10
No Kaābak Dan Amoreo
1 Nadāmag ni Adoni-sedek a āri no Jerosalem a sinakōp ni Joswe iyaw idyaw a Ai, kan taywara a rinārayaw naw idyaw kontodo āri na a akmas pinarin naw do Jeriko kan āri na. Nadāmag na pa a siraw taga Gibeon, ki nachikapya dyirad Israelita kan omyan dana sa dyira.
2 Siraw omyanaw do Jerosalem, ki taywara a nabakel sa do dyaya. Ta iyaw Gibeon, ki rakoh a idi a akma dyirad myanaw so āri. Rakorakoh pa kan Ai, kan siraw mahahakay, ki magaganay sa a machigobat.
3 Dawa, inpaw-it ni Adoni-sedek iyaw minsāhi naw dyirad ar-āri sa a Hoham do Hebron, Piram do Jarmot, Japya do Lachis, kan Debir do Eglon.
4 Iyaw nyaw minsāhi na: “Somonget kamo dya, kan sidongan nyo yaken, ta raoten taw Gibeon, ta nachikapya sa di Joswe kan dyirad Israelita saw.”
5 Siraw nya saya dadima Amoreo a āri no Jerosalem, Hebron, Jarmot, Lachis, kan Eglon, ki nayrarapa sa, kan dinibon daw Gibeon tan raoten da sa.
6 Do dāwri, nanoboy saw taga Gibeon so nachikakaāsi di Joswe do kampo daw do Gilgal a kon da, “Nonolay mwaba yamen a adīpen nyo. Kabelan nyo yamen a isalākan. Sidongan nyo pa yamen, ta nayrarapa dana saw bōyot dan tabo ar-āri no Amoreo a omyan do katokotokonan saw a mangdarop dyamen!”
7 Dawa, somnonget sa Joswe kan tabo bōyot na kontodo siraw kagaganayan saw a machigobat, kan nagmarcha sa yapo do Gilgal.
8 Nachisisirin si ĀPO di Joswe a kāna, “Mamo kaba a maynamot dyira, ta pinagballīgi ko naya inyo. Abaw aran asa a makatēnek a machilāban dyinyo.”
9 Naychararakan sa Joswe kan siraw bōyot naw a nagmarcha yapo do Gilgal a romnapit do Gibeon, kan rinaot da saw Amoreo do ōras a dyi da hahawen.
10 Pinaychinyābot ni ĀPO Amoreo saw do nakaboya daw so bōyot no Israel. As siraw Israelitaw, ki diniman daw āro a Amoreo do Gibeon. Siraw nayyayowaw, ki linakatan da sa do rarahan a mangay do Bet-horon, kan nāw da mangdiman dyira a aran manda do abagātan do Aseka kan Makkeda.
11 Do nakapayyayo dan Amoreowaw a minosok do rarahan a yapo do Bet-horon a mangay do Aseka, pinagtos ni ĀPO rarakoh saw a yilo a yapo do hanyit. Arwaro nadiman do dawri kan siraw diniman daw no Israelita.
12 Do dāwri a araw a pinagballīgi ni ĀPO Israelita saw dyirad Amoreo saw, nachisisirin si Joswe di ĀPO do salapen dan Israelita saw a kāna,
“Imom araw, nāw mo a maytēnek do Gibeon,
Imom bohan, magsardeng ka do Payahosongan Aidyalon.”
13 Dawa, iyaw araw, ki nāw na naytēnek,
kan iyaw bohan, ki nayadis aba
a manda do nakapangābak no nasyon a Israel do kabōsor na saw.
Naitolas nya do Libro a Jasar. Iyaw araw, ki nāw na naytēnek do hobok no hanyit, kan somindep aba a naychararakan.
14 Polos a dya naparin do napahabas, kan polos a dya maparin a mandas changori akmas komwan a araw a nakatongpal ni ĀPO so kapangdaw no tawo. Ta si ĀPO, ki nachigobat a para di Israel!
15 Nakatayoka no nya, naybidi sa Joswe kan bōyot na saw do kampo da do Gilgal.
No Nakadiman Dan Dadima a Ar-āri Dan Amoreo
16 As siraw dadima saw a ar-āri dan Amoreo, ki nagtālaw sa, kan tomnayo sa do aschip do Makkeda.
17 Ki myan nangipadāmag di Joswe so tinaywan daw.
18 Binata ni Joswe a kāna, “Badedehen nyo rarakoh saw a bato do asdepanaw do aschip, kan ipabantay nyo.
19 Inyo a kadwan, magsardeng kamo aba. Tongtongen nyo sa lakatan kabōsor ta saya, as padichodan nyo sa. Palobōsan nyo saba a romapit do idiidi da ah, ta pinagballīgi naya inyo ni ĀPO.”
20 Dawa, tinongtong ni Joswe kan Israelita saw nangdiman dyira. Ki myan saw papere a nakatālaw a nakarapit do naahadan saw a idiidi da.
21 Katayoka na, naybidi sa a dya naparoparo di Joswe siraw tabo bōyot na do kampo daw do Makkeda. Do dāwri, abaw aran asa do tana daw a makaitored a maychirin so machikontra dyirad Israelita saw.
22 Sinpangan na, binata ni Joswe a kāna, “Iwangan nyo asdepanaw do aschip, kan yangay nyo dyaken dadima saw a ar-āri.”
23 Dawa, pinarin da kan inihtot da saw ar-āryaw no Jerosalem, Hebron, Jarmot, Lachis, kan Eglon.
24 Do nakaiyangay daw sira di Joswe, tinawagan naw tabo mahahakay no Israel do salapen na. Do dāwri, inmandar ni Joswe dyirad komander saw a nachangay dya a kāna, “May kamo dya, kan lasagan nyo lagaw dan nya ar-āri.” Nawri pinarin da.
25 Binata na pa ni Joswe dyira a kāna, “Mamo kamo aba kan maōpay kamo aba. Payiten kan patoreden nyo aktokto nyo, ta komwan anchiw parinen ni ĀPO dyirad tabo kabōsor nyo.”
26 Do dāwri, diniman ni Joswe siraw ar-āryaw, kan inpalōdyit na sa do dadima a kayo a ditā da daw a manda do kasdep no araw.
27 Do kapaysarsari naranaw, inmandar ni Joswe dyira a pabodisen daw bangkay saw, kan pagsiden da sa do irahem no nawri a aschip a tinaywan da. As do asdepanaw do aschip, pinonan das rarakoh a bato, kan ari pa daw a mandas changori.
No Nakasākop ni Joswe so Arwaro Pa a Tana Dan Amoreo
28 Do dāwri a araw, sinākop da Joswe iyaw idi a Makkeda, kan tiniliw da pa iyaw āri daw. Inpadiman ni Joswe tabo omyan daw. Abaw aran asa a natokos a mabyay. Pinarin ni Joswe do āri no Makkeda akmas pinarin naw do āri no Jeriko.
29 Do nakatayoka no nya, yapo do Makkeda, tinongtong da Joswe kan tabo Israelitaw kominwan do Libna, kan ginobat da sa.
30 As si ĀPO, ki inparawat narana sa kontodo āri na dyirad Israelitaw. As siraw Israelita, ki diniman da tābo omyan daw. Abaw aran asa a natokos a mabyay. Pinarin ni Joswe do āri daw akmas pinarin naw do āri no Jeriko.
31 Do nakatayoka no nya, yapo do Libna, tinongtong da Joswe kan tabo Israelitaw kominwan do Lachis. Dinibon da, kan ginobat da sa.
32 As si ĀPO, ki inparawat narana sa dyirad Israelitaw do chadadwa naw a araw. As siraw Israelita, ki diniman da tabo omyan daw a akmas pinarin da do Libna.
33 Ki si Āri Horam no Geser, ki nangay a somnidong dyirad taga Lachis. Alit na, inābak da Joswe iyaw āri kontodo bōyot na saw mandan arabaw aran asa a natokos a mabyay.
34 Somarono, yapo do Lachis, kominwan sa Joswe kan tabo Israelita do Eglon. Dinibon da, kan ginobat da sa.
35 Do dāwri a araw, sinākop da kan diniman da tabo omyan daw a akmas pinarin daw do Lachis.
36 Do nakatayoka no nya, yapo do Eglon, tinongtong da Joswe kan tabo Israelita iyaw somnonget a nangraot so Hebron.
37 Sinākop daw idyaw kan diniman da iyaw āryaw, tabo a omyan kontodo sīcho na saw. Abaw aran asa a natokos a mabyay a akmas pinarin ni Joswe do Eglon.
38 Do dāwri, naybidi sa Joswe kan tabo Israelita do Debir, kan ginobat da sa.
39 Sinākop daw Debir kan tiniliw daw āri naw pakairamānan sīcho na saw. Diniman da sa tābo omyanaw daw. Kinakma ni Joswe so pinarin naw do Debir kontodo āri na iyaw akmas pinarin naw do Libna kan āri na kan do Hebron.
40 Sinākop ni Joswe intīro a tana. Inābak naw ar-āri da do katokotokonan saw kan do Negeb, do paytoytokonan saw do lāod, as kan do barikir saw do dāya. Pinalobōsan na sabaw aran asa a mabyay, ta diniman na sa tabo. Nyaw inbilin ni ĀPO a Dyos dyirad Israel.
41 Yapo do Kades-barnea do abagātan a manda do Gasa a masngen do aptan, inpadiman ni Joswe tābo a magrāman tabo tana no Gosen manda, kan do ammyānan do Gibeon.
42 Tiniliw ni Joswe tabo saw nya ar-āri, kan sinākop na saw tana da a pinaypisa. Ta si ĀPO a Dyos no Israel, ki nachigobat a para dyira.
43 Do nakatayoka no nya, somnabat sa Joswe kan tabo Israelita do kampo da do Gilgal.