6
Patanggal a komapet do matatarek a marahet
1 Manganak, maypromisa kava a omgarantia dia a ompaga do otang no kadwan,
2 ta icharahet mo ya as kaakma na niay tolo dimo,
3 ta mian ka do irahem no ipakapamarin no pinaypromisan moaya. Amna makavolaw ka pa dia an nyeng ka mangay sia a mapavidi do promisa mori.
4 Maynehah kava anmana makaycheh kava asna nyeng ka mangay sia.
5 Librien mo o karakohan mo a akma so kaparin no manomanok anmana agsah a mayayo do asa ka tawo a tomolo sira.
6 Mayanong dira do matatalakak o kapanghap da so nanawo dira do vohawo.
7 Arava o matodin a onotan anmana apohen da nia,
8 amna mapayiras sa ya so kanen da do rayon a itanggal da so manam a amian.
9 Nawri parinyen o kajivajivat no matalakak as mayvangon ava.
10 “Makaycheh ako pa so dekey,” kwana, “as kapaynehah ko pa so kadekeyen.”
11 Pero do katori na makaycheh am mawara anti sia o kapakasiasi a akmay asa ka manakaw a mian so armas.
12 No marahet so aktokto as abo so mapia a parinyen a tawo am komtaktas as mayistoria so daday.
13 Mavoya a aran do kachimit na anmana hoji no tanoro na an ango ichakey na a parinyen a marahet.
14 As fermi na aktoktohen o marahet as kapasitnan na so golo do aran dino.
15 Dawa makayamot dia am mararayaw anti a bigla a abo so katanggalan na sia.
16-19 Tiya sa o papito a isoli as vadawen no Apo taya:
no mahambog a iyangangay;
no kapaydaydaday;
no mandindiman so tawo a abo so gatos;
no fermi a mangtokto so marahet;
no fermi a makalo a mamarin so marahet;
asa ka testigo a maydaydaday;
no mapasitnan so kapaysosobna no mapia may-ivan.
No marahet a resolta no kapangadwan
20 Manganak, parinyen mo o vatahen dimo no ama mo as kano kawayakan moava o ninanawan dimo no ina mo.
21 Kapiahen mo sa onongan o atavo a konseho da dimo.
22 No nanawo daya anti o mapawnot dimo do pangwanan mo, proteksion sa dimo do mahep as rarayay mo ya do maraw.
23 No yokoyokoran da dimo am romial a sehdang dimo as paynananawhen daymo a maviay so mapia.
24 Pavawahen daymo do malalapos a mavavakes.
25 Kawtapan kava no avid da anmana matolo kava do manentasion a iyangay da.
26 No malapos a mavakes am mahomis o pagan dia, pero no kapangadwan aya am rarayawen na pa o mismo a viay no asa ka mahakay.
27 Ta maparin ka paro a mangopkop so apoy as kadi mo mapasoan?
28 Anmana maparin ka paro tomakad do inmaya as kadi na mapasoan no kokod mo?
29 Akma sia o kadelidelikado no kapangadwan so kakovot no asa ka tawo. Dawa no omparin sia ya am omhamo ava anti a kakastigoan.
30 No manakaw a makayamot do kaoyod na mapteng am taywara ava parohen.
31 Amna an adasan sia am mamaga sia so maypangay pa kano tinakaw nawri a aran mapatawos o miniminyan na.
32 Pero no mangadwan am arava o mapia a pinangtoktoan na, ta rarayawen na mismo o viay na.
33 Mabo anti o anib sia do kapakataho na as kavidin narana a mian so pakasnekan.
34 Arava o maypakohat so soli kano mahakay a maselos do kakovot na. Arava o pamandan no akey na mamahes.
35 Ipaypatanoy nava o kapaga sia as arava o regalo a makapakaro so soli na.