106
No kadaday so Dios a masisien
1 Dadayen ta o Dios as kapamahemahes ta sia takwan oyod sia a mapia kano machipanda ava o addaw na.
2 Ara paro makaparin sia pavatahen o atavo a makakniknin a pinarin na sa anmana ara paro manawob so kadaday sia?
3 Masoyosoyot sa o komita so mapia a hostisia as kafermi da mamarin so mayanong.
4 Kanakmen mo yaken, mo Apo, an sidongen mo sa kano an librien mo sa o pinidi mo sa a tawotawo mo,
5 tapian mavoya ko sia o kabendision mo dira do tawotawo mo kano machipasoyot ako dira as kapachangay ko pa do tinoroh aya dimo a nasion mo a torohan mo so onor.
6 Makagatogatos kami a akma so kaparin da no apoapo namen sa. Oyod a narahet o pinariparin namen.
7 Sira o apoapo namen sa kaychowa am pinakamia dava o aro sawri a makakniknin a pinarin mo dira do kayan da do Egipto. Chinawayakan da o masanib awri a kapavoya mo nia dira o kaddaw kano kasi mo nira asna no nakapachisobna da pa dimo do kayan da do taaw awri a tawagan da so Red Sea.
8 Amna kayan pa no nakalibri mo sira akma so nipromisa mo dira as kapavoya mo nia do kadwan a nasiones o makakniknin aya ipakapamarin mo.
9 Nimandoan mo o taaw awri a mayara tapian mian o makolay a panahanan da as kapawnot mo sira a mayatovang do taaw ori a mayam do makolay a rarahan do hovok no taaw aya.
10 Nilibri mo sa do komontra sira kan dira do kalaban da sa.
11 Ta chinamotan sa atavo o kalaban da do taaw aya as arava o nakalaban dira a aran asa.
12 Dawa do nakavoya da sia ya am pinanganohdan da o promisa na sa as kapakakanta da so nidaday da sia.
13 Amna oyod da nakalo a kawayakan o pinarin naya, ta dekey as kawnot da dia o tanyan da ichakey as kadi da minpanayan so kapawnot dira no Dios.
14 Do kayan darana do desierto am nawri onotan da o ichakey da as kasobna kano kahawahaway da so Dios.
15 Dawa tinoroh dira no Dios o akdawen daya pero tomnoroh pa sia so mahara a ganit da.
16 Do kayan da do desierto aya am chinaynanahet da sa Moises kani Aaron a sira so pinidi no Dios a mato a pachirawatan na.
17 Makayamot do kaynanahet daya am minehtak o tana as nakalasek da Dathan as kani Abrian kano familia na,
18 as kapachonot no apoy a yapo do hanyit a mintemtem sira so tawo saya a minonot dira a mararahet so parinyen.
19 Namarin sa so vohawan a dekey a baka do Horeb a nia so nidaday da.
20 Pinatadi da o rebolto no dekey a baka a koman so dibobot do oyod aya makapamarin a Dios.
21 Chinawayakan da o Dios a iya so minlibri sira do makakniknin sawri a pinariparin na do Egipto.
22 Chinawayakan da o makakniknin sawri a milagro na a aran no pinarin nawri do kapaychitas da do taaw awri.
23 Do nakavata sia no Dios o kararayaw na sira o tawotawo saya am no pachirawatan naya a si Moises am naytetnek a mapachisiasi nia do Dios o kapadpet na so soli na nira tapian di sa dimanen.
24 Nakey sava somdep do tana aya a nipromisa no Dios a itoroh dira takwan pinanganohdan dava o promisa awri no Dios dira.
25 Navidin saya do sahad no tolda da sa a mayreklamo as chinakey dava adngeyen o Dios.
26 Dawa pinayavay na sa do kadiman da anti do desierto aya,
27 as kapaychawpit da anti no kamanganakan da sa do matatarek a kavahayan as kadiman da anti do di da kavahayan.
28 Kwanasaw am nachangay sa do kadaday si Baal do Peor as kapachakan da so nisakrifisio da do abo saya so viay a diosdiosan.
29 Do atavo sa pinariparin da am niyokay da so soli no Dios as dawa somnitnan o mahara a ganit dira akmay pisti.
30 Amna naytetnek si Finehas as kapabhes na so soli no Dios a nia dana so nibhes no pisti aya.
31 Niaya a pinarin ni Finehas o pakayapoan no nakasinchad sia no Dios a mahosto do salapan na a nia so fermi anti a manakem a manda anchowa.
32 Do kayan da do danom no Meribah am pinasoli da o Dios as pinakayapoan no oyod a marahmet a problema ni Moises a makayamot dira.
33 As makayamot do nakapachisobna da do Espirito no Dios am nakachirichirin si Moises so di na sa mayanong a vatahen.
34 Nanganohed sava do vinata ori dira no Dios a kadiman da sira o tawotawo do nasiones a niplano no Dios a kastigoan a makayamot do gatogatos da,
35 asna nachisagel sa dira as kapachitaha da do parinyen da sa marahet.
36 Nidaday da sa o diosdiosan da sa a nia so pinayparayi da pa do Dios.
37 Aran no kamanganakan da sa am nitoroh da sa a sakrifisio do marahet sa espirito do nakapachitahataha da do pariparinyen sa no kadwan a nasion.
38 Sira ya a abo so panmoan sia o nidiman da sa a isakrifisio as no Canaan aya am nalapolapos no raya da.
39 No marahet saya a parinyen da o minlapos sira akmay mangadwan do nakatadichokod da do Dios as kasanga da no diosdiosan sa.
40 Dawa somnoli o Dios as kaskeh na nira no tinoroh aya sia a nasion na,
41 as pinaynolay na sa a pakovoten no kavahayan no di saya makasinchad so Dios.
42 Pinakasiasi da sa no napakovot aya sira a kakontran da.
43 Oyod a masanib o kalibri sira no Dios amna kayan no kapaypangay no kapachisobna da sia a manda do kaoyod darana marahem do pakagatosan.
44 Amna aran akma saw o kaoyod na mahara no gatos da am kayan pa no nakadngey sira no Dios do kapachisiasi da sia.
45 Makayamot dira am nanakem na o trato na dira dawa do rakoh a addaw na nira am chinasi na sa,
46 as kaparin na sira mismo so komontra sira a masi nira.
47 Apo namen a Dios, librien mo yamen as kapirwa mo na diamen a akpehen a pavidien do kavahayan namen awri a nipromisa mo tapian pamahmahsan namen imo as kadaday namen dimo.
48 Dadayen ta o Dios sichangoriaw as kan anchowa abo so pandan! Atavo a tawo am vatahen nio, “Alleluia! Dadayen ta o Dios!”