6
No Kaipadāyaw ni Āri si Mordokeo
1 Do dāwri a mahep, makapakaycheh abas āri. Dawa, inpahap naw librowaw a nakaitolasan mapariparin do pagāryan kan inbāsa da dya.
2 As kan nadongso daw yananaw no naitolas maynamot do nakapaybahebahey naw ni Mordokeo so pangta daw a mangdiman si āri. Sa Bigtana kan Teres, dadwaw a yonoko a magbanbantay do asdepanaw no kwarto ni āri a nangipangta sya.
3 Inyahes ni āri a kāna, “Āryoriw naitoroh a gon-gona kan pammadāyaw di Mordokeo do dyaya pinarin na?”
Ki tinbay dan magsirsirbyaw a kon da, “Abaw naitoroh dya.”
4 Inyahes ni āri a kāna, “Sino saw opisyalis ko a myan do atataya no palasyo?”
Ki kosto a somdep si Haman do mamangketaw do gagan a paraāngan no palasyo tan yangay na akdawen a mabītay si Mordokeo do insagāna naw a pangbitāyan sya.
5 Ki tinbay dan magsirsīrbi saw a kon da, “Toryayas Haman a maytēnek do gagan a mangnanaya machisarīta dyimo.”
“Pasdepen nyo pa dya,” inbilin ni āri.
6 Do nakapakasdep naranaw ni Haman, inyahes dya ni āri a kāna, “Āngo paro maganay a parinen do tawowaw a chasoyot ko a padayāwan?”
Ki no iniktokto ni Haman, “Ari pawriw matarek a tawo a chasoyot ni āri a padayāwan an dya yaken?”
7 Dawa, tinbay ni Haman a kāna, “Para do tawowaw a chasoyot no āri a padayāwan,
8 mapahap kas laylayaw no āri a paylaylaylay mo kan kabalyowaw a pagkabkabalyowan mo a nabistyan so sinan korona mwaw.
9 As kaipahap mos asa dyirad katotohosan naw a opisyal mo, ta iyaw manglaylay so tawowaw a chasoyot mo a padayāwan. Iya paw mangidaōlo so nakasakayaw do kabalyo a mayam do kalsāda saya do irahem no syodad, as kaipaingēngengey mo sya do opisyal mwaw so nya: ‘Chiban nyo! Komwan maparin do tawo a chasoyot ni āri a padayāwan!’ ”
10 Sinpangan na, binata ni āri di Haman a kāna, “Ngay, kabelan mo yangay mwa hapen laylay saw kan kabalyowaw, as kaparin mos binata mwaya di Mordokeo a Jodyo. Ari a maydiydisna dwa rowanganaya no palasyo. Kanakmen mo ah, parinen mwa tabo binata mwaya.”
11 Dawa, yay na inhap ni Haman laylay saw kan kabalyowaw. Do dāwri, linaylayan na si Mordokeo, as nakaidaōlo na sya a sisasakay do kabalyo do kalkalsādaw do irahem no syodad. Do kayan daw do kalkalsāda, ingēngengey ni Haman, “Chiban nyo. Komwan maparin do tawo a chasoyot ni āri a padayāwan.”
12 Katayoka no nya, naybidi dana si Mordokeo do rowanganaw no palasyo. As si Haman, binēbelan naw somnabat a naytatalob so rōpa na maynamot do asnek na.
13 Inistorya na di Seres a baket na kan do tabo sīt na saw daw tabo naparinaw dya.
Do dāwri, binata ni Seres kan mamagbaga na saw a sīt na a kon da, “Ayya. Tori dana mangrogiw kabo mos toray mo maynamot di Mordokeo a yapo do kapotōtan no Jodyo. Mahomis mo paba, basbāli a rārayawen narana imo.”
14 Do kadama da paw a machisarsarīta dya, nawara saw yonoko saw ni āri, kan kinalokalo da si Haman a mangay do paskenaw a insagāna ni Ester.