2
No Pangen Dan Kabaga
1 Alopan nyo trompīta do Sion.
Ipadngey nyo ballāag do masantwan a tokon ko.
Paychamirpirpir nyo a tabo a omyan do Joda,
ta no arawaw a kangay ni ĀPO, ki masngen dana.
2 Araw anchi no kasari kan kaliday.
Araw anchi a kakonem kan taywara a kasari.
Akmay yosari a komayab a mangay do katokotokonan,
komwan kadahepdep dan bōyot no kabaga a domarop.
Ari pad naparin akmas syay,
kan mirwa pabanchi a maparin komwan.
3 Do salapen da, manghanyib apoy.
Do dichodan da, somdesdeb gilāyab na.
Do tana a masongādan da, ki akmay minoyongan no Eden,
ki do madichodan da a tana, ki mayparin a let-ang,
kan abaw makalāsat.
4 No oho da, ki akma say kabalyo.
Mayyayo sa a akmay kabalyo a pachigobat.
5 Do kahokhokso da do tōtok no katokotokonan,
komaradakad sa a akmay logan a pachigobat.
Akma say manalichichit a apoy a manghanyib so garami.
Akma say mabīleg a bōyot a nakasagāna do gobat.
6 As do kapaypasngen da, maychinyābot tawotawo,
kan somohaw rōpa da.
7 Domarop sa akma saw taga-gobat.
Akma say taga-gobat a komayat do ahad.
Māsa sa magmarcha a nakalinya
a dya somiwal do kwanan da.
8 Magdodongpar saba. Magderecho kāda asa do ayaman na.
Asaken daw makabalat sira a dya mapenpen.
9 Taros sa a maysopo do syodad.
Mayyayo sa mangalkalipkip do ayaman do ahadaw.
Komayat sa do bahabahay,
kan somdep sa do bintan a akmay manakanakaw.
10 Magon-gon tanaya do kasōngad da.
Mamirpir kahanyihanyitan.
Maysāri iyaw araw kan bohan,
kan siraw bitohen, ki magranyag pa saba.
11 No tīmek ni ĀPO, akmay adey do panman dan soldādo na.
Mabidang abaw bōyot na, kan mabīleg saw magtongpalaw so bilin.
Iyaw arawaw ni ĀPO, ki mabīleg.
Taywara a makamwamomo. Sino paro makaibtor?
No Awis a Kagbabāwi
12 Bata ni ĀPO a kāna, “Ki aran sichangori,
maybidi kamo dyaken a sipopōso
a mapawnotan so kapagayonar, katanyis, kan kapagdong-aw.
13 Ipaboya nyo kapagmamayo no pōso nyo,
iyabaw kapirit nyo so laylay nyo.”
Maybidi kamo di ĀPO a Dyos nyo,
ta māsisyen kan mangahwahok,
maydamnay aba makasoli kan maaadawen,
kan nakasagāna a mamakawan kan dya mangdōsa.
14 Āngonchi yapo do kāsi na, iditen naynyo,
kan manokos so bindisyon imbes a abay.
Tan komwan, makaidāton kamo di ĀPO a Dyos nyo so irek kan inomen.
15 Alopan nyo iyaw trompīta do Sion.
Mangikeddeng kamo so mapasnek a kapagayonar.
Manawag kamo so madyosan a kapaychichipeh!
16 Akpehen nyo saw tawotawo.
Pasantwen nyo saw tawotawo a maychichipeh.
Akpehen nyo saw panglakayen.
Akpehen nyo saw adedekey, kan siraw tagībi saw.
Aran siraw bayo a naychakabahay,
machita karwan daw kwarto da, kan mangay sa.
17 Nolay nyo saw papādi a magsirsīrbi di ĀPO
a tomanyis do payawan no atat no timplo kan altaraw.
Nolay nyo sa mangibahey a kon da, “Chāsi mo pa mo ĀPO tawo mo.
Dyi mo pakono a ipalōbos a siraw magtāwid mo, ki maoy-oyaw sa
a mayparin a panyinyirin da no nasnasyon.
Āngo ta ibahey da dyirad tawotawo a kon da,
‘Dino yanan Dyos da?’ ”
No Atbay ni Āpo
18 Sinpangan na, palālo nakaipateg ni ĀPO so tana na,
kan chināsi na saw tawotawo na.
19 Inatbay sa ni ĀPO tawotawo na a kāna,
“Torohan koynyo so trīgo, palek, kan lana,
kan mapnek kamonchi.
Ipalōbos ko pabanchi inyo a oyawen dan nasnasyon.
20 Pakarohen konchiw bōyot no soldādo a yapo do ammyānan a machibawa dyinyo,
kan abogen konchi do let-ang.
Siraw myan do panman a bōyot, ki maikwan sanchi do Nadiman a Tāw.
As siraw myan do dyichod a bōyot, ki maikwan sanchi do Mediterranean a Tāw.
Mangot sanchi kan iyaw angot daw, ki maypatohos,
a maynamot do tabo marahet a pinarin da.”
21 Mamo kaba, imo a tana a Israel.
Masoyot kan magragsak ka.
Sigorādo a si ĀPO, namarin so mabīleg saw a kaparin.
22 Mamo kamo aba, inyo a bolaw a animal,
ta siraw pagaraban nyo, ki magegla dana sa.
Omsi dana saw kayokayo.
Siraw kayokayo a igos kan ōbas, ki mawngawngay dana sa.
23 Magragsak kamo, tawotawo no Sion.
Chasoyot nyo si ĀPO a Dyos nyo.
Torohan naynyo so masāpa a chimoy a mangipaboya so kinalinteg na.
Itoroh naw maboslon a chimoy
a iyaw masāpa kan maatiw a chimoy a akmas sīgod.
24 Siraw pangirkan saw, ki mapno sanchi so trīgo.
Siraw baldi saw, ki maglipyas sanchi so palek kan lana.
Bata ni ĀPO a kāna,
25 “Paybidyen konchi dyinyo nabo saw a tawtawen
a nakapayrārayaw dan kabaga dyinyo.
On, siraw pinangen kan homokhokso sa a kabaga,
kan siraw manggetgeteb kan kadwan a kabaga
a mabīleg a bōyot ko a tinoboy ko dyinyo.
26 Āronchiw kanen nyo a manda do kapnek nyo,
kan dayāwen nyonchi yaken a ĀPO a Dyos nyo
a namarin so makaskasdāaw a kaparin a para dyinyo.
Masnesnekan pabanchiw tawotawo ko a mirwa.
27 Do dāwrinchi, mapatakan nyo a myan ako dyinyo a Israel,
kan yaken iyaw ĀPO a Dyos nyo, kan apabaw matarek.
Masnesnekan pabanchiw tawotawo ko a mirwa.”
No Arawaw ni Āpo
28 “Katayoka no nyaya,
Akneben konchi so Ispirito ko tabo tawotawo.
As siranchiw anak nyowaw a mahahakay kan mababakes, ki mangipadto sanchi so ipakatoneng kwaw dyira.
Paytaytayēnepen ko sanchiw mangalkem nyo.
Pagparmataen ko sanchiw babbaro nyo.
29 Komwan sanchiw pachirawatan saw a mahahakay kan mababakes,
akneben ko sanchi so Ispirito ko do dāwri sanchi a araw.
30 Ipaboya konchiw makaskasdāaw saw do kahanyihanyitan kan do tanaya.
Myan anchiw raya, apoy, kan matokpoh a ahob.
31 Iyaw araw, ki mayparin anchi a sari,
kan manyibayaw bohan a akmay raya
sakbay a mawaraw mabīleg kan makamwamomo a araw ni ĀPO.
32 Do dāwrinchi, aran sino a mangdaw so sidong ko a ĀPO, ki maisalākan.
Ta do Tokon a Sion kan do Jerosalem
myan sanchiw papere a makalāsat,
akmas binata ko a ĀPO a kon ko,
‘On, siraw makalāsat, ki siranchiw pidyen ko.’ ”