4
No Kaganayan no Kinasīrib
1 Inyo a anak ko, adngeyen nyo kapangnanawo ko a āmang nyo.
Ikāso nyo tan makahap kamo so kapakaāwat,
2 ta no maitoroh ko dyinyo a nanawo, ki maganay.
Dawa, pachisyayan nyo abaw inanawo ko.
3 Ta do kamotdeh ko pa a myan di āmang ko,
kan moyboh ako a anak ni ānang ko,
4 ninanawo na yaken ni āmang, kan binata na dyaken a kāna,
“Kaiigpeten mo saw chirin ko saya do pōso mo.
Tongpalen mo saw bilbilin ko tan maynam byay mo.
5 Mamoranom ka so kinasīrib kan marahem a kapakaāwat.
Kawayakan mo sabaw inchirin ko mana pachisiwalan mo saba.
6 Pachisyayan mwabaw kinasīrib, ta basbāli a gwardyaan nanchimo.
Nāw mo a chadaw, kan aywanan nanchimo.
7 No siknanan sīrib, ki nya: Mamoranom ka so kinasīrib,
as kan aran āngo pa a mahap mo, rapan mos kapakaāwat.
8 Ipateg mo, kan patohosen nanchimo.
Padayāwan nanchimo an kepkepen mo.
9 Balangātan nanchimo so mapintas a arkos do oho mo,
kan koronaan nanchimo so masileng a korona.”
10 Adngeyen mo anak ko, kan rawaten mo ibahey ko.
Tan komwan, maypāro anchiw tawen do kabyay mo.
11 Innanawo ko dyimo no dadakay no kinasīrib,
kan pinalongo koymo do rarahan no malinteg a kabibyay.
12 Anchan mayam ka, mabalat kabanchi,
kan anchan mayyayo ka, madodog kabanchi.
13 Nāw mo a igpet iyaw nananawo ko.
Gwardyaan mo a maganay, ta nawriw byay mo.
14 Domakwang kaba do babatas daya no marahet,
kan manakey kaba do ayaman dan mamarin so gatos.
15 Lomiklik ka. Mayam kaba do ayaman da,
basbāli a domitdit ka, as kakaro mo dyira.
16 Ta makapakaycheh sabaw an dyi da manma parinen karahet daw.
Makapaynepdep saba an dyi sa makaadodog so asa tawo.
17 Nawriw kanen daw mākan a nahap do karahet,
kan inomen daw arak a yapo do kinaranggas.
18 Iyaw rarahan dan malinteg, akmay kapaysesēdang no araw
a maypaypalawag a manda do kayegen na.
19 Ki iyaw ayaman dan marahet, maiyārig do yosari.
Polos a dyi da chapatak an āngo saw pakadodogan da.
20 Anak ko, ikāso mo chirin ko saya,
kan adngeyen mo a maganay ibahey ko saya.
21 Pasyayen mwabaw mata mo dyirad chirin ko saya,
basbāli a ipapōso mo sa,
22 ta manoroh so byay dyirad mangrawat sira
kan salon-at do intīro a inawan da.
23 Iyaw kangronaan, aywanan mo pakono pōso mo,
ta iyaw nyaw mapawnot an āngo rarahan do kabibyay mo.
24 Aryan mo dyīdo a kapaychirin do dangoy mo,
kan pabawahen mo masīkap a kapagsarīta do bibi mo.
25 Nāw mo a chiban salapen mo,
kan nāw mo a mochidngan a derecho.
26 Mamarin kas lantag a rarahan a para do kokod mo.
Tan komwan, syirtosyirto a tabo ayayaman mo.
27 Somiwal kaba do kawanan mana do kaholi,
basbāli a domitdit ka a machibawa do marahet.