39
Si Jose kan Baket ni Potipar
1 As no naparin di Jose a nailāko dyirad Ismaelita saw, ki inyangay dan Ismaelita saw do Egipto. Do nakapakarapit daw daw, inlāko da di Potipar a taga Egipto a asa opisyal no Paraonaw kan kapitan pa no gwardya na saw.
2 Binindisyonan ni ĀPO si Jose do kayan naw a omyan do bahay no āmo naw a taga Egipto. Dawa, maganay a tabo naparin dya.
3 Naboya no āmo naw a si ĀPO mangaywan dya, as kan si ĀPO somnidong dya a mapaggāsat do tabo a parinen na.
4 Maynamot ta komwan, nahwahok si Potipar di Jose. Dawa, pinayparin na si Jose a iyaw manyidechideb dyirad adipen a magsīrbi do bahay na, kan pinayparin ni Potipar a mangaywan so tabo a dyira na.
5 Yapo do kaaywanaw ni Jose so bahay no āmo na kan tabo a dyira na, binindisyonan ni ĀPO siraw myanaw do bahay ni Potipar a maynamot di Jose. On, iyaw bindisyon ni ĀPO, ki myan do tabo a dyira ni Potipar do bahay na kan do mohamoha na.
6 Dawa, intalek ni Potipar tabo di Jose iyaw warawara na. Ta an si Jose iyaw mangaywan, apabaw riribok na, an dyi dana iyaw kakan na.
As maynamot di Jose, ki asa mataer a baro.
7 Dawa, nakorsonadaan baketaw no āmo naw. Myan naypisa a binata na dya a kāna, “Ngay, mayoknod ta pa?”
8 Ki chinakey aba ni Jose, as binata na dya a kāna, “Ay, ibahey mwabaw komwan, mo Mam. Chiban mo, abaw pakariribokan no āmo kwaw do dya bahay maynamot ta myan ako dya. Intalek na tabo warawara na dyaken.
9 Myan toray ko do dya bahay a akmas katoray na. Intalek na dyaken tabo a myan dya, malaksid dyimo, ta imo baket na. Ay samna! Parinen kwabaw nyaya marahet, as kan makagatos ako pa do Dyos.”
10 Aran kararaw a akdakdawen no mabakesaw di Jose a mayoknod sa, ki nakey abas Jose kan didichanan na.
11 Do asa karaw, somindep si Jose do bahayaw tan parinen naw tarabāko naw. Ki do dāwri, ki abaw aran asa dyirad kapayngay naw a adīpen do irahemaw no bahay.
12 Do dāwri, pinalang no mabakesaw laylayaw ni Jose, as nakabata na sya a kāna, “Ngay, mangay ta pa mayoknod!” Ki nakalapsot si Jose, as nakapayyayo a minohbot. Ki nabidinaw laylay naw a naigpet no mabakesaw.
13 Do dāwri, do nakadlawaw syan mabakesaw a natokos ni Josew pinalang naw a laylay na,
14 nginēyan na saw adīpen naw. Do kawara daw a yapo do gagan, binata na a kāna, “Chiban nyo nyaya. Insabat dyamen ni lakay ko nyaya Hebreo a tawo a mamarin so pakasnesnekan namen. Somindepaw kaychi do kwarto ko, ta chakey na yaken a paypariparinan, ki nangngēy akwaw so mayit.
15 Do nakadngey naw a nangngēy ako, ki nayyayo a minohbot. Ki chiban nyo, nabidinaw nyaya laylay na.”
16 Kinapya no mabakesaw laylayaw ni Jose mandad kawara ni lakay na.
17 Inbahey na di Potipar a lakay na iyaw naparinaw a akmas inbahey naw dyirad adīpen da saw. Binata na a kāna, “Iyaw nyaya a adīpen a Hebreo a insabat mo dyamen, ki somindep do kwarto ko, ta chakey naw mamarin so pakasnesnekan ko.
18 Ki maynamot do nakadngey naw sya nangngēy ako, ki nayyayo a minohbot. Ki nabidinaw nyaya laylay na,” binata no mabakesaw.
19 Do nakadngeyaw no āmwaw ni Jose so inbaheyaw no baket naw a myan marahet a pinarin ni Jose, taywara a nakasoli.
20 Do dāwri, nanyeng na pinatiliw, as nakapasdep na sya do nakabahodan daw no binahod saw no āryaw do Egipto. Dawriw niyanan Jose.
21 Ki aran komwan naparin, myan si ĀPO dya, as maynamot do bindisyon na dya, maganay kayayan na do pangōlowaw a gwardya no pamahodan.
22 Intalek no pangōlo a gwardyaw di Jose tabo kapayngay na saw a nabahod, as iya danaw makatoneng do tabo mapariparin do dawri a bahodan.
23 Yapo do dawri, pinagparikotan paba no pangōlowaw no gwardyaw intalek na saw di Jose. Ta no aran āngo a pinarin ni Jose, ki maganay, ta si ĀPO somnidong dya a mapaggāsat.