48
No Kabindisyon ni Jakob Sa Epraim kan Manasses
1 Naynam aba, do asa karaw, nadāmag ni Jose a maganyit si āmang na. Inhap na saw dadwaw a pōtot na a sa Manasses kan Epraim, as nakangay da do yanan āmang na.
2 Do nakadamāgaw sya ni Jakob a nawara si Jose a pōtot na, pinilit naw inawan naw a maydisna do katri naw.
3 Binata ni Jakob di Jose a kāna, “Napaboyaw dyaken iyaw Manakabalin a Dyos do Tābo do kachwaw do kayan kwaw do Los do tana no Kanaan, as dawriw nangbindisyonan na dyaken.
4 Binata no Dyos dyaken a kāna, ‘Torohan konchimo so āro a pōtot mo, kan pārohen ko sanchiw kapotōtan mo tan payparinen koymo a āmang no āro a nasnasyon. Itoroh konchiw nyaya tana a dyira dan kapotōtan mo a abos pandan.’ ”
5 Tinongtong ni Jakob naychirin a kāna, “Imom Jose, ibidang ko sa a pōtot ko siraw dadwaya mahahakay a pōtot mo a nayanak do Egiptwaya sakbay a nangay ako dya. On, ibidang ko a dyaken dana sa Epraim kan Manasses a akmas Ruben kan Simeon.
6 Ki an myan pa sanchiw somarono dyira a maipōtot mo, ki dyira mo. As maynamot do tana a matāwid danchi, ki yapo dananchi da Epraim kan Manasses iyaw tāwid da.
7 Parinen ko nyaya a maynamot di Rakel a ānang mo. Ta do nakapaybidi kwaw a yapo do Mesopotamya, taywara nagmamamyo ako do kayam namen, ta nadiman si ānang mo a baket ko do tana a Kanaan a masngen do idi a Eprata. Dawa, intābon ko daw do bītaw no rarahan a komwan do Eprata.” Betlehem dana sichangori iyaw Eprataw do kaychowa.
8 Do nakaboyaw sya ni Jakob siras dadwaw a pōtot ni Jose a mahahakay, inyahes na a kāna, “Sino saw nyaya kamotdehan?”
9 Initbay ni Jose a kāna, “Siraw nya, mo āmang, intoroh no Dyos a motdeh ko do kayan kwaya do dya.”
Binata ni Jakob dya a kāna, “Pasngenen mo sa dyaken tan bindisyonan ko sa.”
10 Binata ni Jakob komwan a maynamot ta makaboya paba do kamalkem na. Dawa, pinasngen sa ni Jose dyaw motdeh na saw. Kinepkep sa ni Jakob, as nakadadek na sira.
11 Binata ni Jakob di Jose a kāna, “Polos a hahawen ko paba mirwa ta mayboya. Ki maynamot do kāsi no Dyos, naboya ko paymo a aran sira paw motdeh mo saya.”
12 Katayoka na, pinabawa ni Jose saw pōtot naw a yapo do masngenaw do tōd ni Jakob, as nakapagrōkob na do ratag do salapenaw ni āmang na a mangipaboya so kapagdāyaw na dya.
13 Sinpangan na, pinaydogod ni Jose si Epraim do anmwaw no kaholi a tanoro ni Jakob, as si Manasses do kawanan naw.
14 Ki pinaytopdis ni Jakob tachay na saw, as pinalapaw naw kawanan naw do ohwaw ni Epraim a ādi na. As pinalapaw naw kaholyaw a tanoro na do ohwaw ni Manasses a matoneng.
15 Katayoka na, binindisyonan sa ni Jakob, as binata na a kāna,
“No Dyos pakono a dinaydāyaw da simna āpong ko
a si Abraham kan āmang ko a si Isaak, ombindisyon dyinyo.
On, iyaw Dyosaya a nangaywan dyaken a nanda sichangori,
16 iya paw anghilaw a nangisalākan dyaken do tabo a marahet.
Iya pakono ombindisyon siras dadwa saya a pōtot mo.
As maynamot dyirad dadwa saya,
polos pakononchi a dya mawayakan ngaran ko
kan ngaran da simna āpong kos Abraham kan si Isaak a āmang ko.
Maypāro pakononchiw kapotōtan da do hapotayan tana.”
17 Nagmamayo si Jose do kaboya naw a iyaw kawananaw a tonoro ni āmang na, ki pinalapaw na do ohwaw ni Epraim. Dawa, inigpet ni Jose iyaw tanorwaw ni āmang na tan padatoken na do ohwaw ni Manasses.
18 Binata ni Jose a kāna, “Komwan aba, mo āmang, ta nyaw matoneng. Iyaw machita a palapawan mo so kawananaya tanoro mo.”
19 Ki maskeh si āmang na, as binata na a kāna, “On mo anak ko, chapatak ko. Masisīta panchiw kapotōtan ni Manasses. Ki alit na, mimyan paw kapotōtan no ādi naya, ta mayparin sanchi a āro a nasnasyon.”
20 Binindisyonan na sa do dāwri a araw. Binata na pa a kāna, “Siranchiw ngaran nyo a dadwaw, osaren dan Israelita saw a kapotōtan ko an mangbindisyon sa. Batahen danchi a kon da, ‘Payparinen na pakono inyo ni Āpo Dyos a akmas pinarin na da Epraim kan Manasses.’ ” Dawa, pinanōma na si Epraim kan Manasses.
21 Katayoka na, binata na di Jose a kāna, “Maboya mo a makey dana mawsep byay ko. Ki aran komwan, myan anchiw Dyos dyinyo, as paybidyen nanchinyo do tana a Kanaan a dyira no kapoonan nyo saw.
22 Ta sirabaw kakakteh mo, an dya imo iyaw panorohan ko so tana a Sikem a inhap ko dyirad Amoreo saw a tawotawo maynamot do bahayang kan pana ko.”