2
1 Do dāwri, iyaw kahanyihanyitanaya kan tanaya kan tabo mimyan da, ki tayoka dana.
2 Do chapapito naw a karaw, naynahah si Āpo Dyos, ta napakabos na tabo nakapamarswa na.
3 Binindisyonan naw chapapito naw a araw, as pinatarek naw nawri a araw a masisīta. Ta iyaw nawri a araw, nakapakabos na so tabo a nakapamarswa na.
4 Komwan pakasaritāan nakaparswa no kahanyihanyitanaya kan tanaya.
No Minoyongan no Eden
Do nakaparswa ni ĀPO a Dyos so kahanyihanyitanaya kan tanaya,
5 abaw tomnobo do tanaya, kan abaw botoh a tomnobo, ta ari na pad pinachimoy, kan ari pa abo magarado so tana.
6 Ki myan ranom a tominbod a mapaybabasa so hapot no intīro a tana.
7 Katayoka na, nanghap si ĀPO a Dyos so tana, as nakapōtar na sya a tawo. Sinpangan na, inyalop naw angesaw no byay do momodan naw no pinotar naw, ki nanyeng a natorohan so byay na.
8 Do dāya, pinarin ni Āpo a Dyos asa minoyongan do Eden. Dawriw pinangayan nas nyaya tawo a pinotar na.
9 Yapo do tana, pinatobo ni ĀPO a Dyos tabo a kīta no mapipintas a kayokayo a omsi so magaganay a kanen. Ki do hobokaw no minoyongan, myan dadwa kayo. Iyaw asaw, ki manoroh so byay a abos pandan. Iyaw somarono, ki manoroh so kapatak so maganay kan marahet.
10 Myan oksong a minoyog a yapo do Eden a mapaybabasa so minoyonganaw. As iyaw nawri a oksong, ki naysisyay a nayparin a apat so simang do gaganaw no minoyongan.
11 Iyaw manōmaw a simang na, ki mayngaran so Pison a moyog do omdibon tana a Habila.
12 Do dyaw pakaboyan so kagaganayan a balitok kontodo nyichit a pakayapwan mangingīna a bangbanglo, kan myan paw mapapateg saw a bato daw.
13 Iyaw chadadwaw no simang na, ki mayngaran so Gihon a moyog do omdibonaw do tana a Kos.
14 Iyaw chatatdo naw, ki mayngaran so Tigris a moyog do dayāen no Assirya. As iyaw chapataw no simang na, ki mayngaran so Oprates.
15 Pinangay ni ĀPO a Dyos nyaya tawo a mahakay do Minoyongan no Eden, tan paganayen na kan aywanan na.
16 Inbilin nad mahakayaw a kāna, “Maparin mo a kanen aran āngo a asin kayokayo do dyaya,
17 malaksid do asyayan kayo a makaitoroh so kapatak so maganay kan marahet. Ta do arawaw a kakan mo sya, sigorādo a madiman kanchi.”
18 Sinpangan na, binata ni ĀPO a Dyos a kāna, “Maganay aba an maychatanyi iyaw mahakayaya. Pamarin kos omno a kasmang a somidosidong sya.”
19 Do dāwri, siraw tabo no kīta no animal kan manomanok a pinotar ni Āpo a Dyos a yapo do tana, ki inyangay na sa do mahakayaw, tan chiban na an āngo ipangaran na dyira. Sigon do inbahey naw do katakatayisa, ki nawri danaw ngaran da. Komwan nakapayngaran da tabo.
20 Do dāwri, pinangaranan na san mahakayaw tabo a manomanok kan animal, ki abaw nachichwasan a makasidong do mahakayaw a kasmang na.
21 As dawa, pinakaycheh ni ĀPO a Dyos iyaw mahakayaw a nandad nakapaynepdep na. Sinpangan na, nanghap so asad taglang no mahakayaw, as nakapayamonyit nas nanghapan naw sya.
22 Pinarin na a mabakes iyaw taglangaw a inhap na do mahakayaw, as nakayangay na sya dya.
23 Sinpangan na, binata no mahakayaw a kāna,
“Aysa! Ari danayaw kasmang ko.
Iyaw tohang na, ki yapo do tohang ko.
Iyaw asi na, ki yapo do asi ko.
Dawa, ipangaran ko ‘mabakes,’
ta yapo dyaken a mahakay.”
24 Dawa, nyaw paynamotan na karwan mahakay āmang kan ānang na an machikabahay. Tan komwan, komplito kapayrapa da kan baket na, as kan sira dadwa, ki mayparin dana sa asa bayo a pamilya.
25 Pariho sa nakalābos mahakayaw kan mabakesaw, ki aba dyiraw kasnek.