24
No Kapagilista ni Dabid
(1 Kron. 21:1-27)
1 Minirwa a somindeb iyaw kasoli ni ĀPO do Israel. Pinaklaklal na si Dabid a machikontra dyira do kaibahey sya ni Dabid a kāna, “Mangay ka a mangsinsos siras tawotawo no Israel kan no Joda.”
2 Dawa, inbahey no āryaw di Joab kan siraw komander saw no bōyot a myan dya a kāna, “Yangay nyo a hanyiben tabo trībo no Israel a makayapo do Dan manda do Beerseba, kan sinsosen nyo sa tabo maparin saw a machigobat a mahahakay tan chapatak ko an papira saw myan daw.”
3 Ki tinbay ni Joab āryaw a kāna, “Si ĀPO pakono a Dyos mo mapaypāro siras bōyot mo so ginasgasot so kāro, kan maboya pakono no mata no āpo a āri ko. Ki āngo paro ta komwan chakey a maparin no āpo a āri ko?”
4 Ki inpapīlit ni Dabid, kan pinadso na si Joab kan siraw komander saw no bōyot. Dawa, komnaro sa do salapenaw no āri, kan inyangay da sa sininsos siraw mahahakayaw a Israel.
5 Namtang sa do Oksong a Jordan, kan nagkampo sa do masngenaw do Aroer, do abagātan no idi do hobok no payahosongan. Yapo daw, kominwan sa do Gad manda do Jaser.
6 Nangay sa pa do Gilead kan do Kadesh a myan do tana dan Heteo, as somarono do Dan. Yapo dawri, nangdibon sa a lomnongo do Sidon.
7 Sinpangan na, nakarapit sa do kōta no syodad do Tiro, kan do tabo īdiīdi daw no Hibeo kan Kananeo saw. Kapanawdyan na, nagpaabagātan sa a nangay do Beerseba a myan do Negeb do Joda.
8 Do nakatayoka da nangay do īntiro a tana no Israel do irahem no sasyam a kabohan kan dadwa a poho a karaw, naybidi dana sa do Jerosalem.
9 Inpakatoneng ni Joab iyaw paytābwan no bidang dan para gobat a mahahakay: Do Israel myan iyaw 800,000 a makakaya so magispāda. As do Joda, ki myan 500,000.
10 Ki pinaybinākel ni Dabid do katayoka naw a nangipasinsos siras machigobat saw a mahahakay, kan binata na di ĀPO a kāna, “Naygatos ako a taywara do pinarin kwaya. Changori, machikakaāsi ako dyimom ĀPO, pakarohen mo paw gatos nayan pachirawatan mo, ta nakaparin ako so kaparin no abos arang.”
11 Do nakapaybangonaw ni Dabid do somaronwaw a mabekas, inpakatoneng ni ĀPO chirin naw di Gad a propīta a iyaw mamadtwaw ni Dabid a kāna,
12 “Mangay ka kan ibahey mo di Dabid a kon mo, ‘Nyaw bata ni ĀPO: Torohan koymo so tatdo a paypidyan mo. Maypidi kas asa dyirad dyaya a parinen ko a kontra dyimo.’ ”
13 Dawa, nangay si Gad di Dabid, kan binata na dya a kāna, “Mangayori dyimo tatdo a katawen a kapaychapteng do tana mo? Mana tatdori a kabohan a kapayyapayyayo mo dyirad kabōsor mo a manglakat dyimo? Mana tatdori a karaw a pisti do tana mo? Changori, iktokto mo a maganay kan disisyonan mo an āngo atbay konchi di ĀPO a iyaw nanoboy dyaken.”
14 Binata ni Dabid di Gad a kāna, “Taywara mariribokan akwaya a mamidi. Madōsa kami pakono do kakamay ni ĀPO, ta rakoh iyaw kāsi na. Ki dyi pakono a do kakamay no tawo pakasdayan ko.”
15 Dawa, nangyangay si ĀPO so pisti do intīro a Israel yapo do dawri a kamabekas a manda do naitongdo naw a araw. Do dāwri, ki nadiman 70,000 a tawotawo a yapo do Dan a manda do Beerseba.
16 Do nakalonataw no anghil so tachay naw a mangrārayaw so Jerosalem, inbabāwi ni ĀPO marahetaw a pinanggep na. Dawa, binata na do anghilaw a mangdiman siras tawotawo a kāna, “Naw dana! Mangdiman ka paba.” Do dāwri a ōras, myan a nakatēnek iyaw anghilaw ni ĀPO do pangirkanaw ni Arawnah a Jeboseo.
17 Do nakaboya naw ni Dabid so anghilaw a madama a mangdiman siras tawotawo saw, binata na di ĀPO a kāna, “Yaken iyaw naygatos, kan yaken iyaw namarin so madi. Siraw nya tawotawo a akma saw karniro, āngo pinarin da? Iya pakono pangdōsa mo, ki mangay dyaken kan iyaw no pamilya ko.”
No Kapatnek ni Dabid so Altar
18 Do dāwri a araw, nangay si Gad di Dabid, kan binata na dya a kāna, “Somonget ka kan may ka mapatnek so altar a para di ĀPO do pangirkanaw ni Arawnah a Jeboseo.”
19 Dawa, somnonget si Dabid, akmas inpaibilin naw ni ĀPO di Gad.
20 Do nakapaytatalamad naw ni Arawnah, kan naboya naw āryaw kan opisyalis na saw a maypasngen dya, nangay a nagrōkob do tana a magdāyaw do āryaw.
21 Binata ni Arawnah a kāna, “Āngo ta si āpo a āri ko, ki mangay do pachirawatan naya?”
Initbay ni Dabid a kāna, “Yangay ko a gatāngen yananaw no pangirkan mwaya tan makapatnek ako so altar a para di ĀPO, tan mapenpen iyaw pistyaya a mangdiman so tawotawo.”
22 Initbay ni Arawnah di Dabid a kāna, “Hapen na pakono no āpo a āri ko, kan idāton naw aran āngo a chakey na. Cha sayaw bāka a para dāton a masosohan. Cha pa sayaw pangirek kan siraw pāko a irotong mo.
23 Tabo nyaya mo āpo āri, yaken a pachirwatan mo a si Arawnah, ki itoroh ko dyimo. Rawaten pakono ni ĀPO a Dyos mo iyaw dāton mwaya.”
24 Ki tinbay ni Dabid si Arawnah a kāna, “Engga, basta gatāngen ko dyimo. Mangidāton akwaba di ĀPO a Dyos ko so dāton a masosohan a abo so bāyad a yapo dyaken.”
Dawa, ginātang ni Dabid iyaw pangirkanaw kan siraw bākaw so dadima poho a kapidāso a pirak.
25 Napatnek so altar si Dabid a para di ĀPO do dawri a yanan. Nangidāton so dāton saw a masosohan kan dāton saw a pachikapya. Do dāwri, tinbay ni ĀPO iyaw dasal naw ni Dabid a para do tanaw, kan iyaw pistyaw do tawotawo no Israel, ki nagsardeng dana.