3
No Parmata Maynamot do Katotohosan a Pādi
1 Sinpangan na, do matarek a parmata, inpaboya dyaken ĀPO si Joswe a katotohosan a pādi a myan a maytēnek do salapenaw no anghil ni ĀPO. Aran si Satanas, ki myan a maytēnek do bīt naw do kawanan a nakasagāna mangidarom sya.
2 Do dāwri, binata no anghilaw ni ĀPO di Satanas a kāna, “Okomen pakono imo ni ĀPO mo Satanas. On, okomen na pakono imo ni ĀPO a namidi so Jerosalem, ta iyaw nya a tawo a si Joswe, ki insalākan ni ĀPO akmay irotong a nalnet a yapo do apoy.”
3 Si Joswe, ki nakalaylay so malapos a maytēnek do salapenaw no anghil ni ĀPO.
4 Do dāwri, binata no anghilaw ni ĀPO dyirad maytēnek saw a magsirsīrbi dya a kāna, “Bahasen nyo malapos saya laylay na.”
As insarono na a binata di Joswe a kāna, “Chiban mo, pinakaro ko naw gatos mo, kan changori laylayan ko na imo so bayo a dya sinsinan.”
5 Sinpangan na, inbilin nad magsirsīrbi saw dya a barabādan da si Joswe. Dawa, binarabādan das madalos oho naw, as kan linaylayan das madadas, ki myan a maytēnek do dawriw anghilaw ni ĀPO.
6 Do dāwri, inmandar no anghilaw ni ĀPO di Joswe a kāna,
7 “Nyaw batahen ni ĀPO a Manakabalin do Tābo a kāna, ‘An onotan mo saw linteg ko, as kan parinen mo saw itoroh ko saw a pagrebbengan mo, imonchiw mangipangōlo do Timplo ko, as kan aran dyirad pangokoman ko. Itoroh konchi dyimo kalintegan a machirāman dyirad maytēnek saya dya.
8 Mangadngey kam Joswe a katotohosan a pādi kan inyo a rārayay na a papādi. Pangancharan kamo so maparin anchi do masakbayan, ta mahay paba, ki toboyen konchiw pachirawatan kwaw a mayngaran so Sanga.
9 On, ta pinadisna ko batwaya do salapenaya ni Joswe. As iyaw nya bato, ki nabalabāla so papito kan mangikitikit akonchi so tolas do dawri a bato. As do asa karaw, ki ponāsen ko nanchiw gatos no nya tana.
10 Do dāwrinchi a araw, maysin-aawis kamo do bōkod nyo a kaobāsan kan kaigosan a mangnānam so kaydamnayan no kapangtokto a abwa polos so kamwamwan,’ bata ni ĀPO a Manakabalin do Tābo.”