4
No Kapamasidong ni Mordokeo di Ester
1 Do nakatonengaw ni Mordokeo so tabo a napariparin, pinirit naw laylay naw do kapagmamayo na. Naylaylay so makersang, nakapayokpok nas ahbek do oho na, as nakapanakenakey na do irahemaw no syodad a magdongdong-aw so malyak do oltimo a kaliday na.
2 Ki tod a nachipanda do rowanganaw no palasyo, ta abaw maylaylay so makersang a mapalobōsan a somdep.
3 Do kāda probprobinsya a nakaibaheyan no bilinaw ni āri, myan taywara kapagdongdong-aw dan Jodyo saw parayayan da so kapagayonar, katanyis, kan arimbāngaw. Kārwan dyiraw naylaylay so makersang, kan nadibadibat sad ahbek.
4 Do nakaibahey daw sya no magsirsīrbi saw ni Ester a mababakes kan yonoko saw so maynamot do pariparinen naw ni Mordokeo, taywara nariribokan. Do dāwri, napaiyangay so laylay ni Mordokeo tan sokatan naw laylay naw a makersang, ki rinawat aba ni Mordokeo.
5 Nyaw naynamotan na a pinatawagan ni Ester si Hatach a asa dyirad yonoko saw a tinongdo ni āri a magsīrbi dya. Tinoboy na si Hatach a mangay di Mordokeo, ta ipaiyahes na an āngo mapariparin di Mordokeo kan āngo ta parinen naw komwan.
6 Dawa, nangay si Hatach di Mordokeo do plāsaw no syodadaw do salapenaw no rowangan no palasyo.
7 Ki inbahey ni Mordokeo di Hatach tabo napariparinaw dya kontodo bidangaw no kwarta a inkari ni Haman a itoroh do pangapyan no āri so kwarta para do kaipadiman da so tabo Jodyo.
8 Nanoroh pa si Mordokeo so kopya no bilinaw a naipakatoneng do Sosa a maynamot do kaipadiman na sira. Chindaw na di Hatach a ipaboya na di Ester kan ilawlawag na dyaw mapariparinaw. Inmandar pa ni Mordokeo a mangay a machikakaāsi si Ester di āri tan chāsi na saw Jodyowaw.
9 Naybidi si Hatach, kan inpadāmag na di Ester inbaheyaw dya ni Mordokeo.
10 Ki pinaybidi dana ni Ester si Hatach, kan binata na dya a ibahey na di Mordokeo nya a kāna,
11 “Tabo no opisyalis saw ni āri kan tawotawo saw do probinsya saya, ki chapatak da a no aran sino a mahakay mana mabakes a somdep do makatayrahemaw a paraāngan a maypasngen di āri a dya natawagan, machita maipadiman, ta asa lang linteg. Abaw makadichan do dyaya malaksid an patongdohen dya ni āri iyaw balitokaw a baston na. An komwan, maipadiman aba. Ta an yaken, makabohan danayaw homnabas makayapo do nakatawagaw dyaken āri.”
12 Do nakapakarapitaw no nya inpaibahey ni Ester di Mordokeo,
13 inpapabidi na inpaibahey nya atbay na di Ester a kāna, “Iktokto mwaba a imo lang dya maparoparo do tabo a Jodyo maynamot ta myan ka do palasyo.
14 Ta an itmen mo dangoy mo do ōras a akma syay, mangay anchi a yapo do matarek a yanan pakalmonawan kan pakaisalakānan dan Jodyo saya. Ki imo, madiman kanchi kan mabonchiw kapotōtan āmang mo. Kan sino makapatak? Āngonchan no nayparinan mwa rēyna, ki para do akmas komwanaya chimpo.”
15 Sinpangan na, inpaibahey dana ni Ester nya atbay na di Mordokeo a kāna,
16 “Na, akpehen mo sa tabo Jodyo saya a myan do Sosa ah, as kapagayonar nyo kan pangdakdaw nyo yaken. Koman mana minom kamo aba so aran āngo do māraw kan mahep do irahem no tatdo a karaw. Aran yaken kan siraw magsirsīrbi saya dyaken a mababakes, ki magayonar kami a akma dyinyo. Katayoka na, mangay akonchi di āri a aran maikontra do linteg. As an nyaw kadimanan ko, sigi, kadimanan ko na.”
17 Do dāwri, komnaro si Mordokeo kan tinongpal na tabo inbilin naw ni Ester.