29
No Kawara ni Jakob do Yanan ni Laban
1 Do katayokaw no nawri, tinongtong ni Jakob kapagbyahi naw, kan nakarapit do tana daw no taga dāya.
2 Do dāwri, nakaboya so asa bobon do gaganaw no asaw a idi. Myan saw nakpeh a maynahah a tatdwa kaarban karniro do masngenaw do bobonaw. Ta dawriw pirmi a pamaynoman da, ki nataloban pa so rakoh a bato.
3 An maychichipeh dana sa tabo karniro daw, balakwangen dan magpaspastoraw iyaw batwaw, as kapaynom da sira. An tayoka sa minom, ki paybidyen daw batwaw a patohongen.
4 Do dāwri, nanahahes si Jakob dyirad magpaspastoraw a kāna, “Inyom sir, taga dino kamo?”
Ki tominbay sa dya a kāna, “Na, taga Haran kamyaw.”
5 Inyahes pa ni Jakob dyira a kāna, “Chapatak nyori si Laban a apoko ni Nahor?”
“On, chapatak namenaw,” inatbay da.
6 Inyahes ni Jakob a kāna, “Na, komosta?”
Binata da a kon da, “Na, aryaw a maganay. Chiban mo paw maypasngenaya. Tori danayas Rakel a pōtot na a mangyangay so karniro saw ni āmang na.”
7 Binata ni Jakob dyira a kāna, “Makohat payaw araw. Ari na payad ōras a ikoral nyo sa. Āngo ta dyi nyo sa paynomen karniro saya, as paybidyen nyo sa a pagaraben?”
8 Ki tominbay sa dya a kon da, “Aysa! Maparin namen aba, ta nawri dananchiw kabalakwang namen so batwaya an maychichipeh sa tabo, as kapaynom namen sira.”
9 Ranan pa no kapachisarsaritaw ni Jakob dyirad magpaspastoraw, ki nawara si Rakel kan karniro saw ni āmang na. Ta aran iya, ki asa mangay-aywan so karniro.
10 Do dāwri a nakaboya ni Jakob si Rakel a pōtot ni Laban a kakteh ni ānang na, kan siraw karnirwaw ni maraan na, nanyeng na nangay a binalakwang iyaw batwaw a tohong no bobonaw, as nakapaynom na siras karniro saw.
11 Katayoka na, dinadek na si Rakel, kan insiknan naw tomnanyis so malyak do kasoyot na.
12 Binata na dya a kāna, “Kaanakanaw yaken ni āmang mo. Yakenaw, ki anak ni Rebekka a kakteh na.”
Do nakadngeyaw sya ni Rakel, ki nakalyalisto a nayyayo a nangay a nangibahey sya di āmang na.
13 Dawa, do nakadamāgaw sya ni Laban so maynamotaw di Jakob a anak ni kakteh na, nakapayapayyayo na a nangay a minbayat sya. Kinepkep na si Jakob, as nakadadek na sya, as inyangay na do bahay na. Do nakawara daw do bahay ni Laban, inistorya ni Jakob tabo a naparin dya.
14 Binata ni Laban di Jakob a kāna, “Oyod sawen a kaanakan koymo!”
Do dāwri, nakabohan a minyan si Jakob do yanan Laban.
No Kapagsīrbi ni Jakob tan Makakabahay
15 Do dāwri, napahabas asa a kabohan, binata ni Laban di Jakob a kāna, “Maynamot ta kaanakan koymo, āngo ta maytarabāko ka abos tangdan? Ay samna! Maparin aba komwan. Ibahey mo na ah, an papiraw chakey mwa tangdan?”
16 Ki myan do dawriw dadwa pōtot ni Laban a mababakes: si Lea iyaw matoneng kan si Rakel a ādi na.
17 Mapintas iyaw mata ni Lea, ki mapinpintas kan mapostora iyaw inawan ni Rakel.
18 Do dāwri, myan nadidiw ni Jakob a ayat na di Rakel. Dawa, binata na di maraan na a kāna, “Maytarabāko ako dyimo so papito a tawen an ipakabahay mo dyaken si Rakel a adeadekey a balāsang mo.”
19 Initbay ni Laban dya a kāna, “Naon, chakey ko, ta maganaganay a imo makakabahay sya kan matarek. Dawa, nāw mo na machiyan dyamen.”
20 Dawa, nakapaytarabāko ni Jakob so papito a katawen tan makabahay nas Rakel, kan napoōtan nabaw nakapaypahabas no araw saya maynamot ta taywaraw kadaw na si Rakel.
21 Ki do nakatayokaw ni Jakob so papito a tawen, inbahey na di Laban a kāna, “Ay mo Maraan, napakabos ko naw chimpwaw a inkari ko a maytarabāko dyimo. Chakey kwa ipakabahay mo na dyaken si Rakel tan myan danaw baket ko.”
22 Do dāwri, namarin si Laban so rakoh a pasken, as rinara na sa tabo tawotawo daw a mangay do kasar.
23 Sinpangan na, do dāwri a ahep, ki si Rakel abaw pinaoknod ni Laban di Jakob, an dya si Lea. Chapatak aba ni Jakob. Dawa, inoknod nas Lea.
24 Ki maynamot ta nangabahay dana si Lea, intoroh ni Laban di Lea iyaw mabakesaw a adīpen na a si Silpa tan iya danaw adīpen na.
25 Ki do kamabekasanaw, natonngan ni Jakob a si Lea iyaw kinaoknod naw. Dawa, nangay di Laban, as nakabata na sya dya a kāna, “Āngo ta komwan pinarin mo dyaken, mo Maraan? Nagsīrbi ako abawri dyimo so papito a katawen tan makabahay ko si Rakel? Āngo ta inallīlaw mo yaken?”
26 Ki tominbay dya si Laban a kāna, “Dāgen namen do dya an manmanma a pakabahayen namen adeadekey a anak namen, an dyi pa makakabahay iyaw matonetonengaw.
27 Patayokahen mo paw asaya a kalawas a ragragsak no kasar mo di Lea. Katayoka no nawri, ipakabahay ko pa dyimo si Rakel a ādi na an maytarabāko ka pa dyaken so papito a katawen.”
28 Nakey si Jakob. Dawa, do katayokaw no asa kalawas a ragragsak no kasar na di Lea, intoroh dya ni Laban si Rakel a nayparin pa baket ni Jakob.
29 Si Bilha a mabakes a adīpen ni Laban, ki intoroh ni Laban di Rakel tan adīpen na.
30 Inoknod pa ni Jakob si Rakel. Ki rakorakoh adaw ni Jakob di Rakel kan si Lea. Sinpangan na, naytarabāko si Jakob di Laban so papito pa a katawen.
Siraw Pōtot ni Jakob
31 Do kaboyaw sya ni ĀPO a dya oyod ni Jakob a chadaw si Lea, tinorohan na so anak. As si Rakel, ki abaw anak na.
32 Do dāwri, nabōgi si Lea, kan naymanganak so asa mahakay. Pinangaranan na so Ruben, ta binata na a kāna, “Naboya ni ĀPO iyaw kapagmamayo ko. Sigōro, chadaw na, ngata, yaken lakay ko sichangori.”
33 Sinpangan na, minirwa dana nabōgi si Lea, as inyanak naranaw asa mahakay. Pinangaranan naw adekeyaw so Simeon, ta binata na a kāna, “Intoroh na pa ni ĀPO dyaken nya anak ko, ta nadngey na a dya oyod yaken ni Jakob a chadaw.”
34 Minirwa dana nabōgi, as naymanganak dana so asa pa mahakay. Pinangaranan nas Lebi, ta binata na a kāna, “Changori, ngata, maypadekket dyaken si lakay ko, ta ari danaw tatdwa mahahakay a anak ko.”
35 Minirwa pa nabōgi, kan naymanganak pa so mahakay. Pinangaranan na so Joda, ta binata na a kāna, “Changori, dadayen ko Dyos.” Katayoka no nawri, nayhat a naymanganak.