8
No Kaipabidi no Tanaw no Sonammita
1 Do nakarahan, binata ni Eliseo do mabakesaw a Sonammita a pinagōngar na so anak a mahakay a kāna, “Komaro ka dya magrāman pamilya mo. As do aran dino a pakachichwasan nyo so pachipagyanan nyo, ki omyan kamo daw so dēkey a chimpo, ta inkeddeng ni ĀPO a myan kapaychapteng do dyaya tana a mandanchan papito a katawen.”
2 Insigīda pinarin no mabakesaw binataw no tawowaw no Dyos. Iyaw mabakesaw magrāman pamilya na, ki komnaro sa kan minyan sa do tana daw no Pilisteo so papito a katawen.
3 Do nakatayoka naw no papito a katawen, naybidiw mabakesaw a yapo do tana daw no Pilisteo saw, kan nangay do āryaw a nachikakaāsi a mapaybidi dyaw bahay naw kan tana naw.
4 Do dāwri, myan a machisarsaritaw āryaw di Gehasi a pachirawatan no tawowaw no Dyos, kan binata ni āri a kāna, “Ibahey mo pa dyaken tabo saw makaskasdāaw saw a pinarin ni Eliseo.”
5 Do kadama paw ni Gehasi a mangibahey do āryaw an maypāngo nakapagōngar ni Eliseo so byay no nadiman, iyaw mabakesaw a pinagōngar ni Eliseo so anak a mahakay, ki nangay a nachikakaāsi do āryaw para do bahay naw kan tana naw.
Binata ni Gehasi a kāna, “Iyayaw nyayaw mabakesaw mo āpo ko a āri, kan iyayaw nyaw anak naw a mahakay a pinaōngar ni Eliseo.”
6 Inyahes no āryaw do mabakesaw maynamot do dawri, kan inbahey no mabakesaw do āryaw a oyod a naparin.
Do dāwri, dinotokan no āryaw asaw a opisyal a mangasikāso so kāswaw no mabakesaw, kan binata na dya a kāna, “Pabidyen mo tabo a dyira no mabakesaya magrāman tabo ganansya a nahap do tana naw yapo do nakakaro naw manda sichangori.”
No Kaipadiman ni Hasael si Ben-hadad
7 Nangay si Eliseo do Damasko. Si Ben-hadad a āri do Aram, ki maganyit. Do nakaipadāmag daw sya do āryaw a nangay daw tawowaw no Dyos,
8 binata no āryaw di Hasael a asa opisyal na a kāna, “Mangyangay ka so sāgot kan mangay mo a bayaten tawowaw no Dyos. Ipaiyahes mo dya di ĀPO a kon mo, ‘Mapyan ako pawri do dyaya ganyit ko?’ ”
9 Nangay si Hasael a nachibayat di Eliseo, kan kinargaan na saw apataw a poho a kamilyo so sāgot saw a kagaganayan a warawara a yapo do Damasko. Nangay kan naytēnek do salapen naw, kan binata na a kāna, “Iyaw anak mwaw a si Ben-hadad a āri no Aram, ki tinoboy na yaken a manahes dyimo a ipaiyahes na di ĀPO a, ‘Mapyan ako pawri do dyaya ganyit ko?’ ”
10 Initbay dya ni Eliseo a kāna, “Yangay mo a ibahey do āryaw a kon mo, ‘Masigorādo a mapyan kanchi.’ Ki aran komwan, inpaltiing ni ĀPO dyaken a madiman anchi.”
11 Nāw na minolagātan si Hasael a mandad nakasnek dana ni Hasael. Sinpangan na, tomnanyis tawowaw no Dyos.
12 Inyahes ni Hasael a kāna, “Āngo ta tomanyis āpo ko?”
Initbay na a kāna, “Maynamot ta chapatak ko saw marahet a parinen monchi dyirad tawotawo no Israel. Sosohan monchiw kōta da sa. Dimanen mo sanchiw magtotobo da sa a mahahakay do ispāda. Pagsiden mo sanchiw tagībi da sa do tana, kan piriten monchi a iwangan bodek dan mabōgi saw a mababakes.”
13 Binata ni Hasael a kāna, “Maypāngo a yaken a pachirawatan mo a akmaw chito lang, ki mamarin so komwan so karakoh a kabīleg?”
Inatbay ni Eliseo a kāna, “Inpaboya dana dyaken ni ĀPO a mayparin kanchi a āri no Aram.”
14 Sinpangan na, kinarwan ni Hasael si Eliseo, kan naybidi dana do āpo naw. Do nakapanahes naw ni Ben-hadad, “Āngo binata ni Eliseo dyimo?”
Inatbay ni Hasael a kāna, “Inbahey naw dyaken a syirto a mapyan ka.”
15 Ki do somaronwaw a araw, nanghap so matokpoh a ayob, as nakapakneb na sya do ranom, kan pinangtaklab na do rōpa naw no āryaw a mandan nadiman. Do dāwri, si Hasael danaw nachitādi a āri.
Si Jehoram a Āri no Joda
16 Do chadadima naw a katawen no kapagāri ni Joram a pōtot ni Ahab do Israel, ki inrogi ni Jehoram a pōtot ni Jehosapat kapagāri na do Joda.
17 Do dāwri, nagtawen si Jehoram so tatdo a poho kan dadwa, kan nagāri so wawaho a katawen do Jerosalem.
18 Inonotan naw dadakay dan ar-āri saw no Israel a akmas pinarin pamilya ni Ahab, ta kinabahay naw balāsang naw ni Ahab. Pinarin naw marahet do kapanyideb ni ĀPO.
19 Aran komwan, maynamot di Dabid a pachirawatan na, rinārayaw aba ni ĀPO Joda, ta inkari na a nāw na myan akmay paysohwan para di Dabid kan siraw kapototan na abos pandan.
20 Do kachimpo ni Jehoram, nagribīldiw nasyon a Edom so maikontra do Joda, kan napatnek so bōkod na a āri.
21 Dawa, nangay si Jehoram do Sair magrāman tabo loglogan na sa a pachigobat. Do nakadibon daw sya no Edomita iya kan siraw komanderaw no loglogan na sa, rinaot na sa do kamahep kan nakapaglības. Ki no bōyot no āri do Joda, ki nayyayo sa do bahabahay da.
22 Mandas changori, nagribīldiw Edom so maikontra do Joda. Aran iyaw no Libna, ki nagribīldi do dāwri pa a chimpo.
23 Siraw kadwan saw a napariparin do nakapagāri ni Jehoram, kan tabo a pinaripinarin na, ki naitolas sabawri do librowaw no pakasaritāan dan ar-āri no Joda?
24 As nachipaynahah si Jehoram dyirad aāmang na saw, kan naitābon do syodad ni Dabid. As si Ahasyas a pōtot na, ki nachitādi dya a āri.
Si Ahasyas a Āri no Joda
25 Do chaasa poho naw kan dadwa a katawen no kapagāri ni Joram a pōtot ni Ahab a āri no Israel, si Ahasyas a pōtot ni Jehoram a āri do Joda, ki nangrogi a nagāri.
26 Nagtawen si Ahasyas so dadwa poho kan dadwa do nakapagāri na, kan nagāri do Jerosalem so asa katawen. No ngaran ni ānang na, ki si Atalya a apoko a mabakes ni simna Omri a āri no Israel.
27 Inonotan naw dadakay no pamilya ni Ahab. Pinarin naw marahet do kapanyideb ni ĀPO a akmas pinarin no pamilya ni Ahab, ta naikāmang do kapachikabahay na do pamilya ni Ahab.
28 Nachangay si Ahasyas di Joram a pōtot ni Ahab a machigobat di Hasael a āri no Aram do Ramot-gilead. Dawriw, nangbigaran da no Arameowaw si Joram.
29 Dawa, naybidi si Āri Joram do Jesreel tan mapapyaw bigar naw a yapo dyirad Arameo saw do Ramot do kapachigobat naw di Hasael a āri no Aram.
Sinpangan na, si Ahasyas a pōtot ni Jehoram a āri no Joda, ki minosok do Jesreel a mangpasyar di Joram a pōtot ni Ahab, ta nabigaran.