16
1 Tọ dụ iya bụ; ẹphe apabata Okpoko Ọgba-ndzụ Ojejoje ono; bya edobe iya l'ime ụlo-ẹ́kwà ono, Dévidi kpọberu t'e dobe iya ono. Ẹphe abya egwoo ngwẹja-ukfuru; mẹ ngwẹja ẹhu-agu l'ifu Nchileke.
2 Dévidi egwotsulephu ngwẹja-ukfuru; mẹ k'ẹhu-agu ono; bya egude ẹpha Ojejoje gọoru ndu Ízurẹlu ọnu.
3 Yọ bya ekeeru ndu ono ishi buredi nanụ nanụ l'ẹhu l'ẹhu; mẹ ọkpurukpu anụ; mẹ akara, e meru l'akpụru vayịnu; kedzuru iya ndu Ízurẹlu l'ẹphe ha: unwoke l'ụnwanyi.
4 Yọ bya aharụ ndu Lívayi fọta t'ẹphe jeje ozi l'ifu Okpoko Ọgba-ndzụ Ojejoje ono; mbụ t'ẹphe rọje Nchileke iphe; tuje iya ẹpha; jajẹ Ojejoje, bụ Nchileke kẹ Ízurẹlu ajaja.
5 Ásafu bụ ishi; Zekaráya abụru otsota. Ndu ọdo bụ: Jeyẹlu; Shemiramọtu; Jehiyẹlu; Matitíya; Eliyabu; Benáya; Óbẹdu-Édọmu; mẹ Jeyẹlu. Ẹphebedua a-nọduje akpọ une; mẹ ogumogu. Ásafu akụ ogele.
6 Benáya yẹle Jazẹlu, bụ ndu achịjeru Nchileke ẹja a-nọduje egbu ụpyoku tekenteke l'ifu Okpoko Ọgba-ndzụ Ojejoje ono.
Egvu-ekele
(Egvu 105:1-15; 96:1-13; 106:1, 47-48)
7 Mbọku ono bẹ Dévidi vuru ụzo kfuaru Ásafu; mẹ ndu egvu iya t'ẹphe gụa egvu ekele nụ Ojejoje.
8 Unu kele Ojejoje ekele;
unu kpọ-kua ẹpha iya!
Unu mee t'iphe bụ
mbakeshi madzuru iphe,
o mekotaru!
9 Unu guku iya l'egvu;
unu gụa egvu gude tua ya ẹpha!
Unu kfukashia iphe bụ
iphe, dụ biribiri, ọonoduje eme!
10 Unu gude ẹpha iya ono,
dụ nsọ ono kua onwunu ekuku!
T'obu ndu achọ Ojejoje
teje ẹswa!
11 Unu wojeru ẹnya dabẹ lẹ
Ojejoje; mẹ l'ọkpehu iya!
Unu achọje ifu iya tekenteke!
12 Unu nyatakwa iphe,
dụ biribiri, o meshiru;
iphe-ọphulenya,
o meshikotaru;
mẹ ikpe, o kpekotaru.
13 Unubẹ ndu eri Ébirihamu,
bụ nwozi iya;
unubẹ ụnwu Jékọpu,
bụ ndu o gude ẹka iya fọta!
14 Ọ kwa iya bụ Ojejoje
bya abụru Nchileke ayi;
Ikpe iya tụko
mgboko vọo kfurukfuru.
15 Ọgba-ndzụ iya bẹ ọonyataje
jeye lẹ tutu mịmimi.
Ukwe iphe, o kweru bẹ anọje
shita l'ọgbo sweru ọgbo.
16 Ndzụ yẹle Ébirihamu gbarụ;
mẹ angụ ono, o riburu Áyizaku
17 b'o meru; yọ bụru ekemu l'ẹhu Jékọpu;
Ndu Ízurẹlu b'o meru;
yọ bụru ọgba-ndzụ,
a-nọ gbururu jeye;
18 sụ ẹphe: “Ọ bụ unu;
bẹ ya a-nụ alị Kénanu
t'ọ bụru òkè-iphe, unu ketaru.”
19 Teke ẹphe shi habe ahabe;
mbụ teke ẹphe shi bụru
kpakọru-chịta;
bụru ndu nlamụnla l'alị ono;
20 ephe shi eshije l'ọha ọwaa;
lụfu l'ọphu;
shi eshije l'alị-eze ọwaa;
lụfu l'alị-eze ọphu;
21 ọphu ọ dụdu onye
o kweru t'ọ kpaa ẹphe ẹhu.
Yọ bụru okfu ẹhu ẹphe;
bẹ oogudeje baarụ ndu eze mba;
22 sụ ẹphe:
“Unu be edenyikwa
ndu nk'iya, e teru manụ ẹka;
ọphu ọ dụkwa iphe,
unu e-me ndu ekfuchiru iya!”
23 Unu gụa egvu nụ Ojejoje;
unubẹ eliphe l'ophu!
Unu rajẹ iya arara
mbọku-mbọku l'ọodzoje madzụ!
24 Unu tụaru ndu ọhodo ọnu
ẹge ọ dụ-be biribiri;
unu ekfuaru ndiphe l'ophu
iphe, dụ biribiri, oomeje.
25 Ishi iya abụru lẹ
Ojejoje parụ ẹka;
bụru onye gbaru
t'a jajẹ iya oke ajaja.
Ọ gbakwarụphu t'a tsụje iya egvu,
kariru kẹ agwa.
26 Kẹ l'agwa ndiphe l'ophu;
bẹ bụkota ntẹkpe.
Obenu l'ọo Ojejoje;
bẹ meru igwe.
27 Akpabiri yẹle
o-gbu-nwịi-nwịi; bẹ nọ iya l'ifu.
Ike waa ẹhu-ọtso-ẹna
tụko ẹke o bu dzuru.
28 Unubẹ ikfu l'ikfu,
nọ lẹ mgboko-a;
unu kwabẹ Ojejoje ugvu!
Unu kfua ẹge oogbube
nwịinwii yẹle ẹge
ọkpehu iya habe nshinu!
29 Unu kwabẹ Ojejoje ugvu,
gbarụ ẹpha iya.
Unu wotaru iya iphe.
Unu yee ọdu nsọ l'ọ bụ uwe;
baarụ Ojejoje ẹja.
30 Unubẹ ụnwu eliphe l'unu ha;
unu nmahụkwa iya kpakpakpa l'ifu.
Mgboko b'e mewaru;
yọ ngụru angụru.
Ẹ-tọ nwedu iphe,
ha kẹ enwubata iya.
31 Tẹ imigwe l'ophu tee ẹswa;
ẹhu atsọo eliphe l'ophu ẹna.
T'ẹphe karụ iphe bụ mbakeshi
l'ọo Ojejoje bụ eze.
32 T'eze ẹnyimu tụa oke eyii;
mẹ iphe, bụ iphe, nọ iya nụ.
T'ẹgu, ẹke e meberu iphe
tee ẹswa yẹle iphemiphe ọbule, nọ iya nụ.
33 Ono teke iphe, bụ oshi,
nọ l'ọswa a-gụ egvu
ẹhu-ọtso-ẹna l'ifu Ojejoje.
Ishi iya abụru l'ọobyawa
okpe ụnwu eliphe ikpe.
34 Unu kele Ojejoje ekele;
kẹ l'ọ bụ onye ọma!
N-yemobu iya anọje
gbururu jeye lẹ gbururu.
35 Unu raku iya; sụ iya:
“Nafụtanu ayi;
nggụbe Nchileke,
bụ Onye ndzọfuta ayi!
Rukobenu ayi;
dzọfuta ayi l'ẹka ndu ọhodo;
k'ọphu ayi e-gude ẹpha ngu
ono, dụ nsọ ono kele ngu ekele;
gude ajaja, ayi aja ngu
kua onwayi ekuku.”
36 Tẹ ajaja bụru kẹ Ojejoje,
bụ Nchileke kẹ Ízurẹlu;
gbururu jeye lẹ gbururu.
Ndu Ízurẹlu l'ẹphe ha atụko zụkota mgbede; sụ: “Ono kwa ẹge ọ dụ. Tẹ ajaja bụru kẹ Ojejoje.”
Eeke ozi
37 Tọ dụ iya bụ; Dévidi abya ahaa Ásafu mẹ ndu egvu iya l'ifu Okpoko Ọgba-ndzụ Ojejoje ono; t'ẹphe jeje ozi l'ẹke ono tekenteke; mbụ ẹge a chọru t'e meje iya mbọku-mbọku.
38 Ọ hakwarụphu Óbẹdu-Édọmu waa ndu ọru iya, dụ ụkporo ẹto l'ụmadzu ẹsato. Óbẹdu-Édọmu Jedutunu yẹle Hosa bẹ eche ọnu ẹka ono nche.
39 Dévidi hakwaruphu Zadọku, bụ onye achịjeru Nchileke ẹja; waa ụnwunna iya, bụkwaphu ndu achịjeru Nchileke ẹja t'ẹphe nọdu l'ọnu m̀kpù Ojejoje, nọ l'ẹke aagwajẹ iphe lẹ Gíbiyọnu ono.
40 Ozi ẹphe bụ t'ẹphe gwojeru Ojejoje ngwẹja-ukfuru l'ẹnya-ngwẹja-ukfuru: eswe l'ẹnyashi; mbụ tekenteke; ẹge ono, e deru iya l'ẹkwo ekemu, Ojejoje tụru nụ ndu Ízurẹlu ono.
41 Ndu a gụru yeru ẹphe bụ Hemanu; Jedutunu; mẹwaru ndu a fọtaru; kua ẹphe l'ẹpha t'ẹphe keleje Ojejoje ekele kẹ n-yemobu iya ono, anọje gbururu jewaru ono.
42 Hemanu yẹle Jedutunu bụ ẹphe anọduje egbu ụpyoku; l'akụ ogele; mẹwaru ngwa-egvu ọdo, e gude agụ egvu, dụ nsọ. Ụnwu Jedutunu bụ ẹphebedua anọduje eche ọnu-ụzo.
43 Tọ dụ iya bụ; ndu Ízurẹlu l'ẹphe ha awụkashihu; onyenọnu alashia l'ufu iya. Dévidi alashia l'ufu tẹ ya je agọru ọnu-ọma nụ ndibe iya.