4
No Kapaychabahay Da Boas kan Roth
1 Do kamabekasanaw, nangay si Boas do bīt naw no rowanganaw no idi a pagmimitingan dan tawotawo, kan naydisna daw. Nahay aba, homnabas iyaw kabagyan naw a naibahey na a mangalāngon sya. Tinawagan ni Boas a kāna, “Hoy! Anchi ka. May ka pa dya maydisna.” Ki nangay a naydisna.
2 Sinpangan na, nangrara si Boas so asa poho dyirad panglakayenaw do dawri a idi, kan inakdaw na dyira a maychadisdisna pa sa daw.
3 Katayoka na, binata ni Boas do dawri a kabagyan na a kāna, “Naybidi danaw si Noemi a yapo do tana a Moab, ki maglākwaw so tana a iyaw dyiraw ni simna Elimelek a kabagyan ta.
4 No myan do aktokto ko, ki rebbeng na a ibahey ko dyimo an chakey mo a sakaen nya tana do salapen dan maychadisdisnaya dya kan do salapen dan panglakayenaya no kaidyan ta a sistīgo ta. Ki an dyi mo a sakaen, ibahey mo dyaken tan chapatak ko. Ta imo lang maparin a manma myan so kalintegan, as kan yaken somarono dyimo.”
Inatbay na a kāna, “Na! Sakaen ko ah, ta nawryayaw rebbeng ko.”
5 Ki binata ni Boas a kāna, “Do araw a sakaen mo bengkagaw a yapo di Noemi, machita kabahayen mo pa si ādi Roth a Moabita a iyaw nabālwaw tan myan maipōtot a mahakay a omtongtong so ngaranaw no nadimanaw kan tan dya mabo tanaw a tāwid no pamilya na.”
6 Do nakadngey naw so nya, binata no kabagyanaw a kāna, “Awān! An komwan, masaka kwabaw nawri a tana, ta matāwid dabanchi no mismo a pōtot ko. Imo danaw mangsaka sya. Maparin akwaba.”
7 (No dadakay da do Israel kaychowa, an myan makey a mapayadis so kalintegan na do matarek a maynamot do asa a bānag, ki itoroh naw kasmangaw no tokap na do katōlag naw. Komwan kaparin da so kapatayoka no kapachitōlag da.)
8 Dawa, inbahey no kabagyanaw a myan so kalintegan di Boas a kāna, “Imo danaw mangsaka so tanaya ah.” Do dāwri, pinakaro naw kasmangaw no tokap na, as nakaitoroh na sya di Boas.
9 Katayoka na, binata ni Boas dyirad panglakayenaw kan do tabo tawotawo a myan daw a kāna, “Sicharaw, inyo a tabo, ki paneknekan nyo a gatāngen ko di ākang Noemi tabo dyiran simna ākang Elimelek kan yapo da simna Kilion kan Mahalon a potōt na.
10 Kabahayen ko pa si ādi Roth a Moabita, iyaw bālwaw ni Mahalon tan myan anchiw pōtot ko a mahakay a omtongtong so ngaran naw no nadimanaw kan mangtāwid so tanaw no kapoonan na. Tan komwan, mabo abanchiw ngaran no nadimanaw do pamilya na kan do idi na. On, sicharaw inyo a tabo mangpaneknek.”
11 Do dāwri, siraw panglakayen kan siraw tabo tawotawowaw a myan do rowanganaw no idi, ki inatbay da a kon da, “On, yamen, ki sistīgo no nya. Si ĀPO pakono mangbindisyon so nawri a mabakes a kabahayen mo, kan mayparin pakono a akma sa Rakel kan Lea do kaychowa a myan so āro a anak a napatnek so nasyon a Israel. Bomaknang ka pakononchi do Epratah, kan magdināmag ka pakononchi do idi a Betlehem.
12 Siraw pōtot mo a iyanak no nya mabakes a itoroh ni ĀPO dyinyo, payparinen da pakono pamilya mo akmas pamilya Pares a inyanak ni Tamar di Joda.”
Siraw Kapotōtan ni Boas
13 Dawa, kinabahay ni Boas si Roth. Do nakapayoknod daw, binindisyonan ni ĀPO si Roth, kan nabōgi. Naymanganak so mahakay.
14 Siraw mababakes do dawri a idi, binata da di Noemi a kon da, “Maidāyaw si ĀPO, ta sichangori inonolay naba imo do nakaitoroh na dyimo so apoko mo tan matongtong pamilya mo. Magdināmag pakono nya apoko mo do tabo Israel.
15 Paydamnayen nanchiw byay mo, kan aywanan nanchi imo do kabaket mo. On, inyanak no manōgang mwaya a madaw dyimo kan iya, ki mapatpateg pa kan papito a anak mo a mahahakay.”
16 Do dāwri, inhap ni Noemi iyaw apoko naw a kinepkep kan sinalobal.
17 Binata dan mababakes a karoba na a kon da, “Ari danaw anak a mahakay do pamilya ni Noemi.” As pinangaranan da so Obed. As si Obed, ki āmang ni Jesse. As si Jesse, ki āmang ni Āri Dabid.
Siraw Kapotōtan ni Āri Dabid
18 Siraw nyaw kapotōtan ni Āri Dabid a mangrogi di Pares. Si Pares, ki āmang ni Hesron.
19 As si Hesron, ki āmang ni Ram. As si Ram, ki āmang ni Amminadab.
20 As si Amminadab, ki āmang ni Naason. As si Naason, ki āmang ni Salmon.
21 As si Salmon, ki āmang ni Boas. As si Boas, ki āmang ni Obed.
22 As si Obed, ki āmang ni Jesse. As si Jesse, ki āmang ni Āri Dabid.