2
No Kahap ni Elyas a Mangay do Hanyit
1 Do kaīto naranaw no kahap ni ĀPO si Elyas a mangay do hanyit do asa alipogpog, sa Elyas kan Eliseo ki myan sa manakenakey do rarahan daw a yapo do Gilgal.
2 Binata ni Elyas di Eliseo a kāna, “Myan ka dya ah, ta toboyen naya yaken ĀPO do Betel.”
Ki binata ni Eliseo a kāna, “Akmas kasigorādo no kasibibyay ni ĀPO, kan akmas kasibibyay mo, karwan ko abaymo.” Dawa, minosok sa do Betel.
3 Asa bonggoy dan propīta do Betel, minohtot sa a nangay di Eliseo, kan binata da a kon da, “Chapatak mori a sicharaw, ki ahapen danan ĀPO iyaw āmo mwaya dyimo?”
Initbay na a kāna, “On, chapatak ko, ki maylilyak kamo aba.”
4 Sinpangan na, binata ni Elyas dya a kāna, “Myan ka dyam Eliseo. Toboyen yaken ĀPO do Jeriko.”
Ki initbay ni Eliseo a kāna, “Akmas kasigorādo no kasibibyay ni ĀPO kan akmas kasibibyay mo, karwan kwaba imo.” Dawa, nangay sa do Jeriko.
5 Iyaw bonggoy daw no propīta do Jeriko, nangay sa di Eliseo kan binata da dya a kon da, “Chapatak mori a sicharaw, ki ahapen danan ĀPO iyaw āmo mwaya dyimo?”
Initbay na a kāna, “On, chapatak ko, ki maylilyak kamo aba.”
6 Sinpangan na, binata ni Elyas dya a kāna, “Myan ka dya ah, ta toboyen naya yaken ĀPO do Oksong a Jordan.”
Initbay na a kāna, “Akmas kasigorādo no kasibibyay ni ĀPO kan akmas kasibibyay mo, karwan kwaba imo.” Dawa, sira dadwa, ki tinongtong daw nayam.
7 Myan paw dadima poho a yapo do bonggoy no propīta iyaw nachangay. Naytēnek sa a nachibawa so dēkey do yanan da Elyas kan Eliseo a nagsardeng do payis no Oksong a Jordan.
8 Binahas ni Elyas kagay naw, nakahon na sya, kan inbaot na do ranomaw. Naycharwaw ranomaw a kominwan do kawanan kan kominwan do kaholi. Sira dadwa, ki nayam sa a naysopo do mabkohaw a tana.
9 Do nakapaysopo daranaw, binata ni Elyas di Eliseo a kāna, “Ibahey mo dyaken an āngo maparin ko para dyimo sakbay a mahap ako a mangkaro dyimo?”
Initbay ni Eliseo a kāna, “Palobōsan mo pa tawīden ko so maypirwa iyaw ispirito mo.”
10 Binata ni Elyas a kāna, “Nangdaw ka so malidyat. Aran komwan, an maboya mo yaken anchan mahap ako a mangkaro dyimo, madyira monchi. Ki an engga, madyira mo abanchi.”
11 Do katongtong daw so kayam da kan magsarsarīta, naychihat a myan nagparang a logan a napongosan so apoy a ginoyod dan kabalyo a somdesdeb a dya marōnot, as kan pinaysyay na sa dadwa. Naypatohos si Elyas a kominwan do hanyit do asa alipogpog.
12 Naboya ni Eliseo nyaya kan nangagay a kāna, “Āmang ko! Āmang ko! Loglogan a pachigobat kan komakabalyo sa no Israel!” As naboya paba ni Eliseo si Elyas. Do dāwri, inigpet naw bōkod naw a laylay, as nakapirit na sya a pinaycharwa.
13 Kinamet naw kagayaw a nasday a yapo di Elyas, kan naybidi a naytēnek do payis naw no Oksong a Jordan.
14 Do dāwri, inbaot na do ranom kagayaw ni Elyas a nasday. “Dino danaw yanan ĀPO, a Dyos ni Elyas?” inyahes na. Do nakabaot naw so ranomaw, naycharwa a kominwan do kawanan kan do kaholi, kan naysopo.
15 Iyaw bonggoyaw no propīta a yapo do Jeriko a nangboybōya sya, binata da a kon da, “Nangay danayaw ispiritwaw ni Elyas di Eliseo.” As nangay sa nachibayat dya kan nagrōkob sa do tana do salapenaw.
16 Binata da a kon da, “Chiban mo pa. Yamen a pachirawatan mo, ki myan dyamen dadima poho a makabael a mahahakay. Palobōsan mo sa mangay a mangchichwas so āmo mwaw. Ta aranchi a inahap iya no Ispirito ni ĀPO a pinadisna do kadwanaya a tokon mana do kadwanaya a payahosongan.”
Ki inatbay sa ni Eliseo a kāna, “Engga, toboyen nyo saba.”
17 Ki inpapāti da mandan taywara dana masnekan si Eliseo a machiengga. Dawa, binata na a kāna, “Toboyen nyo na sa.” As nanoboy sa so dadima poho a mahahakay a naychichwas so tatdo a karaw, ki nachichwasan daba.
18 Do nakapaybidi daw di Eliseo do nakabidinan naw do Jeriko, binata na dyira a kāna, “Inbahey ko abawri dyinyo a dyi kamo na mangay?”
No Kapangpapya no Ranom
19 Binata dan tawotawowaw do idi a Jeriko di Eliseo a kon da, “Chiban mo pa mo āpo, iyaw nyaya idi, myan do maganay a logar a akmas kaboya mwaya sya. Ki madi iyaw ranom kan iyaw tana, ki makapahtot aba so asi dan omsi.”
20 Binata na a kāna, “Mangyangay kamo dyaken so bayo a sabak, kan pangayan nyo so asin irahem naw.” Dawa, nangyangay sa dya.
21 Sinpangan na, nangay do pakayapwanaw no ranom kan inpoha naw asinaw daw, kan binata na a kāna, “Nyayaw bata ni ĀPO: ‘Inagāsan ko nyaya ranom. Polos dananchi a mirwa paba pakayapwan kadimanan mana pakaalisan.’ ”
22 Iyaw ranomaw nāw narana maganay mandas changori a araw maynamot do inchirinaw ni Eliseo.
No Kairoromen da si Eliseo
23 Yapo daw, somnonget a kominwan si Eliseo do Betel. Do nakapanakenakey naw do rarahanaw, myan saw magtotobo a nayhohtot a yapo do idyaw kan inroromen da a kon da, “Somonget kam poltak! Ngay, somonget kam poltak!”
24 Nagpolīgos a nanyideb sira, kan inabay na sa do ngaran ni ĀPO. Sinpangan na nayhohtot dadwaw a mabinayi a oso do kakayowanaw, kan linisalisay da saw apataw a poho kan dadwa a magtotobo.
25 Tinongtong naw nangay ni Eliseo do Tokon a Karmel, kan yapo daw, ki naybidi do Samarya.