2
1 Maychichipeh kamo. On, maychichipeh kamo,
inyo a nasyon a abos asnek,
2 sakbay no naikeddeng a araw a kaokom nyo
a maisayaw a akmay tahep.
On, sakbay a mangay dyinyo karanggas no soli ni ĀPO,
kan sakbay a mangay dyinyo arawaw no soli ni ĀPO.
3 Chichwasen nyo si ĀPO,
inyo a tabo a mapakombaba do tanaya,
inyo a mangtongpal so bilbilin na.
Chichwasen nyo kalinteg kan kapakombaba.
Arānchi a myan kamītan nyo
do arawaw no soli ni ĀPO.
No Kapangdōsa no Dyos so Pilisteo
4 No syodad a Gasa, ki mainonolay anchi,
No syodad a Askelon, ki marārayaw anchi.
Siraw taga Asdod, ki mapaksyat sanchi do kayegen araw,
as kan siraw taga Ekron, ki mabagot sanchi.
5 Kapakāsi nyo pa a omyan do payis no kanayan,
inyo a Keretita a tawo.
Iyaw chirin ni ĀPO, ki maikontra dyinyo,
inyo do Kanaan a tana dan Pilisteo.
Bata ni ĀPO a kāna, “Rārayawen konchi inyo,
kan abanchiw no mabidin.”
6 No tana do payis no kanayan a pagyanan dan Keretita,
ki mayparin anchi a yanan dan magpaspastor
kan koral dan karniro.
7 Nya tana, ki dyira danchi
no makalāsat saw a kapotōtan no Joda
a dyanchiw pangpastoran das karniro da saw.
As do bahabahay a mainonolay do Askelon,
maypoktad sanchi a makaycheh daw.
Ta si ĀPO a Dyos da, ki iyaw mangaywan dyira,
kan paybidihen nanchiw kinabaknang da.
No Kapangdōsa no Dyos so Moab kan Ammon
8 Bata ni ĀPO a Manakabalin do Tābo a kāna,
“Nadngey ko kapanginsolto dan Moabita,
kan no kapangiroromen dan Ammonita.
On, inroromen da saw tawotawo ko,
kan inpangas da a sakōpen danchiw tana da.
9 Dawa, akmas kasigorādo no kasibibyay ko,
yaken a ĀPO a Manakabalin do Tābo a Dyos no Israel,
syirto a mayparin anchiw Moab a akmas Sodoma,
as siraw Ammonita, ki akma sanchis Gomorra
a tana dan nōlok kan aridos saw a asin
a abos sīrbi a tana a magnanayon.
Siraw makalāsat a tawo ko, samsaman da sanchi.
Siraw sibibyayaw do nasyon ko, hapen danchiw tana daw.”
10 Nyaw mahahap danchi a tādi no kapangas da,
do kapangiroromen kan kapangoyaw da
so tawotawo ni ĀPO a Manakabalin do Tābo.
11 Si ĀPO, ki makamwamomomo anchi dyira
anchan pagolangen naw tabo dyos do tanaya.
Do dāwri, tabo nasyon, ki magdaydāyaw sanchid ĀPO,
kāda asa do bōkod na a tana.
No Kapangdōsa no Dyos so Kos
12 Bata pa ni ĀPO a kāna, “Aran inyo a taga Kos,
ki maipadiman kamonchi do ispāda.”
No Kapangdōsa no Dyos so Assirya
13 Ilonat nanchiw tachay na a mangdōsa do ammyānan,
kan rārayawen naw Assirya.
As no Ninebeh, ki mainonolay a marārayaw
a mayparin a mabkoh a tana a akma danay let-ang.
14 Maypoktad sanchi daw bāka, kalding, kan karniro saw,
kan dawriw yanan dan kāda kīta no bolaw a animal.
Siraw gokgok kan tottōho,
ki aponan danchiw totok dan parey.
Maychagokgokgok sanchi a omyeng yapo do bintan.
Mamalat sanchiw nalba saw dyirad dapyan saw.
Siraw sidro a tappi, ki maarawan sanchi.
15 Nya maragsak kan mapangas a syodad
a abos pakaparoparwan dan omidi daw,
ki binata na do inaynawan na a kāna,
“Yaken kasisitāan, kan abaw maipariho dyaken.”
Āngwa karārayaw nanchi
a pagyanan danchi no bolaw sa a animal!
Tābo a homabas, ki oyawen danchi,
kan paychaychakemkem danchi.