphe. ?Buchia nggụbedua bẹ ee-gbe nafụta tọo?
12 Iphe bụ mbakeshi ono, nna iya oche ẹphe laru l'iyi ono; ?o nweru agwa ẹphe ono ọphu nafụtaru ẹphe tọo? Mbụ agwa ndu Gozanu; kẹ ndu Háranu; kẹ ndu Rezefu; mẹ kẹ ndu Ídẹnu, bụ ndu shi nọdu lẹ Telasa.
13 ?Bụ awe bẹ eze ndu Hámatu nọ nta-a; mẹ eze ndu Apadu; eze ndu Sefavemu; eze ndu Hena; mẹ eze ndu Iva?”
Hezekáya ekfu anụ Ojejoje
14 Tọ dụ iya bụ; Hezekáya nata ẹkwo ono l'ẹka ndu ozi ono bya eworu iya gụa. Yọ bya abahụ l'eze-ụlo Nchileke je atọsaa ẹkwo ono l'ifu Ojejoje.
15 Hezekáya abya ekfuru nụ Ojejoje; sụ iya: “Nggụbe Ojejoje, bụ Nchileke kẹ ndu Ízurẹlu, bụ onye dụgaru l'aba-eze iya l'echi cherobimu. Ọ bụ nggu nkịnyi ngu bụ Nchileke, nwekota alị-eze, nọ lẹ mgboko mgburumgburu. Ọ bụ nggu meru igwe; mee eliphe.
16 Ngabẹnu nchị nggụbe Ojejoje; nụa iphe, ya ekfu. Sanụa ẹnya phụduduphu. Ngabẹkpoduaphu nchị; nụa ozi ono, Senákeribu ziru t'e gude bya ekfutoshia nggụbe Nchileke, nọ ndzụ ono.
17 “Nggụbe Ojejoje; ọ kwa oswi-okfu lẹ ndu eze ndu Asiriya mebyishiwaru iphe bụ mbakeshi; mebyishia alị ẹphe.
18 Ẹphe chịwaru agwa ndu ono ye l'ọku; kepyashia ya; kẹ l'agwa ẹphe ọbu ta bụdu chi; gbahaa nkụ; mẹ mkpuma, bụ iphe, madzụ gude ẹka mee.
19 Nta-a; nggụbe Ojejoje, bụ Nchileke ayi; dzọfuta nụ ayi l'ẹka eze ndu Asiriya; k'ọphu alị-eze, nọkota lẹ mgboko l'ọ ha a-maru l'ọ bụ nggụbedua kpụ; mbụ nggụbe Ojejoje bẹ bụ Nchileke.”
Àphụ̀ Azáya l'ẹge Senákeribu e-gude daa
20 Tọ dụ iya bụ; Azáya Emọzu abya ezia Hezekáya; sụ iya: “Ọwaa iphe Ojejoje, bụ Nchileke kẹ ndu Ízurẹlu kfuru: Ya nụwaru iphe, i kfuru nụ iya l'okfu ẹhu Senákeribu, bụ eze ndu Asiriya.
21 Ọwaa iphe, Ojejoje kfuru l'okfu ẹhu Senákeribu:
“Ụnwegirima Záyọnu
aja ngu ewena;
to nwe iphe ẹphe gụberu ngu.
Ụnwegirima Jerúsalemu
anọdu l'e-kwe l'ishi l'ishi
l'ẹke ịigba ọso ndzụ.
22 ?Bụ onye bụ onye ono,
i shi agba okfu ọgba egbe;
l'ekfubyishi ono.
?Bụ onye b'i shi atụ ụzu ekpu;
l'ẹke iiku onwongu.
Ọ kwa Onye dụ nsọ kẹ Ízurẹlu!
23 I ziru ndu ozi ngu;
ẹphe abya egude ọnu nmaa
Nnajiufu phulaphula.
Ị sụru l'i gudewa ụgbo-ịnya
ọgu ngu, zaru ntụmatu
naa naa jeye l'ugvu ugvu.
L'ẹke ono b'ị sụru l'i
gbutsushiru oshi sida iya
ndu ọphu katsụa l'eli;
gbutsushia oshi payịnu iya
ndu ọphu kakọta ugvu l'ẹnya.
B'ị bya ejerua ẹke ọ katsụa
ọburu ẹkfukala;
mẹ ẹke ọ katsụa ọburu ọswa, dụ mma.
24 Ya tụwaru wẹlu l'alị
ndu ọhodo; ngụa ya mini;
bya egudewa ọbechere-ọkpa
iya dzọo iphe, bụ nggele,
nọ l'alị Íjiputu; yọ tashịhu.”
25 ?Ọ dụ l'ẹ tị nụhadua lẹ ya
mehawaru iphe ọwaa
ẹge ọo-dụ teke teru etete.
Ọ bụ l'oge ndiche;
bẹ ya chịru idzu iya dobe.
Yọ bụru nta-a;
bẹ ya meru iya t'o ree;
mbụ mee;
nggu eworu mkpụkpu,
a kpụru; yo shihugbaa ike mebyishia;
yọ bụru ikpo mkpuma.
26 Yọ bụru iya bụ l'ike agvụ
ndu bu iya nụ;
Ya emee ẹphe;
ẹphe emehu ririri;
kpọo beru.
Ẹphe abya adụ l'ọ bụ iphe,
a kụru l'okfu; mbụ; l'ọ bụ iphe,
ruru iru k'ọphungu;
dụ l'ọ bụ ẹswa, furu l'okpotsu
ụlo, anwụ chigbushiru
l'ẹ ba adụ ẹge o vutaberu l'eli.
27 Obenu lẹ nggụbedua;
bẹ ya magheru amaghe.
Ya maru teke ịidugaru adụgaru;
maru teke ịilufu alụfu;
maru teke ịibata abata;
bya maru ẹge iitsutaberu iya ẹka l'ọkpoma.
28 Keshinu ọ bụ yẹbe Nchileke;
bẹ iitsuru ẹka l'ọkpoma;
l'ekfuru iya gbaphugbaphu;
bẹ ya e-gude ịkokoro iya
dzụpyabe ngu imi;
woru mkpụrumkpu igwe
ye ngu l'ọnu l'ọbu ịnya.
Ya e-mee ngu t'i shia ọphu
i shi laphu azụ l'ẹke i shi.
29 Nggụbe Hezekáya;
ọwaa iphe, a-bụru ngu
iphe-ọhubama:
“Afa-a bẹ ii-ri iphe, daru ẹda.
Afa ọdo; nggu eria ọphu shi l'ono.
O -rua l'afa k'ẹto ya;
nggu akọo okfu; kpata iya;
nggu agbaa mgbo vayịnu;
ria iphe, shi iya nụ.
30 Nwa ndu, a-phọdu nụ
lẹ Júda; a-gba akwara l'ime alị;
mịa nebyi l'elikoro.
31 Mkpata iya abụru l'o nwerua
nwa ndu a-wafụ nụ lẹ Jerúsalemu;
nweru nwa ndu ọphu e-shi
lẹ Ugvu Záyọnu wafụ.”
Ọ bụ Ojejoje, bụ Ọkaribe-Kakọta-Ike e-gude ẹge ọ ru-beru iya l'ẹhu mee t'ọ dụ ẹge ono.
32 Ọwaa iphe, Ojejoje kfuru
l'ẹhu eze ndu Asiriya:
“Ẹ tọ hadu kẹ
bata lẹ mkpụkpu-a;
ọphu 'ọ gbadụ m'ọo
akfụ lanụ l'ẹke-a.
Ẹ too gudedu iphe,
eegbobutaje onwonye bya iya ifu.
Ọphu 'ọ gvudu iya ose-ọgu.
33 Ọ bụ ụzo, o shi bya;
bẹ oo-shi laa.
Ẹ tọo batadu mkpụkpu ọwaa lẹ phuu.”
Ono kwa iphe, Ojejoje kfuru ndono.
34 “Ya e-gude okfu k'ẹpha iya;
mẹ okfu ẹhu Dévidi,
bụ nwozi iya gbochita
mkpụkpu-a; dzọo ya.”
35 Ya ndono; yo be l'ẹnyashi iya; ojozi Ojejoje atụgbulekwaphu jeshia l'ọdu sọja ndu Asiriya; je egbua ẹphe ụkporo ụnu ndu sọja ugbo iri l'ẹbo; l'ụkporo ndu sọja iri. A lụfuta l'ụtsu; odzu azẹshiwa rẹkperekpe.
36 Ya ndono; Senákeribu, bụ eze ndu Asiriya atụgbua; ye ifu l'ẹke o yeru iya; laphushia azụ lẹ Nínive je anọdu.
37 Yo be ujiku lanụ; l'ọ gwa nte iya, bụ Nịsuroku; ụnwu iya; mbụ Adụrameleku; mẹ Sharéza egude ogu-mbeke gbugbua ya; gbalaa lashia Araratu. Esahadọnu, bụ nwatibe iya abya abụru eze nọ-chia ẹnya iya.