2
No Kangayaw no Ispirito Santo
1 Do nakarapit naranaw no araw a Pentekostes, naychipeh sa tabo nanganohedaw do asa yanan do Jerosalem.
2 Ki naychihat a nadngey daw akmas banerberaw no mayit a salawsaw a yapo do hanyit a nangay dyira a nangapno so intīrwaw a bahay a naychipehan da.
3 Sinpangan na, myan naboya da a akma saw asdeb no apoy a nasisyay kan tayisa sa domnina do katakatayisa dyira.
4 Do dawri, napno sa do Ispirito Santo, kan insiknan na sa pinaychirin so matatarek a kapaychirin a dyi da ninanawo.
5 Ki do dawri, myan saw Jodyo a omyan do Jerosalem a yapo do āro a matatarek a nasnasyon do lōbongaya. As siraw nyaya a Jodyo, ki oyod a dayāwen daw Dyos.
6 Ki do nakadngey dan tawotawo saw so napariparinaw daw, yangay da a chiniban. Nableg sa tabo do nakadngey daw siras manganohedaw a naychirin so chirinaw no katakatayisa dyira do nakayanakan daw a idi mana tana.
7 Taywara naklat kan nasdaāwan sa a naysin-iiyahes a kon da, “Aysa, āngo nya? Taga Galilya sabawriw nya tawotawo a maychiychirin?
8 Ki āngo ta madngey no katakatayisa dyaten dyaw bōkod na chirin a ichirichirin da?
9 Myan saya dyaten dyaw taga Partya, Medya, kan Elam. Myan pa sayaw taga Mesopotamya, Jodya, kan Kapadosya. Ari pa sayaw yapo do Ponto kan Asya,
10 Prigya kan Pampilya, taga Egipto kan siraw yapwaya do Libya do masngenaw do Sirene. Myan pa saya dyaw taga Roma a
11 Jodyo kan Dya-Jodyo a minonot do rilihyon no Jodyo. Myan pa sayaw kadwan dyaten a yapo do Kreta kan Arabya. Ki madngey taya tabo do nakayanakan taw a chirin iyaw ibahebahey daya a maynamot do makaskasdāaw saya pinarin no Dyos!”
12 Malit sa naklat kan nariribokan, as naysin-iiyahes sad katakatayisa dyira, “Āngo chakey na batahen no nyaya?”
13 Ki siraw kadwanaw dyira daw, insisyabak da a kon da, “Nabok saya as dawa!”
No Minsāhi ni Pedro
14 Do dawri, naytēnek sa Pedro kan siraw asaw a poho kan asa apostolis do salapen da, as nakapakalyak ni Pedro a nangibahey sya dyirad tawotawo saw a kāna, “Inyo a kapayngay ko a Jodyo kan inyo a tabo a omyan do dya Jerosalem, adngeyen nyo chakey kwaya ibahey dyinyo, ta ilawlawag ko an āngo naparinaya dya.
15 Nabok sabaw nya tawotawo a akmas myan do aktokto nyo. Namna! Ari payad abo ālasnwebi sichamabekas!
16 Komwan aba, ta nyaw inpaipadto no Dyos di Propīta Joel a kāna,
17 “ ‘Do panawdyan saya a araw, ki pengden ko sanchi a tabo tawotawo
so yapo do Ispirito ko tan makneb sanchi.
As siranchiw anak nyowaw a mahahakay kan mababakes,
ki mangipadto sanchis ipakatoneng kwaw dyira do tawotawo.
Pagparmataen ko sanchiw babbarwaw,
as paytayenepen ko sanchiw mangalkemaw.
18 Komwan sanchiw pachirawatan saw a mahahakay kan mababakes a magsīrbi dyaken.
Do dawri sanchi a araw, pengden konchi dyiraw yapo do Ispirito ko.
As maynamot do panakabalin no nya Ispirito a myan dyira,
ki ipadto danchiw ipakatoneng kwaw anchi dyira.
19 Mapaboya konchis makaskasdāaw do hanyit,
as kan aran do tanaya, myan anchiw pangilasīnan
a raya, apoy, kan matokpoh a ahob.
20 Maysārinchiw araw, as kan manyibayanchiw bohan a akmay raya
sakbay no mabīlegaw kan makaskasdāawaw a araw a kangay no Āpo.
21 Aran sinonchi a manawag di Āpo so kāsi na dya,
ki maisalākan anchi.’ ”
22 Tinongtong ni Pedro naychirin, “Inyo a kapayngay ko a kapotōtan ni Israel, adngeyen nyo nyaya chirin ko. Malawag a maboya a si Jesos a taga Nasaret, ki oyod a tinoboy ni Āpo Dyos. Ta maynamot do panakabalin no Dyos, pinarin sa ni Jesos makaskasdāawaya a milagro kan pangilasīnan. Chapatak nyo saw nya, ta naparin sa do omdibon nyo, as kan myan sa dyinyo dya sichangori iyaw mismo a nakaboya sya.
23 Si Āpo Dyos a mismo nangikeddeng, kan iyaw akin panggep do kaychowa pa a naiparawat si Jesos dyinyo, as kan oyod a inpadiman nyo dyirad marahet saya a tawotawo do nakaipailansa nyo sya do kros.
24 Ki pinagōngar ni Āpo Dyos, kan winayawayaan na do panakabalin no kadiman, ta polos a maparin aba pagpeten no kadiman.
25 Ta nyayaw inpadto ni Āri Dabid a maynamot dya a kāna,
“ ‘Pirmi kwa maboya si Āpo ko.
Iya, ki myan do kawanan ko tan dya kwa mariribokan.
26 Maynamot do dyaya, masoyot ako, as kan chasoyot ko naymo a dayāwen.
On, myan rakoh a kapagnamnāma ko dyimom Āpo.
Ta aran madiman inawan ko, ki
27 sigorādohen ko a nonolay mo abanchiw pahad ko do yanan nadiman.
On, nonolay mwaba iyaw masantwanaw a pachirawatan mo a mahta do pangilabengan.
28 Inpaboya mo na dyaken iyaw no rarahan a mangay do kabyayan,
as kan oltimo danaw kasoyot ko a maynamot ta myan ka dyaken.’ ”
29 Do dawri, ki tinongtong ni Pedro naychirin a kāna, “Kakakteh, matored ako a mangibahey dyinyo maynamot do kapoonan taw a si simna Dabid. Iya, ki nadiman kan naitanem, ki mandas changori, ari paw tanem naw do yanan taya.
30 Ta si simna Dabid, ki asa propīta, kan chinapatak naw inkaryaw no Dyos dya a payparinen nanchiw asaw dyirad kapotōtan naw a āri a machitādi dya.
31 On, maynamot ta asa propīta si Dabid, ki inchirin na maynamot do nakapagōngaraw ni Kristo, ta inpadto na a dya matokos do yananaw no kadiman, as kan dya mahtaw inawan na.
32 Iyaw nyaya, ki si Jesos a pinagōngar no Dyos. As an yamen, ki maipaneknek namen maynamot ta nayboboya kami a mismo do nakatayokaw no nakapagōngar na.
33 Sichangori, ari dana pinaydisna ni Āpo Dyos si Jesos do makawananaw a trono na do hanyit. On, rinawat na a yapo do Āmang na a Dyos iyaw inkaryaw no Dyos a iyaw Ispirito Santo, as kan pinenged na dyamen. Iyaw nya danaw madngey nyowaya kan maboya nyowaya sichangori, ki yapo do dyaya a Ispirito Santo.
34 Ta syimpri nangay abas Dabid do hanyit, ki alit na intolas na a kāna,
“ ‘Si Āpo inbahey nad Āpo ko a kāna,
“Maydisna ka do kawanan kwaya
35 a mandad kaābak ko siras kabōsor mo saya,
kan ipapitapita ko sad kokod mwaya.” ’
36 “Dawa,” kāna ni Pedro, “inyo a kapotōtan Israel, malawag kaibahey ko sya dyinyo a nyaya Jesos a inpailansa nyo do kros, ki pinayparin ni Āpo Dyos a Āpo kan Kristo.”
37 Do nakadngey dan tawotawowaw so nyaya chinirin ni Pedro, taywara a nasalid danaw aktokto da. Dawa, inbahey dad Pedro kan siraw kadwan saw a apostolis kon da, “Kakakteh, āngo paro machita parinen namen?”
38 Ki inatbay san Pedro a kāna, “Magbabāwi kamo a katakatayisa do gatogatos nyo, kan magpabawtisar kamo a pangipaboyan nyo so kapachasa nyo na di Āpo Jeso-Kristo. Tan komwan, mapakawan kamo do gatogatos nyo, kan marawat nyonchiw sāgotaw no Dyos a Ispirito Santo.
39 Ta nyaya, ki inkari ni Āpo Dyos dyinyo kan siraw kapotōtan nyo saw kan sira tabo tawotawo do mateng saya a yanayanan, as kan sira tabo tawagan saw ni Āpo ta a si Āpo Dyos.”
40 Do dawri, āro paw inchirin ni Pedro a pinangballāag kan pinangbagbaga siras nangadngedneyaw a kāna, “Maisalākan kamo pakono tan dyi kamo a mairāman do dōsa daya no marahet kan matotoleng saya a tawotawo sichangori!”
41 Siraw nanganohedaw do chirinaw ni Pedro, ki nagpabawtisar sa. Do dawri a araw, myan sigōro tatdo a rībo naparapa do bidang daw no nanganohed saw daw.
42 Inpasnek daw nachinanawo dyirad apostolis saw, as kan nāw da nachichasa dyira a nachikayban, nagkomonyon, kan naydaydasal.
No Kabibyay Dan Manganohed
43 Do dawri, katakatayisaw nasnasdaāwan kan nāmo, as kan āro napariparin dan apostolis saw a milagro kan makaskasdāaw a pangilasīnan a maynamot do panakabalinaw no Dyos a myan dyira.
44 Ki siraw tawotawo saw a nanganohed, tinongtong daw naychichipeh do asa yanan, kan nāsa danaw kapangtokto da. Ta aran warawara da, ki inbidang da a dyira da a tabo.
45 Inlāko daw warawara da saw kan tana da saw, as nakaiwaras das kwartaw a insidong dyirad rārayay da saw sigon do makachita.
46 Kararaw a tinongtong daw nabayabayat a naydasal do atataw no Timplo. Naychaychatoyo sa a nachihanghang do kāda bahabahay da, as kan nagkomonyon sa daw. On, pinarin daw komwan a masoyosoyot kan madadam so panggep.
47 On, nāw da indaydāyaw si Āpo Dyos, kan siraw tabo tawotawowaw, ki myan kaanyib da dyirad manganohed saw. Kararaw, ki myan saw bayo a nanganohed a insalākan ni Āpo Dyos, as kan pinarapa na sa dyirad nanganohedaw di Jesos.