22
Egvu, Dévidi gụru Ojejoje
(Egvu 18:1-50)
1 Dévidi gụru egvu-a nụ Ojejoje mbọku, ọ nafụtakotaru iya l'ẹka ndu ọhogu iya l'ẹphe ha; kelekele kẹ Sọlu.
2 Ọ gụru; sụ:
Ọ bụ Ojejoje bụ oke mkpuma
nke mu; bụru iya bụ
a-gbabe-a-dzụru nke mu;
bụru iya agbafụtaje mu.
3 Ọ bụ Nchileke mu bụ
Agbara-Mkpuma, mu agbabajẹ
je edomia onwomu.
Ọ bụ iya egbochije mu
t'ẹ b'ọ dụ iphe, e-me mu nụ;
bụru iya bụ onye egudeje
agburu-ẹhu iya dzọo mu.
Ọ bụ l'ime iya;
bẹ mu agbabajẹ; zeeru ndzụ;
bụru iya bụ onye ndzọta mu.
Ọ bụ iya adzọje mu l'ẹka ndu
ẹnya enwu ọku.
4 Ọ bụ Ojejoje bẹ mu arakuje;
yọ dzọo mu l'ẹka ndu ọhogu mu.
Ọ gbaru t'a jaja iya ajaja.
5 Anwụhu shiwa ye mu
ẹgbirigba l'olu.
Ọ-la-l'iyi atsọo l'ọ bụ
mini bya atsọ-kputa mu.
6 Ẹkpa-oyi alị-maa nyịru mu kpaa.
Anwụhu eshiwa gbabẹru mu ọnya.
7 Mu eshi l'iphe-ẹhuka,
byaru mu nụ raku Ojejoje;
mbụ raku Nchileke mu.
Yo shi l'eze-ụlo iya nụa olu mu;
Mkpu, mu chiru chiku iya
erua ya nchị.
8 Ya ndono; eliphe l'ophu
etehu kfụkakfuka;
nmakọta jijiji.
Ẹke a tụru ọkpa-alị imigwe
anmakọta anmanma;
kẹle Nchileke;
bẹ ẹhu eghu eghughu.
9 Ẹnwuru-ọku shi iya l'imi
akpọ kẹ tụtutu;
Ọku, shi iya l'ọnu atụko
iphemiphe ọbule ekepyashi.
Icheku-ọku iphe,
o kepyashiru achịko ẹkemeke
ọbule ata kfukfukfu.
10 Yọ dajaa akpamigwe;
yọ bụru iya alụfuta.
Ọchi, gbarụ kẹ tsụkiribangu
anọdu iya lẹ mkpuli ọkpa.
11 Yọ nọdu l'eli Cherobimu phefu.
Yọ bụru phẹrephere bụ ẹ́bà
o gude ephe.
12 Yo woru ọchi gbaphua
onwiya l'o bụ mkpu;
Urukpu, mini jiru ejiji
anọ-phee ya mgburumgburu.
13 Urukpu; mẹ icheku-ọku,
ata kfukfukfu eshi
l'o-gbu-nwịi-nwịi ya awụshi.
14 Ya ndono; Ojejoje eshi
l'akpamigwe tụa egbe-igwe.
A nụa olu onye ono, bụ
Ọkaribe-Kakọta-Nụ ono.
15 Ọ gbaru akfụ gude chịkashia
ndu ọhogu iya.
Ebemu-igwe b'o kuru kẹ
mẹremu; ẹphe eze ọso.
16 Oke ẹnyimu ekekahu ẹbo;
k'ọphu a phụtsuaru ime ime
ebo ẹnyimu l'ẹnya;
kpuhatsua ẹke, a tụru
ọkpa-alị mgboko ghebe ọnu.
Yọ bụru l'ẹke Ojejoje gude
oke phẹrephere, shi iya l'imi
deeru ndu ọhogu iya ekiri.
17 Ojejoje eshi l'imigwe
selita mu; gụfuta mu l'ime ebo.
18 Ọ nafụtakwaru mu phụ
l'ẹka ndu ọhogu mu,
shihuru ike; mẹ l'ẹka iphe,
bụ ndu mu dụ ashị;
Kẹ l'ẹphe kariru mu ẹka.
19 L'oge teke ono,
ụmuruku mụru mu ono;
bẹ ẹphe je agbabua mu ifu.
Obenu lẹ Ojejoje byaru bya
abụru mu agbarike.
20 Ọ bụ yẹbedua kutaru mu
dobe l'ẹke gbasaru agbasa.
O yeru mu ẹka nafụta mu;
kẹle mu nọ iya l'obu.
21 Ojejoje buru mu nggo;
kẹle mu doberu ẹka ndoo;
iswi adụ mu mma.
22 Kẹ l'ọ bụlephu ụzo,
Ojejoje tọru bẹ mu etsoje.
Ọphu mu egudebua ẹjo iphe
ghaaru Nchileke azụ.
23 Ikpe Ojejoje bẹ mu
mụbekotaru ẹnya l'ọ ha;
tọ bụ lẹ mu ghajẹru ekemu,
ọ tụru azụ.
24 Ẹ tọ dụdu ẹke ụta dụru mu l'ẹke ọono.
Mu sederu onwomu; to nwe
ẹjo iphe, mu yejeru ẹka.
25 Mu bụ onye doberu ẹka ndoo;
bụru onye iswi dụ mma.
Ọ bụ iya meru iphe Ojejoje
buru mu nggo; l'ẹge
mu dụtabe iya mma l'ẹnya.
26 Ndu yeru nggụbe
Ojejoje obu bẹ iiyejeru obu.
Ndu dụkota mma
b'ị dụebejeru mma.
27 Ndu obu gụru iphoro;
b'ị gụjeru obu iphoro.
Ndu doberu ụzo ẹphe
nggịrigonggirigo;
bẹ iidobejeru ụzo ngu nggịrigonggirigo.
28 Ndu wozitaru onwẹphe alị;
b'ị dzofutaje.
Obenu l'ẹnya ngu anọduje
l'ẹke ndu eku onwẹphe
ekuku nọ t'i wozita ẹphe alị.
29 Ọ bụ nggụbe Ojejoje
bụ urọku mu.
Nggụbe Ojejoje emeje
t'iphoro dụru mu l'ẹke ọchi nọ.
30 Ọ -bụ l'ike nke ngu;
bẹ mu e-gude mekputa
igwe-ọha ndu sọja;
bụru ike ngu;
bẹ mu e-gude
nyia ụpho-mkpuma mkpụkpu;
je anaa mkpụkpu ọbu.
31 Ụzo Nchileke bẹ ntụpo ta nọdu.
Okfu Nchileke bụ ọkpobe okfu.
Oogbochitaje ndu gbabaru
l'ime iya t'ẹphe zee ndzụ.
32 ?Nanụfua onye ọdo,
bụ Ọkaribe ọdo;
a gụfu Ojejoje?
?Nanụ onye ọdo,
bụ Agbara-Mkpuma ọdo;
a gụfu Nchileke ayi?
33 Ọ bụ Nchileke emeje tẹ
ike dụ mu; bụru iya emeje
tẹ ntụpo ba anọ l'ụzo mu.
34 O meru mu;
mu akfụ gelengu gelengu
l'ọbu mgbada; bya eworu
mu tukobe l'eli ugvu.
35 Ọ ziru mu;
mu amaru ẹge aalụje ọgu;
k'ọphu bụ l'ẹ to nwedu
m'ọ -bụ akfụ, e kweru l'igwe;
mu agba l'iya-a.
36 Ọ bụ nggụbe Ojejoje
gbochitaru mu;
shi ẹge ono dzọfuta mu.
Ọ bụ ẹka, i yeru mu;
bẹ paliru mu nụ.
37 I mesaru ụzo mu t'ọ ha ụsa;
k'ọphu ọkpa te echifudu mu.
38 Mu gude ọso chịa
ndu ọhogu mu; gwe
e ẹphe ogwe-ẹkfu.
Ọphu mu atsụladu azụ
jeye mu alụ-gbua ẹphe.
39 Mu chiru ẹphe pyakapyaka;
chibashitsua ẹphe ọnya;
k'ọphu ẹphe ta dụdu ike palia ishi ọdo.
Ẹphe adashịa mu l'iku ọkpa.
40 Ọ bụ ike nke ngu;
bẹ mu gude eje ọgu.
Ndu etso mu okfu b'i meru;
ẹphe ebyishi ikpere;
fuaru mu ọnu l'alị.
41 Ndu ọhogu mu b'i meru;
ẹphe eye ọkpa l'ọso tsuphu azụ;
Mu emebyishikota ndu ono,
mu dụ ashị ono.
42 Ẹphe chiru mkpu; to nwe
onye gbaru ẹphe mkpu.
Ẹphe araku Ojejoje;
ọphu o yeduru ẹphe ọnu.
43 Mu gweru ẹphe ogwe uji;
mee ẹphe; ẹphe adụ l'ọ bụ
udzu-ẹja, nọ l'alị.
Mu tsụru ẹphe ọtsu-ẹkfu;
ẹphe l'ọbu ẹpoto, nọ l'esu-ụzo.
44 Ị nafụtaru mu l'ẹka ndu nke mu,
abyaru mu ọgu; mee mu;
mu abụru ishi iphe bụ mbakeshi;
k'ọphu bụ lẹ ndu, mu te shidu
maru byaru bya anọdu mu l'ẹka.
45 Iphe bụ ndu ọhodo anọduje
ebyiru mu ikpere.
Ẹphe -nụa l'ọwaa iphe,
mu sụru t'e mee ndọ-ọ;
ẹphe emee ya ẹgwegwa.
46 Meji atọshihu ẹphe;
ẹphe eshi l'ẹke ẹphe shi;
wụru yọtiyoti byakfuta mu.
47 Ojejoje nọkwa ndzụ!
Unu tua ya ẹpha.
Ọ bụ iya bụ Agbara-Mkpuma ọbu,
domiru mu nụ ọbu.
Unu kutsee Nchileke;
l'ọbu iya bụ onye adzọje mu nụ!
48 Ọ bụ Nchileke agwatajẹ
ụgwo iphe, ndu ọhogu mu meru mu.
O meru; ụnwu eliphe;
ẹphe anọdu mu l'ẹka.
49 Ọonafutaje mu l'ẹka ndu
ọhogu mu.
Oowolije mu;
woghata ndu etso mu ọgu.
Ọogbafutaje mu l'ẹka ndu ẹnya enwu ọku.
50 Ọ bụ iya meru iphe
mu e-vudo l'ifu mbakeshi;
jaa nggụbe Ojejoje.
Mu a-gụ egvu gude jaa ngu.
51 Onye eze, ị fọtaru; bẹ iimeje
t'ẹka iya karia l'ọgu.
N-yemobu ngu; b'i koshije
onye i teru manụ: mbụ Dévidi yẹle
ndu o-shi-l'eri iya phẹ jeye lẹ tutu yoyo.