4
Sa Kain kan Abel
1 Do dāwri, do nakapayoknod daw da Adan kan Eba, ki nabōgi si baket na. Ki do nakapaymanganakaw ni Eba so anak na a mahakay, binata na a kāna, “Maynamot do sidong ni ĀPO, ki natorohan ako so anak ko a mahakay.” Dawa, Kain inpangaran na.
2 Ki minirwa dana naymanganak si Eba so asa a mahakay, as pinangaranan nas Abel. Nayparin si Abel a magpaspastor so binyay, as nayparin si Kain a maymohamoha.
3 Do nakapaypahabas no araw do nakapaytarabakwaw ni Kain, inhap naw kadwanaw a āpit na, as nakaidāton na sya di ĀPO.
4 Ki si Abel, inhap naw kagaganayan saw a katotonngan a orbon a karniro na, as nakaparti na sira. Inhap naw kagaganayanaw a asi kan taba da, as nakaidāton na sira di ĀPO. Nahwahok si ĀPO di Abel kan iyaw dāton naw.
5 Ki chinahwahok nabas Kain kan iyaw dāton naw. Dawa, naychadangedanget si Kain do oltimo a soli na.
6 Do dāwri, binata ni ĀPO di Kain a kāna, “Āngo ta makasoli ka? Āngo ta maychadangedanget ka?
7 An pinarin mo maganay, ki masoyot kabawri? Maynamot ta namarin kas marahet, ki akmas marongsotaw a animal gatos mo a omdadāan a mangranggas dyimo. Chakey naymo a itorayan, ki machita abāken mo.”
8 Sinpangan na, binata ni Kain di ādi nas Abel a kāna, “May ta do hakawan.” Do kayan daranaw do hakawan, kinelbat na a diniman si Abel.
9 Ki do dāwri, inyahes ni ĀPO di Kain a kāna, “Dino yanan ādi mos Abel?”
Initbay ni Kain a kāna, “Katen, mo ĀPO. Taywaran yaken mangaywan so ādi kwaw?”
10 Ki binatan ĀPO dya a kāna, “Taywara marahet pinarin mwaya! Iyaw raya no ādi mo a nachikneb do tanaya, ki akmay machipakpakaāsi dyaken a bahsen koymo.
11 Sichangori, nabay ka na a mabaywan a homakaw so tanaya a pinakneban mo so rayaw ni ādi mo.
12 An mohan mo tana, abanchiw maāpit mo. Nāw monchi a abos bahay, kan tod ka mayadiyadis do hapotaya no tanaya.”
13 Ki binata ni Kain di ĀPO a kāna, “Ayya! Taywara danaya so karahmet dōsa ko, kan marawa kwabaw nawri.
14 Ayya! Boyawen mo na yaken sichangori do dya tana kan do salapen mo! Tod ako nanchi a mayadiyadis a abos bahay a abos syirto a ngayan do tanaya, kan dimanen danchi yaken aran sino a makaboya dyaken.”
15 Ki tominbay si ĀPO dya a kāna, “Engga, ta an myan anchiw mangdiman dyimo, maypapitonchi dyaw dōsaya a inbahey ko dyimo.” Dawa, do dāwri, pinangayan ĀPO so marka na si Kain, tan dya dimanen no aran sino a makabayat sya.
16 Komnaro si Kain do salapen ni ĀPO, kan minyan do tana a mayngaran so Nod do dayāen no Eden.
Siraw Kapotōtan ni Kain
17 Do dāwri, do nakapayoknod daw da Kain kan baket na, nabōgi si baket na. Naymanganak so mahakay, ki pinangaranan nas Enok. Do dāwri, inrogi ni Kain napatnek so asa idi a pinangaranan nas Enok a ngaran pōtot naw.
18 Myan pōtot ni Enok a mayngaran so Irad, iyaw āmang ni Mehodyael a āmang ni Metosael a āmang ni Lamek.
19 Siraw kabahay ni Lamek, ki dadwa sa, sa Ada kan Silla.
20 Inyanak ni Ada si Jabal a iyaw kapoonan dan magpaspastor saw so binyay, kan minyan sa do tolda.
21 Si Jobal, no ngaran no ādi na mahakay. Ki iyaw kapoonan dan tabo a magtoktokar so arpa kan pīto.
22 As si Silla, inyanak na paw mahakay a si Tobal-kain. Si Tobal Kain, ki manyichīpo so matatarek a kīta no rimīnta a yapo do bronsi kan pasek. Si Naama, ki kakteh a mabakes ni Tobal-kain.
23 Inpangas ni Lamek dyirad baket na saw a kāna,
“Inyom Ada kan Silla, adngeyen nyo pa yaken.
Diniman ko asa baro maynamot ta pinaynyinan naw lang yaken.
24 An sino mangdiman di Kain, maypapitonchi dyaw dōsa,
ki no mangdiman dyaken,
ki maypapitonchi a poho kan papito dyaw dōsa.”
Sa Set kan Enos
25 Mirwa nayoknod sa Adan kan baket na, ki nabōgi si baket na. Naymanganak so mahakay, kan binata ni Eba a kāna, “Tinorohan yaken ni Āpo Dyos so anak a mahakay a tādin Abel a diniman ni Kain.” Dawa, pinangaranan nas Set.
26 Myan pōtot ni Set a mahakay a pinangaranan nas Enos. Do dāwri, rinogyan tawo maydasal di ĀPO do kaidaydāyaw da sya.