12
No Kahabasaw ni ĀPO
1 Binata ni ĀPO da Moyses kan Aaron do tana a Egipto a kāna,
2 “Iyaw nyaya bohan, ki pinakamanōma a bohan no tawen a para dyinyo.
3 Ibahey nyo do tabo tawotawo no Israel a do chaasa poho naw a karaw do dya bohan, kāda oho no pamilya, ki machita mamidi so orbon a karniro a para do pamilya na. On, asa binyay do asa kapamilyaan.
4 Ki amnan dēkey bidang no asa pamilya, as dyi da mapatawos asaw a kamemeh a orbon, machirapa dana sa do karoba daw, kan kahahanghangan daw asaw a orbon. Nyaw parinen da sigon do maitotopaw a bidang no tawo kan kabaelan a kanen no katakatayisa.
5 Siraw orbon saya a pidyen nyo, ki machita asa pas tawen a malloko a abos pakapilāwan, as kan maypidi kamo do karniro mana kalding.
6 Dāmen nyo sa manda do chaasa poho naw kan apat a karaw do dya bohan. Anchan marapit nawri a araw, mangdiman sanchi a tabo tawotawo no Israel do kapaysarisari.
7 Do dāwri, machita danchiw manghap so kadwan a raya no nadimanaw a orbon, as kapapot da sya do maybītaw a yanan mondora kan tohosaw no pantaw no bahay a ichanan da so orbon.
8 Do dāwri met lang a ahep, ichan daw asyaw a napaso kontodo tināpayaw a abos yapo kan makpad saw a moha.
9 Lataben nyo abaw karnyaw mana langgen nyo aba, an dya pasohen nyo a simememeh. On, siooho, sikokokod kan sichichinayi.
10 Mangda kamo aba manda do mabekas. An myan panda nyo do mabekas, sosohan nyo na.
11 As komwan anchiw kakan nyo so karnyaw: nakasokat kamo na so para byahi, kan sitotokap kamo nanchi kan sisasarokod. Machita a chitochitohen nyo paw kakan nyo. Iyaw nyaya, ki Kahabas ko a ĀPO.
12 “Do dāwri met lang a ahep, ki homabas akonchi do tana a Egipto, kan dimanen ko tabo a matoneng a anak a mahakay no tawo kontodo binyay, as kan okomen ko sanchi a tabo dyos da saya do Egipto. Yaken si ĀPO.
13 Iyanchiw rayaw a napangay do mondora kan tohosaw no pantaw, ki pangilasīnan a omyan kamo do dawri a bahay. As an maboya konchiw rayaw, habasan konchinyo, kan maan-ano kamo abanchi anchan dimanen ko saw matotoneng saw a taga Egipto.
14 “Iyaw nya araw, machita a kananakmen nyo. On, machita a pistaen nyonchiw nya araw kan aran siraw īto a kapotōtan nyo a para pagdaydāyaw nyo di ĀPO. Iyaw nyaya, ki kapikapyasen mo a manayon a pangeddeng nyo.”
No Pista no Tināpay a Abos Yapo
15 Binata na pa ni ĀPO a kāna, “Do irahem no papito a karaw, koman kamo so tināpay a abos yapo. Do dāmwaw anchi a araw, pakarohen nyo naw yapo nyowaw do bahabahay nyo. Ta aran sino a koman so aran āngo a napangayan so yapo a nangrogi do dāmwaw a araw a mandad chapapito naw, machita a mapaksyat do tawotawo no Israel.
16 Iyanchiw dāmwaw a araw kan chapapito naw a araw, ki maychipeh kamonchi a magdaydāyaw. Maytarabāko kamo abanchi do dya saya araw, malaksid do kapangisagāna nyo so kanen no katakatayisa.
17 “Silibraren nyo nyaya a Pista no Tināpay a Abos Yapo maynamot ta iyaw nyaya araw nakaikaro ko so trībo nyo saw a yapo do tana a Egipto. On, silibraren nyonchiw nya araw a manayon a pangeddeng a aran do īto saw a kapotōtan nyo.
18 Do manōmaw a bohan, koman kamo so tināpay a dya napangayan so yapo a mangrogi an mahepaw no cha-14 naw a karaw a mandad ahepaw no cha-21 naw a karaw.
19 Machita a do irahem no papito a karaw, abaw madongso a yapo do bahabahay nyo. An sino a aran gan-ganaet mana nayanak a Israelita a koman so aran āngo a myan so yapo, machita a mapaksyat do tawotawo no Israel.
20 On, koman kamo aba so aran āngo a naparin a myan so yapo. Aran dino pagyanan nyo, nawriw kanen nyo tināpay a abos yapo.”
21 Sinpangan na, pinatawag sa ni Moyses tabo saw panglakayen dan Israelita, as nakabata na sya dyira a kāna, “Kāda asa dyinyo, mangay a mamidi so orbon a karniro mana orbon a kalding, as dimanen nyo orbonaw a para do Kahabas ni ĀPO.
22 Manghap kamo so asa kakemkem a isopo a tamek, as kaisawsaw nyo sya do rayaw a pinangay nyo do palanggana. Papoten nyo do tohosaw no pantaw nyo kan do maybītaw a yanan mondora. Abaw mohbot ah, mandan mabekas.
23 Ta anchan homabas si ĀPO a mangay a mangdiman siras taga Egipto saw, maboya nanchiw rayaw do tohos no pantaw kan do maybītaw a yanan mondora, kan habasan nanchiw nawri a pantaw. Palobōsan nabanchi iyaw mangrārayawaw a somdep do bahabahay nyo tan dimanen naynyo.
24 “Machita a tongpalen nyo nya manayon a pangeddeng a aran do īto a kapotōtan nyo.
25 As anchan asdepen nyo tanaw a itoroh dyinyo ni ĀPO a iyaw inkari naw, machita parinen nyonchiw nya pista.
26 As anchan iyahes dan kapotōtan nyo dyinyo a kon da, ‘Āngo chakey a batahen nyaya a pariparinen?’
27 Dāwrinchi ibahey nyo a kon nyo, ‘Iyaw nya, ki sakripīsyo do Kahabas ni ĀPO. Ta si ĀPO, hinabasan naw bahabahay dan Israelitaw do Egipto do nakadiman naw siras taga Egiptwaw, ki inan-anno naba yamen.’ ” Do dāwri, naysasakeb saw tawotawowaw kan nagdaydāyaw di Āpo Dyos.
28 Pinarin dan Israelita saw akmas inbilinaw ni ĀPO da Moyses kan Aaron.
No Chaasa Poho a Pisti: Kadiman dan Matotoneng
29 Do kaābak do dāwri a ahep, diniman ni ĀPO tabo saw matotoneng a mahahakay do tana a Egipto, makayapo do matonengaw a pōtot a mahakay ni Paraon a maydisna do trono a manda do matonengaw a anak no nabahod a myan do bahodan, as kan matoneng saw a anak dan tabo binyay.
30 As sa Paraon kontodo opisyalis na saw kan sira tabo taga Egipto saw, ki naybangon sa do dāwri a ahep, as kan myan arimbāngaw no kapagdongdong-aw, ta abaw bahay a kabwan nadiman.
No Kakaro Da no Israelita do Egipto
31 Do dāwri met lang a ahep, pinatawag ni Paraon sa Moyses kan Aaron, as nakaibahey na sya dyira a kāna, “Komaro kamo na kan siraw Israelitaw yapo dyirad tawotawo ko saya! Yangay nyo na dāyawen si ĀPO a akmas chindaw nyowaw.
32 Hapen nyo saw karniro, kalding, kan bāka nyo a akmas chindaw nyowaw, as kayam nyo na, as kan bindisyonan nyo yaken ah!”
33 Siraw taga Egipto saw, ki kinalokalo da sa komaro Israelita do nasyon daw, kan binata da a kon da, “Ay samna! Madiman kami a tabo an dyi kamo pa mayam!”
34 As dawa, inhap da san Israelitaw panggamayan da saw a myan paw mināsa daw a abos yapo, as nakaisabhay da sya a nakapongos do laylay da saw.
35 Pinarin dan Israelita saw akmas binataw ni Moyses, kan chindawan da saw taga Egipto saw so warawara a naparin do pirak kan do balitok, as kan laylay da.
36 Si ĀPO, inpaanyib na saw Israelitaw dyirad taga Egipto saw. Dawa, intoroh da saw tabo a inakdaw dan Israelita saw. Komwan nakaikaro dan Israelita saw so kinabaknang dan taga Egipto saw.
No Kakaro Dan Israelitaw do Egipto
37 Do dāwri, nagrobwat sa a nanakey Israelita saw a yapo do syodad a Rameses a komwan do idi a Sokkot. Myan ngataw anem a gasot a rībo a mahahakay, malaksid do mababakes kan adedekey.
38 Myan sa paw nachirayay dyira a āro a tawotawo kontodo rarakoh saw a arban no karniro, kalding, kan bāka.
39 Nanotong sa so tināpay a abos yapo do mināsa daw a pinanawbi da yapo do Egipto. On, abaw yapo na a maynamot ta naychihat a napaksyat sa do Egipto kan apabaw ōras da a mangnanaya mana mangisagāna so mismo a kanen da.
40 Iyaw nakahay dan Israelitaw a minyan do Egipto, ki apat a gasot kan tatdo a poho a katawen.
41 As do arawaw a nachipandaw 430 a katawen, tabo dan trībo saw no tawotawo ni ĀPO, ki kinarwan daw Egipto.
42 Do dāwri a ahep, naychararakan si ĀPO a nangbantay tan ikaro na sa do tana a Egipto. As iyaw nya ahep, tabo saw Israelita kan aran siraw īto a kapotōtan da, ki machita a siyoyokay sa a magbantay a para do kaidāyaw da di ĀPO.
Siraw Machita a Parparinen do Nakahabas ni ĀPO
43 Binata ni ĀPO di Moyses kan Aaron a kāna, “Siraw nyaw mawnotan do Nakahabas ni ĀPO: aba polos gan-ganaet a koman so mākanaya do Nakahabas ni ĀPO.
44 Aran sino a adīpen a ginātang nyo, ki maparin naw koman katayokan nakakōgit nyo sya.
45 Iyaw istranghīro a tod a machidagos kan matangtangdanan a trabahador, ki maparin saba koman.
46 “Machita a koman kamo so orbon do bahayaw a naisagāna a kanan nyo. Basta dyi nyo a ihtot karnyaw do gagan bahayaw, as kan pototen nyo abaw aran āngo a tohang no orbonaw.
47 Siraw tabo tawotawo no Israel, ki machita silibraren da.
48 “An myan gan-ganaet a omyan dyinyo a makey a machipangsilibrar so Pista no Pakanaknakman so Nakahabasaya a pangidaydāyaw si ĀPO, machita nakōgit tabo saw mahahakay do kapamilyaan na. Sinpangan na, maparinaw machirāman a akmay asa nayanak a Israelita. Ki abaw aran sino a dya nakōgit a machakan.
49 Machiparihas a linteg iyaw maipākat do sīgodaw a nayanak a Israelita kan gan-ganaet a machiyan dyinyo.”
50 Tabo dan Israelita, ki pinarin da akmas inbilinaw ni ĀPO da Moyses kan Aaron.
51 Do dāwri met lang a araw, inkaro sa ni ĀPO do Egipto sigon do trībo saw no Israelita.