12
No Matatarek a Panakabalin a Itoroh no Ispirito Santo
(Epe. 4:1-16)
1 Changori a kakakteh, chakey ko a mapatakan nyo maynamot do matatarek saw a panakabalin a itoroh no Ispirito Santo.
2 Chapatak nyo a do dyi nyo paw a panganohdan, ki napawnot kamo a nagdāyaw dyirad bolto saw a abos byay. Siraw nyayaw pirmi saya a napaychawaw dyinyo.
3 Iyaw nyayaw paynamotanaya a ipakatoneng ko dyinyo an maypāngo kailasin nyo so tawo saw a napawnot dana do Ispirito Santo. No tawowaw a napawnot do Ispirito Santo, ki maparin naba a abayen si Jesos. Masaw, iyaw kabwan Ispirito Santo, maparin naba ipodno a si Jesos, ki katotohosan a Āpo.
4 Matatarek iyaw panakabalin a itoroh no Ispirito, ki asa lang a Ispirito manoroh siras nyaya.
5 Masaw a matatarek kapagsīrbi ta, ki asa lang Āpo a pagsīrbyan ta.
6 Komwan paw matatarek saw a pakaboyan so makaskasdāaw a kaparin no Dyos do byay no tawo, ki asa lang Dyos a manorotoroh so tabo.
7 On, matorohan ta a tabo a manganohed so panakabalin a mangipaboya so kayan no Ispirito dyaten tan masyasidong ta a tabo do iglisya.
8 Itoroh no Ispirito do asa tawo iyaw no panakabalin a mangipakatoneng so sīrib no Dyos. As no kadwan, ki kapakapatak so makatayrahem saw a nanawo a maynamot do Dyos.
9 Iyaw nya Ispirito manoroh so kapanganohed no asa tawo, as kan iya paw manoroh dyirad kadwan so panakabalin a makapapya so maganyit.
10 Maynamot do Ispiritwaya, ki matorohan asa tawo so panakabalin a mamarin so milagro, as no kadwan, ki iyaw kaganay a mangipakatoneng so inpaltiing no Dyos. As no kadwan, ki matorohan so kaganay a mangilasin so paytarkan panakabalin no Ispirito kan siraw yapo do marahet saw a ispirito. As maynamot do Ispiritwaya, ki matorohan asa tawo so makaskasdāaw a kapaychirin a dyi na ninanawo, as kan no kadwan pa, ki kaganay a mangilawlawag so naichirin.
11 Ki asa lang Ispirito a pakayapwan a tabo no nya saya, as kan sigon do chakey na, matatarek a panakabalin ibinglay na do katakatayisa.
No Āro a Partis no Asa Lang a Inawan
12 Maiyarig ta do asa inawan a āros partis. Ta aran āro matatarek a partis na, ki alit na asa inawan. Komwan ta na di Kristo.
13 Ta aran yaten a tabo a Jodyo mana Dya-Jodyo, adīpen mana dya adīpen, ki nabawtisaran ta tan mairāman ta do asa inawan a maynamot do asaya Ispirito no Dyos. On, iyaw nyaya a Ispirito, ki rinawat ta a tabo a akmay asa inomen a nakapengdan ta.
14 Ta asaba lang partis no inawan, an dya āro matatarek a partis na.
15 Kaspangarigan, an batahen kokod a kāna, “Partis naba yaken inawan, ta tachay akwabaya,” chakey nawri a batahen a dyi dana partis no inawan? Syimpri engga ah!
16 Masaw an batahen tadyinya a kāna, “Partis naba yaken inawan, ta mata akwabaya,” chakey nawri a batahen a dyi dana parti no inawan? Samna!
17 An mata lang mangitēnek so asa inawan, maypāngo paro kapakadngey na? Masaw, an tadyinya lang, makangot paro?
18 No kaoyodan na, ki inornos no Dyos tabo a partis no inawan sigon do chinakey naw.
19 Mayparin aba asaw inawan an asa lang partis na?
20 Ki no kaoyodan na, āro partis na, ki asa pa lang a inawan.
21 As dawa, maparin aba batahen no mata do tachay a, “Machita kwaba imo!” Masaw oho do kokod a, “Machita kwaba imo!”
22 On, dyi pakono a maparin nyaya, basbāli a siraw partis saya a naibidang a makapkapsot, ki siraw taywara machita.
23 As siraw batahen taya a dya masisīta a partis no inawan, siraw totōlas ta a intwan. As siraw dyaya mapostora a partis no inawan, iyasnek ta sa, dawa, libngen ta sa.
24 On, intwan taya a mangamangay pa kan kapanginto ta siras dyaya makasnesnek a partis no inawan. Nawriw pinarinan Āpo Dyos so inawan tan intwan ta sa maganay ibidang ta saya a dya masisīta partis no inawan.
25 As dawa, maysin-iipsok abaw partis no inawan, basbāli a maysin-iisakit sa.
26 An myan kalidyatan asa, machipangdidiw sa tabo. Masaw an maidāyaw asa, mairāman sa tabo do kasoyotan.
27 Changori, no chakey na batahen nyaya, ki yaten a manganohed, ki kayarigan ta naw inawan ni Kristo. Katakatayisa dyaten, ki asa partis na.
28 No chakey na batahen inawanaya ni Kristo, ki iyaw iglisya. On, inplastar ni Āpo Dyos katakatayisa do pagrebbengan na. Manma saw apostolis, somarono saw propītaw a mangipakatoneng so inpaltiing no Dyos, kan chatatdo da saw mangnanawowaw. As somarono dyirad dyaya, ki siraw mamarin saw so milagro, as siraw natorohan saw so panakabalin a mapapya, as kan siraw somidosidongaw do makachita. Masaw siraw mangiwanwan saw do kapilya, as kan siraw makaichirin saw so matatarek a chirin a dyi da ninanawo.
29 Kalitan tawriw mayparin a apostolis mana propīta a mangipakatoneng so inpaltiing no Dyos, mana mangnanawo? Masaw kalitan tawriw makaparin so milagro.
30 Kalitan tawriw makapapya so maganyit mana makapaychirin so matatarek a chirin a dyi da ninanawo mana makailawlawag so maichirin?
31 Engga! As dawa, sira pakono kalikagōman nyo masisīta saya a panakabalin.
Ngay, ipaboya ko dyinyo maganaganay pa onotan.