6
No Kāso ni ĀPO di Israel
1 Adngeyen nyo batahen ni ĀPO a maikontra do Israel!
“Maytēnek ka kan irasonan mo darom kwaya tan saksyan dan tokotokon
kan siraw paytoytokonanaya tan adngeyen da an āngo ibahey mo.”
2 Inyo a tokotokon, adngeyen nyo daromaya ni ĀPO!
Aran inyo a abos pandan a pondasyon no lōbongaya, mangadngey kamo,
ta myan darom ni ĀPO dyirad tawotawo na.
On, kāswan dana ni ĀPO Israel.
3 “Inyo a tawotawo ko, āngo pinarin ko dyinyo?
Maypāngo a nayparin ako a rahmet nyo? Atbayen nyo yaken!
4 Inihtot koynyo a yapo do Egipto,
kan insalākan koynyo do nakatagābwan nyo.
Tinoboy ko sa Moyses,
Aaron, kan Miriam a nangipangōlo dyinyo.
5 Inyo a tawotawo ko, nakmen nyo:
On nakmen nyo an maypāngo pangta a nakaabay dyinyo ni Balak a āri no Moab,
amnan an maypāngo nakabindisyon dyinyo ni Balaam a pōtot ni Beor.
Nakmen nyo paw nakapanakey nyowaw a yapo do Sittim a komwan do Gilgal
tan matonngan nyo an āngo saw malinteg a kaparin ni ĀPO.”
No Kaiyahes no Israel kan no Atbay ni ĀPO
6 “Āngo iyangay ko di ĀPO
anchan maydogod ako do salapen matan-ok a Dyos?
Mapanaybi akori so masosohan saw a dāton do salapen na
a apagtawen saw a orbon a bāka?
7 Rawaten paro ni ĀPO an manoroh ako so rinībo a malloko a karniro,
mana asa poho a rībo a oksong no moyog a lana no olibo?
Idāton kori iyaw matoneng a anak ko a pagbāyad so kasōkir ko,
iya a asi no inawan ko para do gatos no pahad ko?”
8 Namna, inbahey narana dyimo, imo a tawo, an āngo maganay,
kan āngo chakey ni ĀPO dyimo.
Sira abawriw nya: kapamarin so nainkalintegan, kadaw so kāsi,
kan maybibyay a sipapakombaba do salapen no Dyos?
No Gatos kan Dōsa no Israel
9 Adngeyen nyo! Manawag si ĀPO so tawotawo do syodadaya!
No masīrib, myan so kāmo do ngaran ni ĀPO.
Annadan nyo, ta īto dana iyaw naikeddeng a dōsa nyo.
10 Mawayakan ko paro tawo saw a maywam do marahet
a napno so kinabaknang do bahabahay da a yapo do kōsit da?
Nonolay ko paro saw mangosaraw so dya kosto a pagkīlwan
a taywara ipsok ko?
11 Pakawanen ko paro tawo a kōrang so kapagtimbang
kan kōsit so pagkīlwan?
12 Siraw babaknang mwaya, ki taywara sa so karanggas.
Siraw omyanaya dyimo, ki dān daw mabayataw,
kan mapahtot so kapangallīlaw do rida da.
13 Dawa, isagāna ko kadōsa mo,
kan rohnwan koymo a rārayawen a maynamot do gatogatos mo.
14 Koman kanchi, ki mabsoy kaba.
Nāw monchi a sarāwen.
Mangapya kanchi, ki abaw makpeh mo,
ta tabo no chinpeh mo, rārayawen konchi do gobat.
15 Maymoha kanchi, ki imo abanchiw magāpit.
Mamis kanchis asi no olibo, ki imo abanchiw mangosar so lana na.
Mamitos kanchi so ōbas, ki imo abanchiw minom so palek na.
16 Maparin saw nyaya, ta tinongpal mo saw linteg ni Āri Omri
kan tabo kaparin saw no kapotōtan ni Āri Ahab,
kan innonotan mo dadakay da.
Dawa, iparawat konchimo do karārayawan,
kan siraw tawotawo mo, ki maoy-oyaw sanchi,
kan iroromen danchimo no nasnasyon.”