45
No Katoneng Dan Kakakteh Naw si Jose
1 Do dāwri, mapagpet paba ni Jose iyaw madididiw naw do salapen da tabo. Dawa, inbilin na dyirad magsirsīrbyaw dya a kāna, “Komaro kamo a tabo!” Do nakakaro daw, abaw matarek a rārayay na, an dyi dana siraw kakakteh na saw do nakaibahey naw sya dyira an sino iya.
2 As tomnanyis so malyak a aran siraw taga Egipto a myan do gagan, ki nadngey da. Do dāwri, yangay da inpadāmag dyirad myan saw do palasyowaw no āryaw.
3 Binata ni Jose dyirad kakakteh na saw a kāna, “Yakenaw si Jose. Oyodawri a sibibyay pas āmang ta?” Ki do nakadngey daw sya no kakakteh na saw, nableg sa do taywara nakamo da dya.
4 Sinpangan na, inbahey na a maypasngen sa dya. Do kapaypasngen daranaw dya, binata na dyira a kāna, “Yakenaw si Jose a kakteh nyo a inlāko nyo dyirad nangyangayaw dyaken do Egiptwaya.
5 Mariribokan kamo aba mana isoli nyo abaw inawan nyo do nakailāko nyowaw dyaken do kachwaw, ta pinanma yaken no Dyos a manmanma kan inyo tan mabyay āro a tawotawo.
6 Chadadwa pan kapaychapteng nyaya tawen. Myan paw dadima katawen a abo magarado kan magāpit.
7 On, pinanma no Dyos yaken a manmanma kan inyo tan madichanan nyo kadiman nyo, as kan tan myan panchiw kapotōtan nyo a mabyay do tanaya a maynamot do makaskasdāaw a kapangisalākan.
8 Dawa, inyo abaw nanoboy dyaken do dya, an dya si Āpo Dyos. Pinayparin na yaken a katotohosan dyirad opisyal saw ni Paraon. Yaken mangitoray so tābo do palasyo na, kan yaken paw mangitoray do tabo a tana no Egipto.”
9 Binata pa ni Jose a kāna, “Changori, makalisto kamo a mangay do yanan ni āmang ta, ta ibahey nyo dya a kon nyo, ‘Nyaw inbahey ni Jose a pōtot mo: Pinagtoray yaken no Dyos do tābo a Egipto. Nyeng ka mangay dyaken, kan maybabalay kaba.
10 Omyan kanchi do tana a Gosen tan masngen kamo dyaken, inyo a tabo. Ahapen mo saw pōtot mwaw, siraw apoko mo saw, karniro, kalding kan bāka mo saw, kan tabo a warawara mo.
11 Ta an myan ka do Gosen, yaken anchiw makatoneng do tabo machita mo, ta ari paw dadima katawen no kapaychapteng. Ta an dyi ka mangay, malidyatan ka kan siraw tabo a kapamilyaan mo, ta mabo monchiw tabo kinabaknang mo.’ Nyaw ibahey nyonchi di āmang ta ah.”
12 Tinongtong ni Jose iyaw naychirin dyira a kāna, “Inyo a aākang ko, kan aran imo, mo Benhamin, naboya nyo yaken a si Jose a mismo a machisarsarīta dyinyo.
13 Ibahey nyo di āmang ta an māngo katoray ko do dya a Egipto, kan ibahey nyo tabo a naboya nyo dya. Ngay, makalisto kamo, ta yangay nyo na hapen dya si āmang ta.”
14 Sinpangan na, kinepkep ni Jose si Benhamin a ādi na, as tomnanyis si Jose. As komwan si Benhamin, tomnanyis a nangepkep di ākang na.
15 Tomnanyitanyis pa si Jose a nangepkep siras aākang na saw, as nakadadek na sira. Do dāwri, makapaychirin dana sa di Jose.
16 Do nakadāmag daw do palasyo a nawara dana saw kakakteh saw ni Jose, ki nasoyot Paraonaw kan siraw opisyal na saw.
17 Binata no Paraonaw di Jose a kāna, “Ibahey mo dyirad kakakteh mo saw a kargaan daw binyay da saw, ta maybidi sa do Kanaan.
18 Ibahey mo pa dyira a ahapen da si āmang nyo kan tabo a pamilya na, tan mangay sa dya. Itoroh konchi dyiraw kagaganayan saya a yapo do tana no Egipto, as kanen danchiw āro a maganay a mākan a yapo do dyaya tana.
19 Ibilin mo pa dyira a mapanawbi sa so karison saw a yapo do Egiptwaya, tan myan pangiloganan da siras adedekey kan babbaket da saw anchan yangay da si āmang nyo dya.
20 Machita daba iktokto warawara da saw a makarwan danchi, ta matorohan sanchi so kagaganayan a yapo do tana do dya Egipto.”
21 Nagtongpal saw pōtotaw ni Jakob do tabwaw a naibahey dyira. Nanoroh si Jose so karison saw a akmas inbilinaw ni Paraon, kan tinorohan na pa sa so bahon da do rarahan.
22 Do katakatayisa dyira, tinorohan na pa sa so bayo a pagsokatan da, ki dadimaw intoroh na di Benhamin kan tatdwa gasot a plata a pirak.
23 Pinaw-itan na pa si āmang na so asa poho a malloko a asno a myan so karga do kagaganayan saw a yapo do Egipto kan asa poho pa a mabinayi a asno a myan so rara a irek, tināpay, kan kadwan pa a mākakan a machita no pamilya ni āmang na a komwan do Egipto.
24 Katayoka na, pinayam na saw kakakteh naw. As do kakaro daw, binilin na sa a dyi sa maydidiman do rarahan.
25 Do dāwri, komnaro sa do Egipto, as naybidi sa do Kanaan a yanan ni Jakob a āmang da.
26 Do nakapakarapit daw do yanan āmang da, inbahey daw tabo a naparin dyira a kon da, “Sibibyay pa sawen si Jose! Iyaw magtoray do tābo a Egipto.” Ki do dāwri, taywara nableg si Jakob, as nagistayan a dya narawan pōso na, kan nanganohed aba dyira.
27 Ki do kaistorya daw so tabo inbaheyaw ni Jose dyira, kan do nakaboya naw so karison saw a inpaw-it ni Jose a pagloganan na a mangay do Egipto, nagtalna danaw pōso naw.
28 Binata ni Jakob a kāna, “Aysa! Anohdan ko na sichangori a sibibyay pa sawen si Jose a pōtot ko! Apabaw matarek a chakey ko. Basta yangay kwa chiban changori sakbay a madiman ako.”