12
No Kapagribīldi no Israel a Maikontra di Rehoboam
(2 Kron. 10:1-19)
1 Nangay si Rehoboam do Sikem, ta tabo tawotawo no Israel, ki nangay sa daw a mapayparin sya a āri da.
2 Do nakadāmag naw ni Jeroboam a pōtot ni Nebat so nyaya, naybidi a yapo do Egipto, ta myan pa daw nakayapo do nakapaglības naw di Āri Solomon.
3 Dawa, inpatawag dan tawotawo no Israel si Jeroboam. Sinpangan na, iya kan tābo kakpekpehan no tawotawo no Israel, ki nangay sa di Rehoboam, kan binata da dya a kon da,
4 “Si āmang mo, ki pinarahmetan naw pāko namen. Sichangori, an papawen mo paw malidyataya a kapagsīrbi namen kan marahmetaya a naipāko dyamen, ayket magsīrbi kaminchi dyimo.”
5 Tominbay si Rehoboam a kāna, “Komaro kamo so tatdo a karaw, as maybidi kamonchi dyaken.” Dawa, komnaro saw tawotawowaw.
6 Sinpangan na, nangdaw si Āri Rehoboam so pamagbaga dyirad panglakayen saw a nagsīrbi di Solomon a āmang na do nakapagāri naw. Binata na dyira a kāna, “Āngo pamagbaga nyo dyaken a itbay ko dyirad dyaya tawotawo?”
7 Inatbay da a kon da, “Sichangori, an mayparin ka a magsīrbi dyira dyaya a tawotawo kan somidong, as ichirin mo makahwahok a atbay dyira, nāw mo sanchi a pachirawatan.”
8 Ki inonolay ni Rehoboam nyaya a pamagbaga a intoroh dan panglakayenaw dya. Basbāli a nangay a nangdaw so pamagbaga dyirad babbaro saw a kinasādar na a nayparakoh a madama a magsirsīrbi dya.
9 Inyahes na dyira a kāna, “Āngo pamagbaga nyo a atbay ko dyira dyaya tawotawo a nakabata dyaken a kon da, ‘Papawen mo paw pākwaya a pinangay ni āmang mo dyamen’?”
10 Siraw babbarwaw a kinasādar na a nayparakoh, binata da a kon da, “Siraw nangibahey dyimo a kon da, ‘Pinarahmetan ni āmang mo pāko namen, ki papawen mo paw pāko namen,’ komwan ibahey mo dyira a kon mo, ‘Iyaw kikit ko, ki matoktokpoh kan katinghan āmang ko.
11 Pinangayan na inyo ni āmang ko so marahmet a pāko, ki rapan ko panchi so karahmet. Dinōsa naynyo ni āmang ko do saplit sa, ki dosāen konchi inyo siras anggagamma.’ ”
12 Naybidi sa Jeroboam kan tabo tawotawo di Rehoboam do chatatdo naw a karaw a akmas binataw ni āri a kāna, “Maybidi kamonchi dyaken do chatatdo naw a karaw.”
13 Kinelkelga no āri saw tawotawowaw, kan innonolay naw pamagbagaw a intoroh dan panglakayen.
14 Basbāli a inonotan naw bagbaga dan babbarwaw a binata na a kāna, “Pinarahmetan ni āmang ko pāko nyo, ki rapan ko panchi so karahmet. Dinōsa naynyo ni āmang ko do saplit sa, ki dosāen konchi inyo siras anggagamma.”
15 Dawa, inadngey saba no āryaw tawotawowaw. Ta nya naparin, ki yapo di ĀPO tan matongpal inchirin naw a inpaibahey na di Ahiha a taga Silo di Jeroboam a pōtot ni Nebat.
16 Do nakaboya daw sya no tabo tawotawo no Israel so kaskehaw no āryaw a mangadngey sira, inatbay daw āryaw a kon da,
“Āngo bīngay namen di Dabid? Aba!
Aryoriw tāwid namen do pōtot ni Jesse? Aba!
Somabat kamo na do tolda nyo sa, O Israel!
Intwan mo bōkod mo a bahay, O Dabid!”
Dawa, siraw tawotawo no Israel, ki somnabat dana sa.
17 Ki tinongtong naw nagāri ni Rehoboam dyirad tawotawo no Israel a omyan dyirad idiidi no Joda.
18 Sinpangan na, tinoboy ni Āri Rehoboam si Adoniram a iyaw manyidechideb siras napīlitan saw a maytarabāko a mangay dyirad tawotawo no Israel a mapaychakapya. Ki inob-obor dan tabo tawotawo no Israel manda do nakadiman na. As si Āri Rehoboam, ki inalistwan naw somnakay do logan naw, kan naglības a kominwan do Jerosalem.
19 Dawa, siraw tawotawo no Israel, ki nagribīldi dyirad kapotōtan ni Dabid a manda sichangori.
20 Do nakapatak daw no tabo tawotawo no Israel a naybidi dana si Jeroboam, inpatawag da a mangay do kakpekpehan dan tawotawo, kan pinayparin da a āri do tabo a Israel. Moyboh a iya danaw trībo naw no Joda iyaw nabidin a mapodno dyirad kapotōtan ni Dabid.
21 Do nakawaraw ni Rehoboam do Jerosalem, nangpeh iya so 180,000 a napidi a taga-gobat a yapo dyirad trībo no Joda kan Benhamin a manggobat siras asa pohwaw a trībo no Israel do ammyānan. Nyaw pinarin ni Rehoboam a pōtot ni Solomon tan mapabidi a mirwa iyaw pagāryan dya.
22 Ki naipakatoneng no chirin no Dyos di Semayas a propīta no Dyos.
23 Binata dya ni ĀPO a kāna, “Ibahey mo do āri no Joda a si Rehoboam a pōtot ni Solomon, kan dyirad tabo tawotawo do Joda kan Benhamin, kan dyirad kadwan saw a tawotawo nya a kon mo,
24 ‘Nyaw bata ni ĀPO: Somonget kamo aba a machigobat dyirad kaliposan nyo a siraw tawotawo no Israel. Somabat kāda asa dyinyo, ta iyaw nyaya a naparin, ki yapo dyaken.’ ” Dawa, tinongpal daw chirin naw ni ĀPO, kan naychasabasabat sa a mirwa a akmas inbilin naw.
No Katadyichokod ni Jeroboam do Dyos
25 Sinpangan na, pinakotāan ni Āri Jeroboam idyaw a Sikem do katokotokonan no Epraim, kan minyan daw. Yapo daw, komnaro kan inahnyihnyi na pa do idi a Penwel.
26 Binata ni Jeroboam do inawan na a kāna, “Aysa, maparin a mapabidinchiw pagāryan ko dyirad kapotōtan ni Dabid.
27 An somonget saw nyaya tawotawo ko a mangay a mangidāton do timplo ni ĀPO do Jerosalem, mirwa darana itoroh pōso da do āpo da a si Rehoboam a āri no Joda. Dimanen danchi yaken, kan maybidi sa di Āri Rehoboam.”
28 Do nakatayoka ni Āri Jeroboam a nagpabalākad, ki namarin so dadwa a balitok a sinan orbon a bāka. Binata na dyirad tawotawowaw a kāna, “Ay, manawob danaw kahay nyo a mangngangay do Jerosalem. Inyo a tawotawo no Israel, cha sa dya siraw dyos nyo a nangisonget dyinyo a yapo do Egipto.”
29 Napangay so asa do Betel, kan asa do Dan.
30 Iyaw nyaya, ki napaygatos siras tawotawo no Israel do kangay da a magdaydāyaw do Betel kan do Dan.
31 Napatnek pa si Jeroboam siras pagdaydayāwan do matotohos saw a logar, kan nanongdo so papādi sa a yapo dyirad tabo tawotawo a aran dyi sa Lebita.
32 Napatnek so pista do chaasa poho naw kan dadima karaw do chawawaho naw a kabohan a akmas kapagpista daw do Joda, kan nangidāton siras dātonaw do altaraw. Pinarin naw nya do Betel, iyaw kapangidāton do sinan bāka a pinarin na. As dawri paw napatnekan na so papādi saw dyirad pagdaydayāwanaw a logar a pinarin na.
33 On, do dāwri a araw kan bohan a pinidi na, nangay do altaraw a pinatnek na do Betel a mangidāton. Dawa, pinatnek naw nya pista a para dyirad tawotawo no Israel, kan somnonget a nangay do altaraw a nangidāton.