35
No Kabindisyon no Dyos di Jakob do Betel
1 Sinpangan na, binata no Dyos di Jakob a kāna, “Ngay, may ka do Betel kan omyan ka daw. Mamarin ka daw so pangidātonan mo a pagdaydayāwan mo dyaken, ta yaken iyaw Dyosaw a napaboya dyimo do nakapayyayo mwaw a machibawa di Esaw a kakteh mo.”
2 Dawa, binata ni Jakob dyirad pamilya na saw kan tabo saw nachirayayaw dya a kāna, “Ipoha nyo a tabo iyaw myan dyinyo a didyosen a inyonot nyo. Mariyos kamo a pakaboyan so kadalos no aktokto nyo, as kan magsokat kamo a pakaboyan so kapagbaliw no aktokto nyo.
3 Magrobwat ta, ta may ta do Betel. Mamarin akonchi daw so pangidātonan do Dyos, iyaw Dyosaw a somnidong dyaken do araw a kalidyat ko kan nangrārayay dyaken do tabo a kwanan ko.”
4 Dawa, intoroh da tabo di Jakob iyaw didyosen da saw kan siraw arītos da saw. Inkadi ni Jakob nya saya do atngeh no asa kayo a mayngaran so logo a masngen do Sikem.
5 Sinpangan na, nayam sa Jakob. Ki do kayam daw, abaw minlakat sira, ta inamomo sa no Dyos tawotawo saw do masngen saw a idiidi.
6 Tinongtong da Jakob nayam a nandad nakapakarapit da kontodo tabo tawotawo na saw do idi a Los mana Betel do tanaw a Kanaan.
7 Namarin si Jakob so pangidātonan na do Dyos, as pinangaranan naw tanaw daw so “Dyos no Betel” maynamot ta dawriw napaboyan no Dyos dya do nakarahan do nakadichan naw si Esaw a kakteh na.
8 Do dāwri, nadiman si Debora, iyaw nangtagtagībyaw di Rebeka. Intābon da do ibaba no idi a Betel do atngehaw no kayo a logo. Dawa, nayngaran nawri a logar so “Logo a Nananyisan.”
No Katādi no Ngaran ni Jakob
9 Minirwa napaboya iyaw Dyos di Jakob, kan binindisyonan na do nyaya kapaybidi na a yapo do Mesopatamya.
10 Nyaw binata no Dyos dya a kāna, “Jakob ngaran mo. Ki sichangori, Jakob paba, ta mayngaran ka na so Israel.” Dawa, napangaran so Israel.
11 Binata pa no Dyos dya a kāna, “Yaken, ki iyaw Dyos a Manakabalin do Tābo. Maypāro ka tan maypāronchiw kapotōtan mo. Yapo dyira, ki tombod āro a nasnasyon, as kan myan sanchiw yapo do kapotōtan mo a mayparin a ar-āri.
12 As iyaw tanaw a intoroh ko kaychowa di simna āpong mo a si Abraham kan di āmang mo a si Isaak, ki itoroh ko dyimo, as itoroh ko panchi dyirad kapotōtan mo saw a makarwan mo.”
13 Katayoka no Dyos a naychirin di Jakob, komnaro dana.
14 As si Jakob, ki napatnek so rakoh a bato a pakanaknakman na so logaraw a naychirinan dya no Dyos. Pinadwan naw batwaw so palek a dāton na do Dyos. Pinadwan na pas lana no olibo, ta nawriw mapayparin so batwaw a pagdaydayāwan na do Dyos.
15 Dawa, pinangaranan naw nawri a logar so Betel.
No Kadiman ni Rakel
16 Sinpangan na, komnaro sa Jakob do Betel, as nakatongtong da mayam. Do dyi da pa kapanyino so idi a Eprata, narapit danaw araw no kapaymanganak ni Rakel, kan oltimo a malidyatan do kapagpasikal naw.
17 Ki do oltimwaw a kalidyat no kapagpasikal na, binata no partīraw di Rakel a kāna, “Mamo kaba, mo Rakel, ta mahakay dana mirwaw anak mo.”
18 Ki do kapaybiybitos danaw no anges ni Rakel, sakbay a nadiman, pinangaranan naw anak naw so Benoni. Ki Benhamin iyaw inpangaran ni Jakob.
19 Do dāwri, nadiman si Rakel, as intābon da do bīt no rarahan a mangay do Eprata mana Betlehem.
20 Pinatnek ni Jakob do yananaw no tanem naw asa rakoh a bato a pakanaknakman na. As manda sichangori, ki ari paw pakaboyan so yanan tanemaw ni Rakel.
21 Sinpangan na, tinongtong daw nayam da Jakob a mayngaran dana so Israel. Nakarapit sa do bīt nad Migdal-eder mana pagwanawanan so karniro, kan nagtolda sa daw.
No Dosi a Pōtot ni Jakob
(1 Kron. 2:1-2)
22 Do kayan da Jakob mana Israel do dawri a tana, nangay si Ruben a matoneng a pōtot na a nachoknod di Bilha, iyaw minabakesaw ni āmang na. Ki natonngan ni Israel nawri.
Myan asa a poho kan dadwa pōtot ni Jakob a mahahakay.
23 Siraw nyaw anak da Jakob kan Lea: si Ruben, iyaw matoneng, si Simeon, Lebi, Joda, Isakar, kan Sebolon.
24 Sa Jose kan Benhamin, ki anak da Jakob kan Rakel.
25 Sa Dan kan Naptali, ki iyaw anak da Jakob kan Bilha a adīpen ni Rakel.
26 Siraw nyaw anak da kan Silpa a adīpen ni Lea: sa Gad kan Aser. Naiyanak saw nyaya a pōtot ni Jakob do Mesopotamya.
No Kadiman ni Isaak
27 Do nakakaro da do Migdal-eder, tinongtong da Jakob nangay do Mamre a masngen do idi no Kiryat-arba mana Hebron. Dawriw yanan ni āmang na a Isaak, kan dawri paw yanan ni simna āpong na a Abraham do kaychowa.
28 Do dāwri, narapit ni Isaak iyaw tawen na a 180.
29 Naybitos byay na, kan nachirapa dana dyirad aāpong na saw. Taywara danaw kamalkem ni Isaak do nakadiman na. Intābon da Esaw kan Jakob a pōtot na.