13
Si Jehoahas a Āri no Israel
1 Do chadadwa naw a poho kan tatdo a katawen no kapagāri ni Joas a āri no Joda a pōtot ni Ahasyas, si Jehoahas a pōtot ni Jeho, ki nayparin a āri no Israel do Samarya. Nagāri so asa poho kan papito a katawen.
2 Pinarin naw marahet do kapanyideb ni ĀPO do nakawnot na so gatogatos ni Jeroboam a pōtot ni Nebat a nawriw napawnot siras tawotawo no Israel a naygatos, kan tinadyichokodan na saba.
3 Dawa, taywara a nakasoli si ĀPO dyirad tawotawo no Israel, kan nahay a chimpo a inpaitoray na sa do toray ni Hasael a āri no Aram kan si Ben-hadad a pōtot na.
4 Do dāwri, nangdaw si Jehoahas so sidong di ĀPO, kan inadngey ni ĀPO iya, ta naboya na an maypāngo kataywara no āri no Aram a nangidadanes siras tawotawo no Israel.
5 Nanoboy si ĀPO so mangisalākanaw do Israel, tan mawayawayaan sa do toray dan taga Aram. Dawa, siraw tawotawo no Israel, ki minyan dana sa do bōkod da a bahay a akma do nakarahan.
6 Ki aran komwan, tinadyichokodan da sabaw gatogatos ni Jeroboam a nawriw napawnot siras tawotawowaw no Israel a naygatos, an dya tinongtong da pa. As nāw na pa nakatēnek postyaw a pagdaydayāwan no dyosa a Asera do Samarya.
7 Abaw natokos a bōyot ni Jehoahas malaksid do dadima saw a poho a komakabalyo, asa poho a loglogan a pachigobat, kan asa poho a rībo a manakenakey a soldādo. Ta no āri no Aram, ki rinārayaw na saw kadwanaw, kan pinayparin na sa akmas ahbekaw a nalasalasagan.
8 Siraw kadwan saw a napariparin do nakapagāri ni Jehoahas, tabo pinariparin na kan pinatayoka na saw, ki naitolas sabawri do librowaw no pakasaritāan dan ar-āri no Israel?
9 Nachipaynahah si Jehoahas dyirad aāmang na saw, kan naitābon do Samarya. As si Jehoas a pōtot na, ki nachitādi dya a āri.
Si Jehoas a Āri no Israel
10 Do chatatdo naw a poho kan papito a katawen no kapagāri ni Joas a āri do Joda, si Jehoas a pōtot ni Jehoahas, ki nayparin a āri no Israel do Samarya. Nagāri so asa poho kan anem a katawen.
11 Pinarin naw marahet do kapanyideb ni ĀPO, kan tinadyichokodan nabaw tabo a gatos ni Jeroboam a pōtot ni Nebat a nawriw napawnot siras tawotawowaw no Israel a naygatos. Nāw na tinongtong kapaygatos.
12 Siraw kadwan a napariparin do nakapagāri ni Jehoas, tabo pinaripinarin na kan pinatayoka na saw, nagrāman nakapachigobat na di Amasyas a āri no Joda, ki naitolas sabawri do librowaw no pakasaritāan dan ar-āri no Israel?
13 Nachipaynahah si Jehoas dyirad aāmang na, kan si Jeroboam, ki nachitādi dya a āri. Si Jehoas, ki naitābon do Samarya dyirad ar-āri no Israel.
14 Do kasibibyay paw ni Jehoas a āri no Israel, naganyit si Eliseo a propīta a nawrinchiw pakadimanan na. Minosok si Jehoas tan yangay na chiban, kan tomnanyis dya. Intanyis ni Jehoas a kāna, “Āmang ko! Āmang ko! Loglogan a pachigobat kan komakabalyo sa no Israel!”
15 Binata dya ni Eliseo a kāna, “Manghap kas bai kan kadwan saw a dāwa no bai.” Do nakahapaw sira ni Jehoas,
16 binata ni Eliseo do āri naw no Israel a kāna, “Ipalka mo bai mwaya.” Do nakaipalka naw sya, inigpet ni Eliseo kakamay saw no āri.
17 Binata ni Eliseo a kāna, “Iwangan mo bintanaya do mangket do dāya.” Do nakaiwangaw sya ni Jehoas, binata ni Eliseo a kāna, “Papanahen mo!” Do nakaipana naw sya, binata ni Eliseo a kāna, “Nyaw pana ni ĀPO a pangipaboya na so kapagballīgi monchi a maikontra do Aram! Hanyiben mo sanchi a rārayawen Arameo saw do Apek.”
18 Sinpangan na, binata na pa a kāna, “Apen mo pa saw dāwaw no bai.” Do nakahapaw sira no āryaw, binata ni Eliseo dya a kāna, “Panahen mo tanaya.” Pinana no āryaw so maypitdo, as nakaisardeng na sya.
19 Do dāwri, nakasoliw tawo naw no Dyos dya, kan binata na a kāna, “Pinana mo pakono so naypadadima mana nay-anem tan abāken monchiw Aram kan mahanyib sanchi a marārayaw. Ki sichangori, maypitdo mo sanchi lang a abāken.”
20 Sinpangan na, nadiman si Eliseo, kan naitābon.
Do dāwri, myan saw bonggoy dan Moabitaw, ki romnaot sa do tanaw no Israel kāda mangrogiw no bayo a tawen.
21 Do naypisa, do kayan daw no kadwan a Israelita a mangitābon so tawo, naychihat da naboya saw bonggoy daw no mangraot. Dawa, pinagsid dan Israelitaw bangkayaw no tawowaw do aschip a iyaw tanem naw ni Eliseo. Do nakasalid naw no bangkayaw so tohang naw ni Eliseo, nagōngar tawowaw kan naytēnek.
22 Indadanes ni Hasael a āri no Aram siraw tawotawo no Israel do ōnos no kapagāri ni Jehoahas.
23 Ki chināsi sa ni ĀPO a nyaw nangipaboyan na so kāsi kan kapachipangdidiw na dyira a maynamot do nakapachitōlag naw da simna Abraham, Isaak, kan Jakob. Manda sichangori, ki chinakey na saba rārayawen mana paksyaten do salapen na.
24 Do nakadiman ni Hasael a āri no Aram, si Ben-hadad a pōtot na, ki nachitādi dya a āri.
25 Sinpangan na, inagaw ni Jehoas a pōtot ni Jehoahas di Ben-hadad a pōtot ni Hasael idiidi saw a inhap na do gobat di āmang na a si Jehoahas. Naypitdo a inābak ni Jehoas si Ben-hadad, kan inhap naranaw idiidi da saw no Israelita.