2
No Oyod a Soldado ni Kristo Jesos
1 Imom Timoteo a anak ko, magtored ka maynamot do parābor ni Āpo Dyos dyaten a machasa di Kristo Jesos.
2 No innanawo ko dyimo a napaneknekan do salapen āro a saksi, ki inanawo mo dyirad matalek saw a tawo tan siranchiw manginanawo dyirad kadwan saw a tawotawo.
3 Machipaylilidyat ka dyaken do lidyat a gagāngay a mangay dyirad manganohedaw di Kristo Jesos. On, anōsan mo lidyataya a akmas kapagānos no mapagtalkanaw a soldādo.
4 No soldādo a madama a magsirsīrbi, ki maybibyay aba akmas tawotawo a dya soldādo, basbāli a ipasnek na parinen chakeyaw no komander naw.
5 Chiban paw no machilombaw a mayyayo, ki mahap nabaw primyo na, an dyi na tongpalen paglintegan.
6 Masaw, iyaw magaget a magtalon, rebbeng na iyaw manma makahap so pinakadyira na do inmoha naw.
7 Iktokto mo saw nya pangārig a ibahebahey ko dyimo, ta si Āponchiw manoroh dyimo so kapakaāwat mo sya tabo.
8 Pasyayen mwaba do aktokto mo si Jeso-Kristo a nagōngar, as kan yapo do kapotōtan ni Āri Dabid. Nyaw Maganay a Dāmag a inkasaba ko dyimo,
9 as kan maynamot do kaikasaba kwaya dyimos nyaya, ki naidadanes ako kan nakadinaan ako a akmay kriminal. Ki aba polos makakadina so chirinaya no Dyos.
10 Dawa, ibtoran ko tabo nyaya kalidyatan a maynamot dyirad tawotawowaw a pinidi no Dyos. Tan komwan, maisalākan sanchi a maynamot do kapanganohed da di Kristo Jesos, kan machirāman sanchi do byay a abos pandan do yanan no Dyos.
11 Oyod nyaya panyinyirin:
“An naibidang ta na a nairāman do nakadimanaw ni Kristo,
mairāman tanchi a mabyay a machiyan dya a abos pandan.
12 An nāw ta makaibtor so kalidyatan saya a maynamot dya,
makapachipagtoray tanchi dya.
Ki an ilibak ta a iyaw Āpo ta,
ilibak nanchi a dyira na yaten.
13 An dyi ta mapagtalkan dya,
ki alit na a nāw na mapagtalkan,
ta mabaliwan abaw kalinteg na.”
No Chakey no Dyos Dyirad Magsīrbi Dya
14 Ipanakem mo dyirad tawotawowaw daw, as kan ibilin mo dyira do salapen ni Āpo Dyos a dyi sa maydidiman a maynamot do kapakaawat da so chirin. Ta iyaw nya, ki aba polos maitoroh na dyira, kan tod a mapatadyichokod siras mangadngey saw do kapanganohed da.
15 Imom Timoteo, nāw mo na ipasnek iyaw kapangahwahok mo do Dyos. On, inanawo mo a maganay iyaw oyod a chirin no Dyos a akmas mapagtalkanaw a pachirawatan no Dyos a aba polos pakasnekan mo do salapen na.
16 Tadyichokodan mo saw nainlōbonganaw a kapagsosopyat a abos sinpaspangan do salapen no Dyos. Ta no pagtongpalan no nya saya a kapagdidibati, ki maypaypangay paw kapaypabawa no tawotawo do chakeyaw no Dyos.
17 Ta siraw nya bayataw a nanawo da, ki akmas maranggasaw a ganyit a makapayadis. Siraw dadwa dyira dya a maistro, ki sa Himeneo kan Pileto.
18 Sira, ki somniwal dana sa do oyod, kan pinatadyichokod daranaw kadwan saw a manganohed do kapanganohed da. Ta no inanawo da, ki apabanchiw kapagōngar no inawan, ta do ōras ta a nanganohed di Kristo, napagōngar ta na do ispirito.
19 Ki aran komwan ibahey da, no oyod a yapo do chirin no Dyos, ki matādyan aba polos. Nya, ki akmas mahnyiyaw a pondasyon no iglisya a nakaitolasan nya: “Si Āpo Dyos, ki chapatak na saw tawo na.” Naitolas pa a kāna, “An sino a tawo a mangibahey sya a magdaydāyaw di Āpo Dyos, ki machita dyi dana mamarin so marahet.”
20 Kaspangarigan, do rakohaw a bahay no mabaknang, myan saw balitok kan pirak a longlongan a maosar do masisīta saw a kakpekpehan. Myan pa saw kayo kan nadamili a longlongan a maosar do sinsinan a kaosaran da.
21 No chakey na batahen, ki siraw manganohed saw a machibawa do tabo saw a bayataw a nanawo, ki akma siras masisīta saw a kinanan. Sinsinan abaw sīrbi da do Dyos, ta nāw da sisasagāna a mamarin so aran āngo a kīta no maganay a tarabāko.
22 Dawa, tadyichokodan mo saw bisyo a chalakam da no magtotobo, kan ipasnek mo iyaw malinteg kan madyosan a kabibyay. Nāw mo do kapanganohed mod Kristo kan kadaw mod kapayngay mo a manganohed, as kan machitōnos ka dyira. On, ipasnek mo machasa do tabo magdaydāyaw saw di Āpo Dyos a sidadalos so kapangtokto.
23 Pachibawan mo saw abwaw so sinpaspangan a kapagsosopyat a yapo do tawotawo saw a kōrang so kapakapatak. Ta natonngan mo na a siraw nya, ki pakayapwan kapaydidiman.
24 Ta iyaw no pachirawatan no Dyos, ki machita a dya machidiman, basbāli a māsi dyirad aran sino, kan maganay kan maānos a mangnanawo.
25 On, siaānos ka a mangkosto dyirad mangkontraw do kosto a nanawo, ta āngonchan torohan san Āpo Dyos so gondāway da a magbabāwi, as kan mapatakan daw oyod.
26 Tan komwan, maypaganay pangtoktwan da, as makawasak dana sa do asdokaw ni Satanas a nangtiliw a nangitoray dyira do chakey na.