9
No Dasal ni Esra a Maynamot do Kapachikabahay do Gan-ganaet
1 Katayoka dan nyaya naparin, nangay sa dyaken pangpangōlwaw, kan binata da a kon da, “Siraw tawotawo no Israel kontodo siraw papādi kan Lebita, nachibawa saba dyirad tawotawo a omdibon a myan so makabābaba a dadakay a siraw Kananeo, Heteo, Pereseo, Jeboseo, Ammonito, Moabita, taga Egipto, kan Amoreo.
2 Nachikabahay saw Israelitaw dyirad babbalāsang daw no gan-ganaet saw. As dawa, no tawotawo a masantwan, ki nachisagel dana dyirad tawotawo a myan do omdibon. As siraw pangpangōlo kan opisyalis, siraw nangirogi a namarin so nyaya dya mapodno a kaparin.”
3 Do nakadngey ko syay, pinirit ko laylay kan kagay ko, kan binagot ko boboh do oho kan minyin ko, as naydisna ako a taywara so kapagmamayo.
4 Do dāwri, siraw naychamirpirpiraw a nāmo do chirin saya no Dyos no Israel, nakpeh sa do omdibon ko a maynamot do dyaya a mapodno a kaparin dan naybidi saw a naakaaw. Nāw ko a naydisna daw a nagmamayo a manda do ōras no kapangidāton do kapaysarisari.
5 Sinpangan na, do ōras no kapangidāton do kapaysarisari, naytēnek ako yapo do kapagmamayo ko a sipipirit so laylay kan kagay, as naydogod ako a maydedpa di ĀPO a Dyos ko,
6 kan naydasal ako a kon ko,
“O Dyos ko, taywara a masnek ako a tomangay dyimo a Dyos ko. Ta no gatogatos namen, ki maopo a matwatohos kan oho namen kan nakarapit dana do kahanyihanyitan.
7 Yapo do chimpo dan aāmang namen a manda sichangori, nāw na rakoh gatos namen. Maynamot do gatogatos namen, yamen, siraw ar-āri kan papādi namen, ki naiparawat kami dyirad ar-āri no gan-ganaet a tana do kadiman do ispāda, kabahod, kasamsam, kan do oltimo a kasnek a akma sicharaw.
8 “Ki sichangori, do dēkey lang a chimpo, inpaboya ni ĀPO a Dyos namen parabor na do nakatokos na dyamen a yamen a nakalāsat, kan tinorohan na yamen so dya maparoparo a yanan do pagdaydayāwan sya. Tan komwan, no Dyos namen, ki mangsēdang so aktokto namen kan torohan na yamen so dēkey a pakaalmonawan do nakaadīpen namen.
9 Aran adīpen kami, ninonolay naba yamen no Dyos do kaadīpen namen. Inpaboya na dyamen iyaw dya mabdibdis a kadaw na do salapen dan impirador do Persya. Tinorohan na yamen so bayo a byay tan mirwa a mapatnek iyaw bahay no Dyos namen kan mangapya so nakarārayaw na. Inaywanan na pa yamen do Joda kan Jerosalem.
10 “Ki changori, O Dyos namen, aryoriw mabata namen a maynamot do dyaya? Aba! Ta ninonolay namen bilbilin mo
11 a inpabilin mo dyirad propīta saw a pachirawatan mo do nakabata mo a kon mo, ‘No tana a īto a asdepen nyo tan dyira nyonchi, ki tana a ibidang ko a malapos, ta linaposan dan tawotawo do makabābaba a kaparin da sa. Nya a kalapos, ki inapno daw tana.
12 Dawa, ipakabahay nyo abaw babbalāsang nyo dyirad babbaro da mana hapen nyo abaw babbalāsang da a ipakabahay do babbaro nyo. Machitōlag kamwaba polos a machisīt dyira do aran āngo a chimpo. Tan komwan, maparin a mabīleg kamo kan koman kamo so maganay a āpit do tana, kan maparin a ipatāwid nyo tana dyirad anak nyo a abos pandan.’
13 “No tabo a naparin dyamen, ki maynamot do marahet saya a kaparin kan no rakoh a gatos namen. Ki alit na, imo Dyos namen, dekedekey kadōsa mo dyamen kan maikari do gatogatos namen, kan inpalōbos mo pa a myan nakalasat dyamen a akma syay.
14 Āngo, pirwahen namen pawri a rārayawen bilbilin mo kan machikabahay kami dyirad tawotawo saw a mamarin so makabābaba a dadakay? Engga! Makasoli ka abanchori a manda do kaopas mo dyamen tan aba polos makalasat mana abo mabyay?
15 O ĀPO a Dyos no Israel, malinteg ka, ki pinalobōsan mo a myan dyamen nakalasat sichangori. Cha kami do salapen mo a sigagatos, ta abaw makapaytēnek do salapen mo a maynamot do dyaya.”