4
No Soli ni Jonas kan Kāsi ni Āpo
1 Ki insoli ni Jonas nya a naparin kan pinagmamayo na.
2 Dawa, naydasal di ĀPO a kāna, “O ĀPO, binata ko abawri do kayan ko paw do bahay ko a iyaw nyaw chaamak kwaw a parinen mo? Nyaw naynamotan na a nyeng ako a nayyayo a nangay do Ispanya, ta sīgod kwaw a chapatak ngamin a myan dyimo parābor, kan māsisyen ka a Dyos. Masosolihen kaba, kan somawasaway adaw mo. Sisasagāna ka a mangibabāwi so kapangdōsa mo dyira.
3 Dawa, mo ĀPO, sichangori, hapen mo naw byay ko, ta maganaganay dana an madiman ako na kan mabyay pa!”
4 Ki inatbay ni ĀPO a kāna, “Aryoriw kalintegan mo a makasoli?”
5 Sinpangan na, komnaro si Jonas do Ninebeh, as nangay do dayāenaw no syodad. Namarin so sāpaw na daw, as nakapaydisna na do sirong naw a omnanaya an āngo maparin do syodadaya.
6 Do dāwri, napatobo si ĀPO a Dyos so asa moha a nangsirong so ohwaw ni Jonas tan dya komriit. Oltimo nakasoyot ni Jonas do dawri a moha.
7 Ki do kamabekasan naranaw no somaronwaw a araw, insagāna no Dyos iyaw asaw a ohed a mangrārayaw so nawri a moha. Dawa, nahayo kan nadiman.
8 As do nakadada danaw no arawaw, pinaysasalawsaw no Dyos so domalangdang a yapo do dāya. As iyaw kohat naw no arawaw a makasosoh, ki chinapleng ni Jonas. Chakey naranaw madiman kan kāna, “Maganaganay dana an madiman ako na.”
9 Ki binata no Dyos di Jonas a kāna, “Aryoriw kalintegan mo a makasoli do naparinaya do mohaya?”
“On!” initbay ni Jonas. “Manawob nyaya pakasoliyan ko, as abaw makapenpen dyaken a aran nya danaw kadimanan ko.”
10 Ki binata ni ĀPO a kāna, “Chāsi mo nya moha a tomnobo do asa lang a kahep, as nakadiman na do somaronwaw a ahep. Aryoriw hopag mo a nangpatobo mana nangparakoh sya?
11 Rombeng abawri a chāsi ko tawotawo saw do Ninebeh? Do dawri a mabīleg a syodad, omyan nasorok 120,000 a tawotawo a dya makapaychapidi so kosto kan madi. As kan nawri aba lang, ta myan sa paw reprep a binyay da.”