5
No Dasal a Kapangdaw so Kāsi
1 Kanakmen mo pa mo ĀPO, naparinaw dyamen.
Chiban mo paw kasnesnekan namen.
2 Iyaw tāwid namen, ki naybadiw a dyinira dan istranghiro.
Siraw bahay namen, ki niyanan daranan gan-ganaet.
3 Akma kami naw olila a abos āmang.
Nabālo dana saw aānang namen.
4 Machita a bayādan namen ranom a inomen namen.
On, machita pa a gatāngen namen irotong namen.
5 Igogor da yamen a akma kami naw nwang a napākwan.
Mahah kami, ki mapalobōsan kami aba maynahah.
6 Nagpaitoray kami do Egipto
kan do Assirya tan makakan kami.
7 Siraw kapoonan namen, naygatos sa, kan ara pa saba.
As yamen danaw maysabhay so dōsa da.
8 Siraw adīpen do nakarahan, ki intorayan da yamen,
kan abaw makaisalākan dyamen do tanoro da.
9 Iposta namen byay namen do kapanghap so mākan namen
maynamot dyirad nagarmas so ispāda do let-ang.
10 Iyaw kodit namen, ki komohat akmay pogon
maynamot do kapagbāra do kapteng.
11 Siraw babbaket namen do Sion, ki rinames da sa.
Komwan dyirad birhin a babbalāsang do idiidi no Joda.
12 Siraw prinsipi, ki nailodyit sa do tanoro da.
Siraw panglakayen, ki abaw anyib a naitoroh dyira.
13 Siraw babbaro, ki mapilītan sa a manggiling.
Siraw babbarīto, ki madodog sa do karahmet no rara da a kayo.
14 Siraw mangalkem, ki maydisna paba do rowanganaw no syodad.
Siraw babbaro, ki insardeng daranaw magtoktokar.
15 Arabaw kasoyotan a yapod pōso namen.
Iyaw katāda namen, ki nayparin a dongdong-aw.
16 Iyaw korona, ki nasday dana yapo do oho namen.
Kapakāsi namen pa do nakapaygatos namen.
17 Nyaw naynamotan na a naydyagānyit danaw pōso namen,
kan naychawsewsep danaw kapanyideb namen:
18 ta no Tokon a Sion, ki nainonolay
a binidibidyan dan bolaw saw a chito.
19 Ki imom ĀPO, magāri ka a abos pandan.
No trono mo, ki manda do tabo a kapotōtan.
20 Āngo ta pirmi mo yamen a mawayakan?
Āngo ta inonolay mo yamen so mahay?
21 O ĀPO, pabidihen mo pa yamen dyimo
tan oyod a maybidi kaminchi.
Paybidihen mo pa yamen do akmas sīgodaw a kayiyan namen,
22 malaksid an mahanyinyi ka na dyamen,
kan taywara danaw kaisoli mo dyamen.