No Libro Ni Esra
No Pakatonngan so Paytābwan no Nya Libro
No nya libro, ki iyaw tongtong dan naibahey saw do libro saw a Kronikas. No nya libro, ipakatoneng naw no maynamot do kapaybidi dan kadwan saw a Israelita do Jerosalem kan do probinsya a Joda (2:1) a yapo do tana a nakaakawan dan kapoonan da saw a naiyangay a nabahod do Babilonya.
Do sakbay a mapariparin saw no naitolas do dya libro, pinalobōsan ni Āpo Dyos no syodad a Jerosalem kontodo iyaw timplo a bahay no Dyos a rārayawen dan taga Babilonya. As sira paw nangakaw siras Israelitaw a nabahod a naiyangay do nasyon da.
No kasiknan no nakaakaw da siras Israelita, ki do tawen a 606 sakbay no nakaiyanak ni Āpo Jesos. Ki inkari ni Āpo Dyos a katayoka no papito a poho a katawen, palobōsan na saw Israelita a maybidi do tana da a Joda (Jer. 25:12-14; 29:10-14).
Dawa, do tawen a 536 sakbay no nakaiyanak ni Āpo Jesos, pinalobōsan ni Impirador Syros do Persya iyaw mapatapata a 50,000 a Israelita a maybidi do tana da tan mirwa mapatnek so timplowaw do Jerosalem (1:2). Do dāwri, iyaw timplo a bahay no Dyos da do Jerosalem kontodo siraw ahad naw do omdibon no syodad, ki narārayaw pa.
No dāmo a gropo a naybidi, ki naybidi sa do pangeddeng ni Impirador Syros do Persya. Pinirwa daw napatnek so timplo as nakaididikar da sya di ĀPO. Nagragsak sa a taywara a maynamot ta naparin darana a mirwaw magdaydāydaw di ĀPO do Jerosalem.
Āro saw tawen a homnabas sakbay no nakapaybidi da no somaronwaw a gropo do Jerosalem a indaōlwan ni Esra. Si Esra, ki yapo do kapotōtan ni Aaron a iyaw katotohosan a pādi do nakarahan, as kan sanay do Linteg no Dyos. Sinidongan na saw Israelita do kabibyay da a monot do chakeyaw ni Āpo Dyos.
No Naychakarwan no Nya Libro
No dāmo saw a maybidi do Jerosalem (1-2)
No kapirwa kapatnek no timplo (3)
No kaisardeng no kapatnek no timplo a maynamot dyirad kabōsor da (4)
No katayoka no kapirwa no kapatnek no timplo (5-6)
No kapangidaōlo ni Esra dyirad tawotawo a Israel (7-10)
Esra
1
No Bilin ni Syros Dyirad Naakaw a Maybidi
1 Do nanōma a tawen a nakapagimpirador ni Syros do Persya, inpatongpal ni ĀPO iyaw inpaichirin naw di Jeremiyah a propīta na. Sinalid ni ĀPO kapangtoktwaw ni Syros a impirador do Persya tan mamarin so pangeddeng na. Sinalid pa ni ĀPO a ipaitolas na tan maiwaragāwag do intīro a pagāryan na.
2 Nyaw bilin ni Syros a impirador no Persya a kāna, “Si ĀPO a Dyos no hanyit, ki intoroh na dyaken tabo pagāryan saya do lōbongaya, as kan tinongdo na yaken a mangpatnek so timplo na do Jerosalem a syodad do Joda.
3 Aran sino a naibidang a tawotawo no Dyos, ki mapalobōsan a maybidi do Jerosalem do Joda kan mirwa a mapatnek so timplowaw ni ĀPO a iyaw Dyos no tawotawo no Israel a iyaw Dyos a myan do Jerosalem. Iyaw Dyos nyowaya, ki myan pakono dyinyo.
4 As an myan tawotawo no Dyos a naakaw a sibibyay pa do aran dino a logar, ki sidongan da pakono no omyan saw daw. On, sidongan da pakono do kapanoroh da siras pirak, balitok, warawara, binyay, kan nainpapōswan saw a dāton a para do timplowaw no Dyos do Jerosalem.”
5 Do dāwri, siraw pangōlwaw do partīdos no trībo no Joda kan Benhamin, siraw papādyaw kan siraw Lebitaw, as kan tabo a sinalid no Dyos, ki nagrobwat dana sa a mangay a mirwa a mapatnek so timplowaw ni ĀPO do Jerosalem.
6 As sira tabo omdibonaw dyira, ki sinidongan da sa do nakapanoroh da so naparin saw do pirak kan do balitok, warawara, binyay, mangīna a alāhas, kontodo tabo kadwan saw a intoroh da a nainpapōswan.
7 Aran si Impirador Syros, ki inpapahtot na saw warawaraw a dyira no timplo ni ĀPO a inakaw ni simna Nebokadnessar a āri no Babilonya a yapo do Jerosalem, kan pinosek ni Nebokadnessar do timplowaw no dyos na.
8 On, inparawat ni Syros a impirdor do Persya di Mitredat a trisoriro na, as kan kwininta na sa do salapen ni Sesbassar a gobirnador do Joda.
9 Nyayaw listaan a nakwinta na: 30 a planggana a balitok, 1,000 a planggana a pirak, 29 a lōkoy,
10 30 a sabak a balitok, 410 a sabak a pirak, 1,000 a kadwan saw a warawara.
11 No bidang dan tabo nyaya a matatarek a warawara a balitok kan pirak, ki 5,400. Tabo nyaya, ki pinanawbi ni Sesbassar do nakapaybidi dan naakawaw a tawotawo a yapo do Babilonya a somnabat do Jerosalem.