37
Sa Jose kan Kakakteh Na Saw
1 Minyan sa Jakob do tana a Kanaan, iyaw tanaw a niyanan āmang na.
2 Nyaw pakasaritāan pamilya ni Jakob.
Do naypisa do kapagtawen ni Jose a pōtot na so asa poho kan papito, minonot dyirad aākang na saw a mahahakay a siraw anakaw ni Bilha kan Silpa a minabakes ni āmang na a somidong a magpastor siras karniro kan kalding da sa. Myan nadlaw na marahet a kaparin dan kakakteh na saya. Dawa, do nakapaybidi naw di āmang na, inbahey na dya.
3 Ki mangamangay a adayo adaw ni Jakob di Jose kan siraw kadwanaw a pōtot na maynamot ta nayanak do kamalkem naranaw. Pinamarin na si Jose so mapintas a kagay a mayid a matatarek so kīta kan manaro so tachay, as kan intoroh na di Jose.
4 Do kaboya daw sya no kakakteh na saw a rakorakoh iyaw adaw ni Jakob di Jose kan sira, inipsok das Jose, as kan aba polos maganay a kapaychirin da dya.
5 Myan asa ahep a naytayēnep si Jose. Kamabekasan na, inbahey naw nyaya dyirad kakakteh na saw, ki naypāngay nakaipsok da sya.
6 Binata ni Jose dyira a kāna, “Inyo a aākang ko, adngeyen nyo pa yaken, ta ibahey ko tayēnep kwaw dyinyo.
7 Myan taw a tabo do hakawan a mamosot so trīgo. Ki naychihataw a naytēnek pinosot kwaw. Do dāwri, dinibon daw no pinosot nyowaw, as nakapaydogod da dya.”
8 Ki binata da no kakakteh na saw a kon da, “Āngo chakey mwa batahen? Imonchoriw āri a mangitoray dyamen, as kan yamen anchoriw adīpen mo ah? Pī!” Naypaypāngay nakaipsok da sya maynamot do tayēnep naw kan do inchirin naw dyira.
9 Sinpangan na, minirwa dana naytaytayēnep si Jose, as inbahey narana dyirad kakakteh naw. Binata na dyira a kāna, “Inyom ākang ko, adngeyen nyo pa yaken, ta ari danaw tayēnep ko. Naboya kwaw araw, bohan, kan asa poho kan asa a bitohen a maydoydogod sa dyaken.”
10 Ki do kaistorya naw syay di āmang na kan kakakteh na saw, nakadabdab di āmang na. Binata ni āmang na dya a kāna, “Āngo chakey mwa batahen do dawri a tayēnep mo? Ay samna! Yamenori kāda ānang mo kan siraw kakakteh mo saya, ki maydogod kaminchi dyimo?”
11 Taywara a ipsok dan kakakteh na saw maynamot ta chahoho da. As si āmang na, ki tinongtong na iniktokto an āngo chakey na batahen no tayēnep naw.
No Kailāko ni Jose kan Kaiyangay Na do Egipto
12 Do naypisa, nangay saw kakaktehaw ni Jose do masngenaw do idi a Sikem, ta dawriw paydisan da a pangipastoran siras karniro saw kan kalding saw ni āmang da.
13 Sinpangan na, binata ni Jakob di Jose a kāna, “Barok, nangay saw kakakteh mo saw do masngenaw do idi a Sikem a mangipaspastor so karniro ta saw daw. Ngay, toboyen koymo a mangay do yanan daw ah.”
Ki tominbay si Jose, “On mo āmang, nakasagāna ako a mangay.”
14 Tinongtong ni āmang na a kāna, “Yangay mo sa chiban an maganay kayayan da ākang mo, as kan siraw binyay saw. Katayoka mo a manyideb sira, maybidi ka, ta ibahey monchi dyaken an maypāngo sa daw.” Dawa, tinoboy ni āmang na si Jose a nangay a yapo do Payahosonganaw a Hebron a yanan da nandad nakapakarapit na do Sikem.
15 Do kayan naw a midibidi do pagpaaraban daw a masngen do Sikem, myan mahakay a nakaboya sya, ki inyahes na dya a kāna, “Āngo chichwasen mo?”
16 Ki tominbay si Jose dya a kāna, “Chichwasen ko saw kakakteh ko saw. An chapatak mo an dino yanan da a mangipaspastor so binyay namen, ibahey mo pa dyaken?”
17 Ki inbahey no mahakayaw a kāna, “Ay on, komnaro dana saw dya. Nadngey kwaw a kominwan sa do Dotan.”
Dawa, inonotan sa ni Jose a kominwan do Dotan, as dawriw nakaboyan na sira.
18 Mabawa pa si Jose, ki naboya darana no kakakteh na saw. Do dāwri, sakbay a makarapit do yanan daw, nagtotōlag sa a dimanen da.
19 Nyaw inbahey dad katakatayisa dyira a kon da, “Toriw maganayaw a maytaytayēnep!
20 Maganay āno an dimanen ta, as kaalasek ta sya do asaya bobon a abos ranom? Ibahey ta nanchi di āmang a diniman no asa maranggas a binyay. Chiban ta pan āngo mahahap nad tayēnep na saw.”
21 Ki do nakadngeyaw sya ni Ruben, chakey na isalākan si Jose do marahetaw a panggep da no kakakteh na saw. Dawa, binata na dyira a kāna, “Ay, engga ah! Bitosen tabaw byay na!
22 Dyi ta pakono a dimanen ah. Tod ta alasken do dyaya bobon do let-angaya. Basta dyi ta ranggasan.” Nyaw inbahey na, ta chakey na isalākan anchi si Jose as kapaybidi na sya di āmang da.
23 Dawa, do nakapakarapitaw ni Jose do yanan daw no kakakteh na saw, tiniliw da, as kinalistwan da binahas iyaw mapintasaw a mayid a kagay na.
24 Do nakabahas daw sya, pinagtos da si Jose do asaw a bobon a abos ranom.
25 Sinpangan na, do kadama daw a koman, naboya da saw tominyitinyaw a bonggoy no maglaklākwaw a Ismaelita a taga Midyan kan kamilyo da saw a homabas daw a yapo do Gilead. As no karga dan kamilyo da saw a yangay da do Egipto, ki siraw gom, balma, kan mirra.
26 Do dāwri, binata ni Joda dyirad kakakteh na saw a kāna, “An tod ta dimanen ādi taya, as kaitayo ta sya, abayaw magon-gona ta.
27 Maganaganay āno an ilāko ta na dyirad Ismaelita saya? Dyi ta pakono a ranggāsan, ta kakteh taya kan yapo taya do asa asi kan raya?” Nakey saw kakakteh naw do inbahey naw.
28 Sinpangan na, do kapaypahabas daw no maglaklāko saw a taga Midyan, inawon dan kakakteh naw si Jose, kan inlāko da so dadwa poho a plata a pirak dyirad maglaklāko saw a Ismaelita, kan inyonot daranas Jose do Egipto.
29 Ki do kapaybidyaw ni Ruben do bobonaw, naboya na a araba si Jose daw. Dawa, pinirit naw laylay naw do oltimo a nakapagmamayo na.
30 Naybidi si Ruben do yanan daw no kakakteh na saw, as nakabata na sya a kāna, “Arabaw ādi taw! Ayya! Āngo paro parinen ko sichangori?”
31 Dawa, no pinarin da, ki nanghap sa so asa kalding, as nakadiman da sya, as nakapakneb da so raya naw do mayidaw a kagay ni Jose.
32 Sinpangan na, inyangay da di āmang da iyaw kagayaw, as nakabata da sya a kon da, “Nachichwasan namenaw nya. Chiban pam āmang, an iyaw kagay no pōtot mwaw.”
33 Nailāsin ni Jakob kagayaw ni Jose. As dawa, binata na a kāna, “Kagayayan Jose! Diniman naya no asa maranggas a animal. Sigorādo a napisapisang inawan na!”
34 Do dāwri, pinirit ni Jakob laylay naw, as nakatādi na sya so makersang a laylay, tan ipaboya naw oltimo a mamayo na. Tinanyitanyisan naw nakadimanaw ni Jose so nahay a chimpo.
35 Nangay sa tabo pōtot naw a mahahakay kan mababakes a kakakteh ni Jose di āmang da, ta chakey da ahwahoken, ki chinakey nabaw mahwahok. Binata ni Jakob a kāna, “Katngan kwaba tanyisan pōtot kwaw a mandanchan rapiten ko do yanan a kwanan nadiman.” Komwan nakatanyis ni Jakob di Jose a pōtot na.
36 Do dāwri, nakarapit dana saw taga Midyanaw do Egipto. As do dawri, inlāko da si Jose di Potipar a asa dyirad opisyalaw ni Paraon a āri do Egipto, as kan iya paw kapitan dan gwardya saw.