21
Si Manasses a Āri no Joda
1 Nagtawen si Manasses so asa poho kan dadwa do nakapagāri na, kan nagāri do Jerosalem so dadima poho kan dadima katawen. No ngaran ni ānang na, ki si Hepsibah.
2 Pinarin naw marahet do kapanyideb ni ĀPO do nakawnot na siras makabābabaw a dadakay da no nasnasyon a pinaksyat ni ĀPO do salapen da no Israelitaw.
3 Minirwa a pinatnek na saw pagdaydayāwanaw a rinārayaw ni āmang na a si Hesekyas, kan napatnek so altar sa para di Baal, as kan pinarin naw posti ni Asera a akmas naparinaw ni Ahab a āri no Israel. Nagrōkob dyirad tabo myan do kahanyihanyitan, kan nagdaydāyaw dyira.
4 Pinatnek naw gan-ganaet saw a altar do timplo ni ĀPO a aran inbahey ni ĀPO a kāna, “Do Jerosalem pangayen konchi daw ngaran ko.”
5 Do irahemaw no dadwa a atat no timplo ni ĀPO, pinatnek naw altar saw a para dyirad tabo myan do kahanyihanyitan.
6 Insakripīsyo naw bōkod naw a pōtot a masosohan do apoy. Nagosar so madyik a mangipadto. Nangdakdaw dyirad mamadtwaw, manolibaw, kan ispiritista. Namarin so āro a marahet do kapanyideb ni ĀPO a nawriw nangpasoli sya.
7 Inhap ni Manasses iyaw inpakitikit naw a posti ni Asera, kan pinangay na do timplowaw a aran dawriw nangibaheyan naw sya ni ĀPO di Dabid kan si Solomon a pōtot na a kāna, “Do dyaya timplo kan do Jerosalem a pinidi ko yapo do tabo trībo no Israel, ki pangayen konchi daw ngaran ko a abos pandan.
8 Pirwahen ko pabanchi a paksyaten Israelita saw a komaro do tanaw a intoroh ko dyirad popoon da. On, pirwahen ko pabanchi, basta siaannad sa a mamarin so tabo inbilin ko dyira, kan mangtongpal so tābo linteg a intoroh dyira ni Moyses a pachirawatan ko.”
9 Ki nangadngey sabaw tawotawowaw. Pinawnot sa ni Manasses a nachibawa, tan mamarin sa so arwaro pa marahet kan siraw nasyon saw a rinārayaw ni ĀPO do salapen dan Israelitaw.
10 Inpaibahey ni ĀPO dyirad pachirawatan na saw a siraw propītaw:
11 “Si Manasses a āri no Joda, ki namarin siras nyaya a makabābaba a gatos. Namarin so maraherahet pa kan tabo pinarin dan Amoreo a nanmanma kan iya, as kan pinawnot na paw tawotawo no Joda a naygatos a maynamot dyirad bolto na saw.
12 Dawa, nyaw bata ni ĀPO a Dyos no Israel: ‘Īto dana a mangyangay ako so didigra do Jerosalem kan tana no Joda tan no aran sino a makadngey so nya dāmag, ki mableg anchi do kāmo na.
13 Lonaten konchiw paltikaw do Jerosalem a naosar a kontra do Samarya kan iyaw pindōlaw a naosar a kontra do pamilya ni Ahab. Ponasen konchiw Jerosalem akmas kapamonas no asa tawo so sabak. On, ponasan konchi, as kapasakeb ko sya.
14 Karwan ko sanchiw dyira ko a tawotawo a makalāsat, kan iparawat ko sanchi do kakamay dan kabōsor da sa. Mayparin sanchi a maanop kan iyaw samsaman dan tabo kabōsor da.
15 Nya, ki maynamot ta namarin sa so marahet do kapanyideb ko, kan pinasoli da yaken a nakayapo pa do arawaw a nakahtot dan popoon da sa do Egipto a manda sichangori.’ ”
16 Nachirohno pa a pinawyog ni Manasses taywara āro a raya dan abwaw so gatos a nanda do nakapno no Jerosalem so raya a naysopo do intīro a syodad. Nya, ki matarek kan gatos naw a nakapawnot na siras tawotawowaw no Joda a naygatos tan pinarin daw marahet do kapanyideb ni ĀPO.
17 Siraw kadwan saw a napariparin do nakapagāri ni Manasses, kan tabo a pinariparin na a nagrāman iyaw gatosaw a naparinan na, ki naitolas sabawri do librowaw no pakasaritāan dan ar-āri no Joda?
18 Nachipaynahah si Manasses dyirad aāmang naw, kan naitābon do minoyonganaw no Ossa. Si Amon a pōtot na, ki nachitādi dya a āri.
Si Amon a Āri no Joda
19 Nagtawen si Amon so dadwa poho kan dadwa do nakapagāri na, kan nagāri do Jerosalem so dadwa katawen. No ngaran ānang na, ki si Mesollemet a pōtot a mabakes ni Haros a taga Jotba.
20 Pinarin naw marahet do kapanyideb ni ĀPO akmas pinarin ni āmang na a si Manasses.
21 Inonotan naw tābo kabibyay ni āmang na do kapagdaydāyaw siras bolto saw a dinaydāyaw ni āmang na, kan nagrōkob dyira.
22 Tinadyichokodan na si ĀPO a Dyos no popoon na, kan naybibyay aba do chakeyaw ni ĀPO.
23 Nagpangta saw opisyalis ni Amon so maikontra dya, kan diniman daw āryaya do palasyo na.
24 Sinpangan na, diniman da met no tawotawowaw do dawri a tana siraw tabo a nangipangta so kontra di Āri Amon, as nakapayparin da si Josyas a pōtot no āryaw a nachitādi dya a āri.
25 Siraw kadwan saw a napariparin do nakapagāri ni Amon, kan no pinaripinarin na, ki naitolas sabawri do librowaw no pakasaritaan dan ar-āri no Joda?
26 Naitābon do aschipaw a tanem na do minoyongan no Ossa. Si Josyas a pōtot na, ki nachitādi dya a āri.