20
1 Kaynoynom so palek, mapangoy-oyaw, as kaynoynom so arak, mapaydidiman.
No aran sino a mapāpasyaw do dya saya, aba so sīrib.
2 Iyaw kasoli no āri, akmay kapayngernger no lion,
as no mapasoli sya, bāli inparawat naranaw byay na.
3 Maidāyaw no tawo a mangdichan so kapaydidiman,
ki kāda abos arang a tawo, magtaros a machidiman.
4 No masadot a tawo, magarādo aba do kosto a chimpo,
dawa, do chimpo no kapagāpit, abaw machichwasan na.
5 Siraw panggep no kapangtokto no tawo, akmay marahem a ranom,
ki no myan so kapakaāwat, pahtoten na sanchi.
6 Āro saw mangibahey a myan dyiraw mapodno a kadaw,
ki sino paro machichwasan a mapagtalkan?
7 No malinteg a tawo, maybibyay a masingpet.
Magāsat saw anak a somarono dya.
8 No āri a maydisna do trono naw a mangokom,
itahep na sa tabo marahet do kapanyideb na.
9 Sino paro makabata sya a kāna, “Nāw ko a madalos so kapangtokto.
Madadas ako kan abo gatos ko”?
10 Siraw kōsit a pagkīlwan kan pagsokātan,
ki malit sa a ipsopsok ni ĀPO.
11 Aran adekey, matonngan katatawo na dyirad kaparin na.
On, madlaw kaparin na an madalos kan malinteg.
12 Tadyinya a pangadngey kan mata a panyideb,
si ĀPO iyaw namarin sira dadwa.
13 Chadaw mwabaw makaycheh, ta pomobri kanchi.
Mayokay ka, as kan āro anchiw kanen mo.
14 “Madiw prisyo, madiw prisyo!” batahen no gomātangaw,
ki an komnaro, ipangas na a nakatāwar so ginātang na.
15 Myan balitok kan āro mangīna a bato,
ki no bibi a mapahtot so kapakatoneng, akmay kapapatgan a alāhas.
16 Hapen mo kagay no tawo a pangisigorādo a pagbāyad so ōtang no istranghiro.
Hapen mo a pamagpetan an magkari a magbāyad so ōtang no gan-ganaet.
17 Iyaw kanen a yapo do kōsit, ki matami,
ki no pandan na, akmay anay do dangoy na.
18 Siraw plāno, mapatnek do maganay a pamagbaga,
dawa, an machigobat ka, manghap kas pamalākad.
19 No maparaherahet, mangipakatoneng so palimed,
dawa, pachibawan mo iyaw tawo a masawat.
20 No mangabay sa āmang mana ānang na,
akmanchiw soho byay na a mawsep do taywara a kasaryan.
21 Iyaw tāwid a mahap a masāpa,
ki bindisyon abanchi do pandan na.
22 Ibahey mwaba a kon mo, “Bahsen koymo do dyaya marahet.”
Nayahen mo si ĀPO, iyanchiw somidong dyimo.
23 Si ĀPO, ipsopsok naw dya kosto a pagkīlwan,
as no palso a pagtimbangan, ki mahwahok aba.
24 Siraw dakwang no tawo, ki pinalongo ni ĀPO.
An komwan, maypāngo a maawātan tawo bōkod na longohen?
25 Asdok do tawo no taykalo a magkari do Dyos,
kan manawdyiw kaamīris na sya so nawri a insapata na.
26 Iyaw masīrib a āri, itahep na saw marahet,
as ipapihpih na sanchi do līgay no pangirek.
27 Iyaw ispirito no tawo, akmay soho ni ĀPO
a maychichwas so tabo makatayrahem a katatawo.
28 Kadaw kan kapodno, mangaywan sa so āri.
As do kadaw, abaw karārayawan no kapagtoray na.
29 Iyaw kaidāyaw dan magtotobo, ki iyaw kayit da.
Ki no kapintas dan mangalkem kan babakket, iyaw kaoban da.
30 Bāot kan kaynyin, ki mangdalos a mamakaro so marahet.
Saplit, mangnamonamo so makatayrahem a katatawo.